Lukas 11 - U Maganda A Baheta Ni Jesu-Cristo

Intoldu ni Jesus ni Kodya a Magdasal

¹ Nadid, ay nagdasal ti Jesus tu essa a lugar. Káttapos na ay kinagi nu essa tu disepulus na hide, “Panginoon, tolduwan mo kame ped a magdasal, konna tu ginimet ni Juan tu disepulus na hide,”

² kinagi na nide, “Ni magdasal kam ay konna he u kagiyán moy, ‘Ama, puriyán nakwa u banal mo a ngahan. Maghare ka nakwa nikame.’

³ Atádden mo kame nakwa ti makan me aldew-aldew.

⁴ Sakay patawadán mo kame tu kasalanan me hide, dipo pappatawadan mi be u nagkasala hide nikame. Sakay dyan mo kame pabayan a matokso.”

⁵ Sakay kinagi na nide, “Mara ni tehhod a immangay nikam a essa tu barkada moy hide tu bállog nu gibi sakay kinagi na, ‘Barkada, atáddinák mo ped pala ti tállo a tinapay.

⁶ Dimmemát biyay be u essa ko a barkada a gábwat tu lakad na, awanák ti mepakan nikuna!’

⁷ Sakay tumabbeg u barkada mo a katoy tu disalad nu bilay na ti konna he, ‘Dyanák pay istorbuwán! Nekalang dán i ganábbe sakay mágkatdug kame dán a samáttenaan. Awanák dán makaikat a mangatád niko ti kailangán muwe.’

⁸ Kagiyán ku nikam, maskin magbarkada pa hide ay awan siya umikat tan mangatad tu agidan mo. Pero dipo mamilit ka ay umikat bila siya tán mangatád maskin ánya u kailangan mo.

⁹ Kanya kagiyán ko nikam; agidán moy tu Diyos u kailangan moy tánni atádden nakam: magehyok kam tánni maketa kam. Magtoktok kam tánni bukasan kam.

¹⁰ Dipo u magaged ay magkahod, u magehyok ay maketa, sakay ni deya man u tumoktok ay mabukasan.

¹¹ Hikam a ama hide, ni mangaged ti ikan u anak moy ay atádden moy beman ti biklat?

¹² Oni mara mák-aged ti bunay, átadden moy beman siya ti ánnepet?

¹³ Ni hikamon a mágkadukás hide a tolay ay makabeto a mangatád tu mágkaganda hide a bagay tu anak moy, itod pa beman u Ama moy ti langet! Iyatád na u Banal a Ispirito tu mangaged hide nikuna!”

Bakán a Gábwat ni Beelzebul u Kapangyariyan ni Jesus

¹⁴ Tehhod a essa a lállake a pinabangngag nu essa a dimonyo. Nadid pinaibut ni Jesus u demonyo a dahilan nu kákkabulol nu essa a lállake, kanya nakapagupos dán siya kanya nagtaka u katolayan.

¹⁵ Pero kinagi nu agum, “Ti Beelzebul a pinuno nu demonyo hide u nangatád nikuna ti kapangyariyan a mágpalayas tu demonyo hide.”

¹⁶ Te agum be a masoh a mangpurba ni Jesus, kaya kinagi de a, “Mángpeta kapay ti makataka a bagay a mangpatunay a katoy niko u Diyos.”

¹⁷ Pero tukoy na u áisipán de, kaya kinagi na nide, “U bawat kahariyan a awan ti pamágkaessa ay masida sakay konna bi hod u mangyare tu sabilay a mamágdadema.

¹⁸ Ni tehhod a gurupo a mamágdadema tu kaharian ni Satanas ay kodya iye a magtulos-tulos? Sakay kagiyán moy a nagpalayasák tu dimonyo hide tu pamamag-itan nu kapangyariyan ni Beelzebul.

¹⁹ Ni magpalayasák ti dimonyo tu pamamag-itan ni Beelzebul, deya be u mangatád ti kapangyariyan tu disepulus moy hide a makagimet ti konna hod? Hide dán be u mángpatunay a talaga mali kam.

²⁰ Pero ni magpalayasák tu demonyo hide ta dipo tu kapangyariyan nu Diyos, iye u mangpatunay a dimmemát dán nikam u pághare nu Diyos.

²¹ Mara ni tehhod a essa a tolay a mabegsák a magbantay tu bilay na sakay kompleto ti armas ay talaga a awan ti makaalap tu kabiyagen na hide.

²² Pero ni kalabanan sakay taluwán siya nu mas mabegsák nikuna ay alapán na u armas a áasaan na hide a pangdipensa pate u kabiyagen na hide sakay ipagatád na iye hide.

²³ U awan mákkaguman nikán ay kontara nikán. U tolay a awan tumulung a pisanán u tolay hide ay siya u máng-adeyo tu tolay hide nikán.”

U kássole nu Madukás a Ispirito

²⁴ Sakay kinagi pa ni Jesus, “Ni lummuwas dán tu baggi nu essa a tolay u madukás a ispirito ay máglalebután dán itod tu lugar a awan ti dinom. Sakay magehyok ti imangan na. Ni awan siya ti ketan ay kagiyán na tu sadile na, ‘Soliyák tu ginábwatan ko a bilay.’

²⁵ Sakay ni demáttan na a malinis sakay maayus u bilay ti kássole naan itod,

²⁶ ay lumuwas siya a huway sakay magakit pa ti pitto a ispirito a mas madukás pa nan siya. Sumáddáp hide ti tolayan itod sakay mágyan hod. Kaya mas lalo pa a dumukás u kalagayan ni tolayan itod.”

U Tatahodan a Mapalad

²⁷ Mentaras a magupos ti Jesus ay te bigla a pimmákhaw a bábbey tu kákpalan sakay kinagi na nikuna, “Pinagpala u bábbey a náng-enak sakay nangpadakál niko!”

²⁸ Pero timmábbeg ti Jesus, “Mas mapalad u mágsaneg sakay sumássunud tu upos nu Diyos!”

Nangaged ti Makataka-taka a Bagay u Tolay hide

²⁹ Nikuna kummakpal dán u katolayan ay kinagi ni Jesus, “Grabi't dukás i tolayay nadid a panahun! Magaged hide ti makataka-taka a bagay pero awanák mangpeta nide. Tama dán tu makataka-taka a bagay a nangyare ni Jonas.

³⁰ Ni kodya a nagin tanda ti Jonas tu taga-Ninive hide ay konna bi hod u magin tanda nu Anak nu Tolay ti lahiyan iye.

³¹ Tu Aldew nu Pághatul ay tumaknág u Reyna a taga-abagatan, sakay hatulan na ilahe yan iye a dapat a maparusaan. Dipo gábwat siya tu suluk ni munduwáy pero immangay siya tánni mágsaneg tu karunungan ni Solomon; pero mas pa ni Solomon u katoy he!

³² Tu Aldew nu Pághatul ay tumaknág be u taga-Ninive hide tán kumontara ti lahiyan iye, dipo nagsise hide nikuna mangaral nide ti Jonas. Sanigán moy katoy he u mas mataas nan ti Jonas.”

U Demlag nu Essa a Tolay

³³ Sakay kinagi pa ni Jesus, “Awan ti tolay a magtab ti simbuwan sakay itagu na oni taklábban na tu págtakalan. Nan idátton na itod tu talaga a págdattonan tánni mademlagan u tolay a sumáddáp tu bilay.

³⁴ U mata mo u pinakangsimbu tu bággi mo. Ni maganda u pangileng mo ay mademlagan u bággi mo. Pero ni mahabuhab u pangileng mo ay madiham labe u bággi mo.

³⁵ Kaya pakasiguraduwán mu la, bakay u áakalaán mo a demlag a katoy niko ay kadiklámman bál.

³⁶ Dipo ni maganda u katoy tu isip mo ay awan ka maggimet ti madukás. Magdemlag iye a kumán a dáddemlagan nu essa a mademlag a simbuwan.”

Nágngállan ni Jesus u Pariseo hide Sakay u Maisto hide nu Kautusan dipo tu Madukás de a Gimet

³⁷ Nikuna matapos ti Jesus a nagtoldu ay inakit siya nu essa a Pariseo a kuman tu bilay na. Kaya nákkuyog siya sakay nákpággatubang tu lamisaan.

³⁸ Nagtaka u Pariseo nikuna ketan na ti Jesus a kimman a awan naguges tu kamát na.

³⁹ Kinagi nikuna nu Panginoon, “Hikam a Pariseo hide, áugisan moy u luwas nu baso sakay u penggan pero u puso moy ay makasadile sakay putat ti kadukássan!

⁴⁰ Awan kam ti tukoy! Awan beman u Diyos a nanggimet tu katoy tu luwas ay siya labe u nanggimet tu katoy tu disalad?

⁴¹ Kaya tulungan moy u magkahirap hide tu kailangan de tán magin malinis kam tu atubang nu Diyos.

⁴² Hikam a Pariseo hide ay kakagbi dipo maparusaan kam! Sássunudán moy u Kautusan nu Diyos a mangatád tu kasapulo a parte nu kabiyagen moy a konna tu mula-mula moy, sakay pangrikadu. Pero sa iye i nalimunan moyay a gimitán, u awan págdaya tu tolay hide sakay u tama a págmahal tu Diyos. Tama la a iyatád tu Diyos u parte na tu nabuhas moy, pero dyan moy kalimunan u mas mahalaga nan tu Kautusan.

⁴³ Kakagbi kam Pariseo hide! Dipo masássohán kam a umetnod tu pangbisita hide a pággetnudan tu sinagoga! Gugusto moy be a igalang dikam sakay batiyán tu matolay a lugar.

⁴⁴ Kakagbi kam! Dipo kumán kam a páglábbángngan a awan ti tanda kaya mágkagemmakan kam nu tolay hide a awan de mamalayan.”

⁴⁵ Kinagi nu essa tu maisto hide nu Kautusan, “Maisto, ti kinagi muwe ay pati hikame ay ininsulto mo.”

⁴⁶ Tinábbeg siya ni Jesus, “Kakagbi kam be maisto hide nu Kautusan! Páppadággiyan moy u tolay hide tu mágkahirap moy hide a Kautusan, pero mismo hikam ay awan moy hide tattulungan para sunudan i kautusanan iye.

⁴⁷ Kakagbi kam dipo hikam ay maparusaan! Dipo hikam i mággagimitánnay tu mágkaganda a páglábbángngan nu prupeta hide a binuno nu ninunu moy hide.

⁴⁸ Dipo ti ginimet moyan itod ay hikam labe i nagpatunayay a immayun kam tu ginimet nu ninunu moy hide, dipo hide u nangbuno tu prupeta hide sakay hikam be u nággimet tu páglábbángngan de.

⁴⁹ Iye be u mangpatunay a tatahoden u kinagi nu Diyos sigun tu Karunungan na, ‘Paangayán ko nide u prupeta sakay u disepulus ko hide a magtoldu tu tolay hide. Pero bunuwán de u agum sakay pasakitan de u agum.’

⁵⁰ Kaya u tolay hide nadid u maparusaan dipo tu pángbuno nu nuno de hide tu prupeta hide sapul lalangán i munduwáy,

⁵¹ sapul tu pángbuno ni Cain ni Abel hanggan ni Zacarias a binuno tu sállat nu Templo a págtutudan ti alay. Hikam a mabiyag nadid u maparusaan dipo tu ginimet de.”

⁵² “Kakagbi kam maisto hide nu Kautusan! Inatádden kam ti tungkulin a ipangaral u upos nu Diyos, pero awan moy la impangaral dipo awan kam maniwala nikuna nan bawalan moy pabe u tolay hide a masoh a maniwala.”

⁵³ Sakay limmakad ti Jesus ti lugaran itod. Sapul hod ay naiyamut dán nikuna u maisto hide nu Kautusan sakay u Pariseo hide. Tináttanung di siya tungkul tu sari-sare a bagay,

⁵⁴ tán madakáp de siya nite makagi siya a maare de a ibintang nikuna.