Lukas 14 - U Maganda A Baheta Ni Jesu-Cristo

Pinagpiyya ni Jesus u Lállake a Limmábbeg

¹ Nadid, essa Aldew nu Káimang, inakit nu essa a puno nu Pariseo hide ti Jesus a kuman tu bilay na. Sakay áelingan nu komontara hide nikuna u ahikad na hide.

² Nadid tehhod a essa a lállake a limmábbeg a immadene ni Jesus.

³ Kaya tinanung ni Jesus u Pariseo hide sakay u maisto hide nu Kautusan, “Kontara beman tu Kautusan u magpapiyya tu Aldew nu Káimang oni awan?”

⁴ Pero awan hide ti dikákkagiyan, kanya tinawidan ni Jesus u te saket sakay pinagpiyya na sakay pinagsole na.

⁵ Sakay kinagi na nide, “Ni te anak kam oni baka a natákneg tu bal-ung, awan moy beman alapán maski Aldew nu Káimang?”

⁶ Awan hide nakatábbeg ti tanungan itod ni Jesus.

U Págpakababa sakay tu Págpalalo

⁷ Nahalata ni Jesus a páppiliyán nu naimbitaan hide u pággetnudan a nelaan tu marangal a tolay. Kaya kinagi na i talinhagaan iye,

⁸ “Ni inakit di ka tu kasalan ay dyan mo piliyán u pággetnudan nu mágkarangal hide a tolay, bakay ni te inakit pa hide a mas marangal nan hiko.

⁹ Dipo mepasanike kam la ni adeniyan kam nu nagakit nikam sakay kagiyán na nikam a, ‘Pággetnudán muped i tolayáy ti paggetnudan muwe!’ Kaya meangay ka pa tu pinakamababa a pággetnudan.

¹⁰ Pero ni tehhod niko a nangakit ay piliyán mo u pággetnudan a awan marangal tánni ni umadene u nangakit niko ay kagiyán na a, ‘Barkada, he kahe a mággetnod ti marangal lay a pággetnudan.’ Tánni ketan nu atanan a tolay a marangal ka.

¹¹ Dipo u palalo a tolay ay mebaba sakay u tolay a magpakababa ay melangkaw.”

¹² Kinagi nabe tu nangakit nikuna, “Ni mara maghanda ka ay dyan ka magakit tu barkada mo hide, u wáwwadi mo hide, u kákkapátkákka oni u magkayaman hide a kadatig mo a bilay, dipo akitán di kala be tánni magantiyan di ka.

¹³ Pero ni maghanda ka ti dakál a handaan, u akitán mo ay u magkahirap hide a tolay, u lumpo hide, u pilay hide, sakay u buhák hide.

¹⁴ Ni konna he u gimitán mo ay pagpalaan ka, dipo maski ni awan hide makagante niko, u Diyos u mangatád niko ti piremyo tu kákkabiyag a huway nu tolay hide a sumunud nikuna.”

U Talinhaga nu Dakál a Handaan

¹⁵ Nikuna masaneg itod nu essa a katubang di Jesus ay kinagi na, “Mapalad u makatubang tu lamisaan tu kahariyan nu Diyos!”

¹⁶ Pero timmabbeg ti Jesus nikuna, “Essa a lállake u naghanda ti grabi't kakpal a handa, sakay nagakit ti tuna't kakpal a tolay.

¹⁷ Nikuna dumemát dán u odas nu handaan ay inutusan na u utusan na hide. Iye u impekagi na tu inakit na hide a, ‘Kamon dán, nakahanda dán u atanan!’

¹⁸ Pero nagdahilan hide a atanan. Kinagi nu dipalongo, ‘Nakabaliyák ti araduwan, kailangan a angay ko itod ilingan. Pagpasensiyaanák moy dálla.’

¹⁹ Sakay kinagi be nu kaduwwa, ‘Nakabaliyák ti limma a paris a dáppog, kailangan ko a purbaan tánni matukuyan ko ni maganda hide a pagaradu. Pagpasensiyaanák moy dalla.’

²⁰ Sakay kinagi be nu essa, ‘Awanák makaangay dipo biguwák a kasal.’

²¹ Nagsole u utusan sakay imbaheta na iye tu amo na. Nágngál u amo sakay kinagi na tu utusan na, ‘Sigi alistuwan mo angay ka tu kakarsada sakay tu mágkapiit hide a dilan tu banuwan sakay ikuyog muhe u mágkahirap hide a tolay, u lopog hide, u buhák hide, sakay u pilay hide.’

²² Sakay kinagi nu alipin, ‘Ginimet kudán u kinagi mo, pero makpal palla a paggetnudan u awan ti maggetnod.’

²³ Kaya kinagi nu amo tu alipin, ‘Angay ka tu kakarsada sakay tu dila-dilan hide sakay pilitán mo a umangay he u deya man a ketan mo tánni maputát i bilay kuwáy.

²⁴ Kagiyán ko nikam, maski essa tu dipalongo ko hide a inakit ay awan makaeennam tu inhanda ko hide!’”

U Pagin Disepulus

²⁵ Nadid, nákkuyog ni Jesus u tuna't kakpal a tolay; immatubang siya nide sakay kinagi na,

²⁶ “Ni deya man u masoh a sumunud nikán. Pero mas mahal na tama na sakay tena na, kabanga, anak, wáwwadi sakay u sadile na a biyag ti mas higit nikán ay awan maare a magin disepulus ko.

²⁷ Ni deya man u umád a magkarga tu sadili na a kudus sakay summunud nikán ay awan maare a magin disepulus ko.

²⁸ Dipo ni te essa nikam a magbalak a magpabilay ti dakál, awan beman umetnod pa siya sakay kuwentaán na ni sa kodya u magastus na? Tánni matukuyan na ni tehhod siya a pilak a pangpatapos tu bilay na.

²⁹ Makay hanggan pundasyon la u medatton ay pagtawaan la siya nu atanan a maketa nikuna.

³⁰ Kagiyán de, ‘Sinapulan ni tolayan iye a magpabilay ti dakál pero awan labe netapos.’

³¹ Oni deya a hare u máklaban tu essa a hare u awan pa mággetnod para pagadalan ti husto ni u sapulo a libo na a sundalo ay melaban tu kalaban na a duwwa a pulo a libo a sundalo?

³² Sakay ni awan na kaya ay pagdaka a mangutus tu opisyal na hide a angay mákpagkasundu.

³³ Konna bi hod, awan maare a magin disepulus ko u maskin deya ni awan na adággen u atanan a katoy tu biyag na.”

U Matablal a Asen

³⁴ “Mahalaga u asen, pero ni tummablal dán ay awan dán iye mapaasen a huway.

³⁵ Awan dán iye mapakinabangan maskin ihalo pa tu págsapwagan para pataba. Kaya ibut dálla iye nu tolay hide. Magsaneg u tehhod a talinga!”