Lukas 19 - U Maganda A Baheta Ni Jesu-Cristo

Ti Jesus sakay ti Zaqueo

¹ Nadid, immangay ti Jesus ti Jerico sakay naglakad siya tu banuwan.

² Te essa hod a lállake a Zaqueo u ngahan na. Siya u puno nu mágsingeh hide ti buwes sakay tunay a yaman.

³ Gugusto na a ketan ti Jesus tán matengge na ni ti deya siya. Pero dipo tunay siya ti henggád sakay tunay a kákpal u tolay ay awan na ketan ti Jesus.

⁴ Kaya nágdipalongo siya a nagginan sakay ummunek tu kayo a sikomoro tánni ketan na ti Jesus a magtaleb hod.

⁵ Káttapat ni Jesus tu kayo ay timmangad siya sakay kinagi na nikuna, “Zaqueo, umogsad ka dipo tumulusák nadid tu bilay mo.”

⁶ Kaya nagalalisto siya a immogsad sakay grabi u saya na a nangtanggap ni Jesus tu bilay na.

⁷ Nikuna ketan itod nu tolay hide ay nágganasasan hide a atanan, kinagi de a, “Maktulos siya ti makasalanane a tolay!”

⁸ Timmaknág ti Zaqueo sakay kinagi na, “Panginoon, iyatád ko tu mágkahirap hide u kalahate nu kabiyagen ko. Sakay ni deya man u nadaya ko ay pumen-áppat ko a bayadan.”

⁹ Sakay kinagi ni Jesus nikuna, “Dimmemát nadid u kaligtasan ti sabilayan iye dipo te patunay a itolayan iye ay lahe labe ni Abraham.

¹⁰ Dipo u Anak nu Tolay ay immangay he tánni ehyukán sakay iligtas u nágketawtaw hide.”

U Talinhaga tungkul tu Pilak a Ginto

¹¹ Mentaras a mágsaneg u tolay hide ay insaysay na u essa pa a talinhaga. Dipo adene dán hide ti Jerusalem sakay u akala nu tolay hide ay magsapul dán u pághare nu Diyos.

¹² Kaya kinagi na, “Te essa a lállake a mayaman a immangay tu adeyo a lugar para magin hare sakay nagsole labe tu banuwan na para maghare.

¹³ Pero bagu siya limmakad ay dinulawan na u sapulo na hide a utusan. Inatádden na hide ti tatággessa de a pilak a ginto. Sakay kinagi na nide, ‘Inigosyo moy pala hanggan tu kássole ko.’

¹⁴ Pero u kabanuwanan na hide ay inadiyan de siya, kaya nangutus hide ti angay mangkagi tu pinaka-mataas a puno nu banuwan a umád di siya a magin hare de.

¹⁵ Pero nagin hare padi siya, Nikuna makasole dán siya ay pinadulaw na u utusan na hide a inatádden na ti pilak a ginto, tánni matukuyan na ni sangan u ganansiya de.

¹⁶ Immadene nikuna u dipalongo sakay kinagi na, ‘Panginoon, u pilak mo a ginto ay nakaganansiyaák ti sapulo a pilak a ginto.’

¹⁷ Kinagi na nikuna, ‘Malalake ka a utusan, sakay mabait ka a utusan! Dipo matapat ka tu badit a bagay kaya pamunuwán taka tu sapulo a banuwan.’

¹⁸ Immadene be u kaduwwa, kinagi na, ‘Panginoon, u pilak mo a ginto ay nakaganansiyaák be ti limma.’

¹⁹ Kaya kinagi na nikuna, ‘Pamunuwan mo u limma a banuwan.’

²⁰ Káttapos nu kaduwwa ay immadene be u essa pa a utusan, sakay kinagi na, ‘Panginoon, sadánnáy u pilak mo a ginto. Binalutan ko ti panyo sakay intagu ko.

²¹ Dipo mantingák biyaybe niko dipo tukoy ko a tunay ka ti kahigpit; alapán mo u bakán mo a kao, sakay áaniyán mo u bakán mo a inmula.’

²² Kinagi nu hare nikuna, ‘Madukás ka a utusan! Hatulan taka tu kinagi mo. Tukoy mo bál a mahigpiták, áalapán ko u bakán ko a kao sakay áaniyán ko u bakán ko a inmula!

²³ Bakin awan mo indátton tu bangko i pilak kuwe? Tánni tehhodák a ganansiya tu kássole ko.’

²⁴ Káttapos ay kinagi nu hare tu atanan a katoy hod, ‘Alapán moy nikuna u pilak a ginto sakay iyatád moy tu tehhod a sapulo.’

²⁵ Pero kinagi di nikuna, ‘Panginoon, bakin iyatád tam nikuna, tehhod dán siya a sapulo a pilak a ginto?’

²⁶ ‘Tandaan moy iye: ni deya u tapat tu neatád nikuna ay madagdagan pa itod ti makpal. Pero ni deya man, u awan tapat ay maski u badit a katoy nikuna ay mawan pa itod nikuna.’

²⁷ Kinagi na pa, ‘Konna be tu kadima ko hide a umád nikán a maghare nide ay iyangay moy he hide sakay bunuwán ti atubang kuwáy!’”

Pinure de ti Jesus nikuna Adene dán Siya ti Jerusalem

²⁸ Káttapos na a nággistorya ay nágdipalongo dán siya a patamo ti Jerusalem.

²⁹ Nikuna adene dán siya ti Betfage sakay ti Betania, tu buked a ngángngahanan de a Buked nu Olibo hide ay pinágdipalongo na u duwwa na a disepulus.

³⁰ Kinagi na nide, “Angay kam tu sumunud a baryo. Kássáddáp moy hod ay ketan moy u essa a bul-o a asno a umáegut, awan palla iye nasaka-sakayan. Okbisán moy sakay iyangay moy he.

³¹ Ni te magtanung nikam ni bakin okbisán moy ay kagiyán moy, ‘Kailangan iye nu Panginoon.’”

³² Kaya naglakad dán u inutusan na hide sakay netan di ngane u asno a konna tu kinagi nide ni Jesus.

³³ Mentaras a okbisan de u asno ay tinanung hide nu makákkao, “Bakin okbisán moy bul-o miye a asno?”

³⁴ Kanya timmábbeg hide, “Kailangan iye nu Panginoon.”

³⁵ Inyangay de tu kán Jesus u asno sakay sinapinan de u adág nu asno tu alikab-kab sakay pinasakay de ti Jesus.

³⁶ Mentaras a mágsakay siya a patamo ti Jerusalem ay inlatag nu tolay hide u dami-damit de tu paglakadán na.

³⁷ Nikuna padegson dán siya tu Buked nu Olibo hide ay nagpákhawan u atanan nu disepulus na hide dipo tu saya de. Sakay nagsapul dán hide a magpasalamat tu Diyos dipo tu atanan a makataka-taka a bagay a netan de a ginimet ni Jesus.

³⁸ Kinagi de, “Puriyán u Hare a mágdadedemát tu ngahan nu Panginoon! Puriyan u Diyos dipo te kapayapaan ti langet!”

³⁹ Kinagi nikuna nu sangan a Pariseo hide a kaguman tu kákpalan, “Maisto, sawayán mupay i disepulus muwe hide.”

⁴⁰ Timmábbeg ti Jesus, “Kagiyán ko nikam, ni mara tumahimik hide ay u bito dán u lumewas a magpákhaw ti papure.”

Nagsanget ti Jesus dipo tu Habag na tu Taga-Jerusalem hide

⁴¹ Nikuna adene dán siya ti Jerusalem ay nagsanget siya nikuna matan-aw na u banuwan dipo kagbiyan na u tolay hide hod.

⁴² Kinagi na, “Ni ányaán ku pala ay matukuyan moy nakwa ni ánya makapangatádday nadid nikam ti kapayapaan! Pero awan kam la ti nangmala-malayan.

⁴³ Dipo dumemát u aldew a palebutan kam nu kadima moy hide ti banuwan moyáy sakay bantayan dikam ti husto tánni awan kam makaluwa-luwas sakay lusubán di kam.

⁴⁴ Puksaán di kam pate u anak moy hide, awan hide ti ibuha-buhay. Maski u bito hide tu banuwan moy ay awan manatili tu date na a pappagyanan, dipo awan moy pinospos u káddemát nu Diyos a mángligtas nikam.”

U Pangpalakad ni Jesus tu magtinda hide Templo

⁴⁵ Nadid, simmáddáp ti Jesus tu Templo sakay pinalakad na u atanan a maglako hod.

⁴⁶ Kinagi na nide, “Sumássulat, ‘U bilay ko ay nginahanan de a bilay a págdasalan.’ Pero ginimet moy a bilay nu mágtakaw hide.”

⁴⁷ Sakay aldew-aldew ay nagtoldu siya tu Templo. Gusto siya a ipabuno nu puno nu saserdote hide, nu maisto hide nu Kautusan sakay u ama-amaan hide tu banuwan.

⁴⁸ Pero awan hide ti netan a paraan ni kodya di siya a mabuno, dipo atanan a tolay ay taimtim a mágsaneg nikuna.