Lukas 15 - U Maganda A Baheta Ni Jesu-Cristo

U Nawan a Tupa

¹ Essa a aldew u mágsingeh hide ti buwes sakay u agum pa hide a inturing a makasalanan ay immadene ni Jesus para mágsaneg.

² Nágganasasan u Pariseo hide sakay u maisto hide nu Kautusan, kinagi de, “I tolayan iye ay mákpággagum tu makasalanan hide sakay mákpággatubang nide a kuman.”

³ Dipo hod ay kinagi ni Jesus nide i talinhagaan iye,

⁴ “Ni u essa nikam ay tehhod a datos a tupa sakay nawan u essa, ánya gimitán naay? Awan beman iwahák na u siyam a pulo ay ti siyam tu parang sakay ahyukán na u nawan hanggan metan na itod?

⁵ Ni ketan na dán ay masaya siya a mangbabákláy tu tupa para isole.

⁶ Káddemát na tu bilay ay akitán na u barkada na hide sakay u kadatig na hide a bilay sakay kagiyán na nide, ‘Mákpagsaya kam nikán, dipo netan ku dán u tupa ko a nawan!’

⁷ Kagiyán ko nikam, magkahod ti dakál a kasayaan ti langet dipo tu essa a makasalanan a nagsise nan tu siyam a pulo ay ti siyam a malinis a awan kailangan a magsise!”

U Nawan a Pilak

⁸ Kinagi pa ni Jesus, “Ni tehhod a sapulo a pilak u bábbey sakay nebut u essa, ánya wád i gimitán naay? Awan beman taban na u simbuwan sakay walisan na u bilay sakay pakaehyukán na hanggan ketan na itod?

⁹ Ni ketan na dán iye ay akitán na u barkada na hide sakay u kadatig na hide a bilay sakay kagiyán na nide, ‘Mákpagsaya kam nikán, dipo netan ku dán u nebut ko a silber a pilak!’

¹⁰ Kagiyán ko nikam, konna bi hod u kasayaan nu anghel hide nu Diyos dipo tu essa a makasalanan a immadág tu kasalanan na.”

U Naglayas a Anak

¹¹ Kinagi pa ni Jesus, “Te essa a tolay a tehhod a duwwa a anak a lállake.

¹² Kinagi nikuna nu dipos, ‘Amáng, iyatád mu dán nikán u manaán ko.’ Kaya hinate nu ama u ari-arian na nide a duwwa.

¹³ Kállipas nu sangan a aldew ay inlako nu dipos u namana na sakay immangay tu adeyo a lugar. Ginasta na hod u pilak tu awan hide ti pinagseserbiyan a bagay.

¹⁴ Nikuna maubus na dán u pilak na ay nagkahod ti matindi a sák-aláp ti lugaran itod, kanya naghirap siya.

¹⁵ Kanya simmáddáp siya a utusan tu essa a lállake a taga-hod. Pinaangay na siya tu uma na tánni magalaga tu babuy na.

¹⁶ Dipo tu aláp na, sakay awan be nikuna ti mangatád ti makan, ngahi-ngahe nadan a kanán u kákkanán nu babuy hide.

¹⁷ Pero napag-isip-isip na u ginággimet na hide kaya nakagi na tu sadile na, ‘U alipin nama ko ay awan magala-aláp nan lalabis pa u kanan de, pero hikán ay matayák dán he ti aláp!

¹⁸ Soliyák tu kán amáng sakay kagiyán ko nikuna, “Amáng, nagkasalaák tu Diyos sakay niko.

¹⁹ Awanák mu dán dapat a dulawán a anak mo; nan ibilangák mo dálla a essa tu alipin mo hide.”’

²⁰ Timmáknág siya sakay nagsole nama na. Adeyo pálla siya ay táttannawán dán siya nama na. Sakay kinagbiyan na siya ti husto kaya gumággenan siya a tummagbu, kinábkábban na sakay inammuwan na siya.

²¹ Sakay kinagi nu anak nikuna, ‘Amáng, nagkasalaák tu Diyos sakay niko. Awanák dán karapat-dapat a dulawán mo a anak mo.’

²² Pero dinulaw nu ama u alipin na hide, ‘Magalisto kam! Iyangay moy he u pinakamaganda a damit sakay isulot moy nikuna. Sulutan moy siya ti sángkalan sakay sapatus.

²³ Sakay alapán moy u pinatabiyan a dumalaga a baka sakay bunuwan ta kuman kitam sakay magsaya!

²⁴ Dipo akala ko ay natay dán i anak kuwan iye, pero biyag pabballa, nawan, pero netan bila.’ Kanya nagsaya hide.

²⁵ Nadid, u panganay ay katoy palla tu uma de, mentaras a pademát siya tu bilay ay nasaneg na u togtugan sakay sayawan.

²⁶ Dinulawan na u essa tu alipin de hide sakay tinanung, ‘Bakin a te kasayaan ti bilay?’

²⁷ Kinagi nu alipin nikuna, ‘Dimmemát u wadi mo! Kaya pinabuno nama mo u pinatabiyan na a baka a dumalaga, dipo nagsole siya a biyag sakay awan ti saket!’

²⁸ Pero nágngál u panganay sakay umád na dán a sumáddáp tu bilay de. Kanya limmuwas tama na sakay pinaha-paha na siya.

²⁹ Pero kinagi nu panganay, ‘Nagserbiyák niko ti makpal a taon sakay maski nikan ay awan taka sinuway. Pero maski ni pumensan ay awanák mo inatádden maskin essa a bul-o a kambing para pagkasayaan me ay tu barkada ko hide.

³⁰ Pero nikuna dimmemát u anak mo a nággagastaán tu kabiyagan mo hide tu pángngibábbey ay pinangbuno mo pa tu pinatabiyan mo a bul-o a baka!’

³¹ Timmábbeg tama na, ‘Anak ko, pirmi taka a kakaguman kaya atanan a kabiyagan ko ay kao mo.’

³² Pero dapat kitam a magsaya dipo u wadi mo a akala tam ay patay dan ay nagsole a huway, pero netan bila.”