Lukas 1 - U Maganda A Baheta Ni Jesu-Cristo

U Pággalay

¹ Kagalang-galang a Teofilo, makpal dán u nagsikap a nagsulat tungkul tu ginimet ni Jesus nikuna a nákpágyan siya nikitam ti munduway.

² Insulat de u ayun tu intoldu nu tolay hide a naketa tu ginimet ni Jesus sapul tu sapul sakay nangaral tu upos nu Diyos.

³ Kanya inadal ko be ti husto u atanan a bagay tungkul ti nangyariyan iye hide, sinapul ko tu sapul na. Naisip ko a maganda be ni magsulaták ti essa a maayus a istorya para nikam

⁴ tánni lalu moy a matukuyan u tatahoden a intoldu nikam.

Imbaheta nu Anghel u Kákkeenak ni Juan a Mágbawtismo

⁵ Nikuna ti Herodes u hare ti Judea, tehhod a essa a saserdote a gábwat tu lahe ni Abias. U ngahan na ay ti Zacarias. U kabanga na a ti Elizabet ay gábwat be tu lahe ni Aaron.

⁶ Iye a magkabanga ay kinasayaan nu Diyos, sumássunud hide tu atanan a utus na.

⁷ Pero awan hide ti anak dipo baug ti Elizabet sakay parehas dán hide a matanda.

⁸ Essa aldew nikuna u gurupo dán ni Zacarias u limmewas a manungkulan tu templo ay ti Zacarias u nagserbi a saserdote tu atubang nu Diyos.

⁹ Sigun tu kaugalian nu saserdote hide ay nagbunutan hide. Nadid ti Zacarias u nabunut a magalay kanya siya simmáddáppay tu Templo nu Panginoon a Diyos a magtutod tu kamanyang.

¹⁰ Mentaras magalay ti Zacarias ay mamággipun-ipun be u tolay hide tu luwas nu Templo sakay magdasal.

¹¹ Pimmeta hod nikuna u anghel nu Panginoon a mágtaknág tu danág tu kawanan nu pággalayan ti kamanyang.

¹² Neántingan siya sakay nahákned tu pákketa na tu anghel.

¹³ Pero kinagi nikuna nu anghel, “Dyan ka manteng Zacarias! Sinaneg nu Diyos u dasal mo. Magenak u kabanga mo ati Elizabet ti essa a lállake. Juan i pángngahanan muway tu anak!

¹⁴ Pasayaán nakam a tahod sakay makpal be a masaya tu kákkeenak na,

¹⁵ dipo magin dakila siya tu pangileng nu Panginoon. Awan siya dapat a uminom ti alak oni ányaman a áinumán a makalasing. Sakay he palla siya tu tiyan nu ina na ay atádden dán siya ti kapangyariyan nu Banal a Ispirito.

¹⁶ Makpal tu lahe ni Israel u maakit na a máktawad tu kasalanan de sakay magsole hide tu Panginoon de a Diyos.

¹⁷ Mágdipalongo ti Juan tu Panginoon, u begsák sakay u kapangyariyan na ay konna ni prupeta a Elias, para pamágkasunduwán na a huway u ama, sakay u anak de hide. Pasoliyán na u tolay hide a masássuwayán tu Panginoon tu págsunud tu paraan a makasaya tu Diyos tánni makapaghanda hide tu káddemat nu Panginoon.”

¹⁸ Kinagi ni Zacarias tu anghel, “Kodyaák a makasigudu a mangyare iye? Lakayák dán sakay bakás dán be u kabanga ko.”

¹⁹ Timmábbeg u anghel, “Hikán ti Gabriel a mágserbi tu atubang nu Diyos. Pinaangayák na he para ikagi ko nikam i magandaáy a baheta.

²⁰ Pero dipo awan ka naniwala tu kinagi ko hide a matupad iye tu takda a panahun, ay awan ka makapagupos hanggan tu aldew a mangyare iye hide.”

²¹ Nadid nalay dán a mággauhayán tu luwas u tolay hide ni Zacarias. Nágtaka dán hide ni bakin tunay siya ti alay tu disalad nu Templo.

²² Kálluwas na ay awan dán siya makapagupos nan makánsinyasán dálla. Kaya inisip nu tolay hide a tehhod a impeta u Diyos a pangitain nikuna tu disalad nu Templo.

²³ Nikuna matapos dán u odas nu págserbi ni Zacarias ay nágsole dán siya.

²⁴ Awan ngane nágnalay ay naglihe ti Elizabet, sakay tu luub nu limma a bulan ay awan siya limmuwa-luwas tu bilay de.

²⁵ Kinagi ni Elizabet, “Nadid ay kinagbiyanák nu Panginoon. Inatáddinák na ti anak para awanák dán mepasanike tu katolayan!”

Imbaheta nu Anghel u Kákkeenak ni Jesus

²⁶ Nikuna kaannám dán a bulan nu páglihe ni Elizabet ay pinaangay nu Diyos u anghel a ti Gabriel tu banuwan a Galilea ti Nazaret, para kauhunán u

²⁷ essa a madiket a ti Maria. Nakatakda dán siya a ikasal ni Jose, iye a lállake ay gábwat tu lahe ni hare a David.

²⁸ Ummadene u anghel ni Maria sakay binate na, “Mágsaya ka dán! Kasayaan ka a tahod nu Diyos! Katoy niko u Panginoon!”

²⁹ Nabalisa a tahod ti Maria dipo tu kinagi nikuna nu anghel. Kanya pinakaisip na ti husto ni ánya u gusto na a kagiyán.

³⁰ Kinagi nikuna nu anghel, “Dyan ka la manteng Maria, ta kasayaan ka nu Diyos.

³¹ Mágsaneg ka! Magbuktet ka sakay magenak ti essa a lállake a anak sakay ngahanan mo siya a Jesus.

³² Magin dakila siya sakay dulawán de siya a Anak nu Kataasan a Diyos. Iyatád nikuna nu Panginoon a Diyos u pagkahare nu nuno na a ti hare David tán

³³ maghare siya tu lahe ni Jacob hanggan-hanggan. U pághare na ay awan ti kahád.”

³⁴ “Kodya iye a mangyare nikán, madikiták palla?” kagi ni Maria.

³⁵ Timmábbeg u anghel, “Angay niko u Banal a Ispirito sakay lenduman ka nu kapángyariyan nu Diyos. Dipo ti iye, u iyenak mo ay banal sakay dulawán siya a Anak nu Diyos.

³⁶ Awan beman baug u pensan mo a ti Elizabet? Pero nadid ay naglihe dán siya maski ni bakás dán, kaánnam na dán ngane nadid a bulan a mabuktet,

³⁷ dipo kaya a gimitán nu Diyos u atanan a bagay.”

³⁸ Timmábbeg ti Maria, “Alipinák nu Panginoon, mangyare nakwa nikán u atanan a kinagi mo.” Káttapos ay nilakaden dán siya nu anghel.

Bummisita ti Maria ni Elizabet

³⁹ Sumangan a aldew tu kállakad nu anghel ay nagalalisto ti Maria a immangay tu mabuke-buked a banuwan ti Juda.

⁴⁰ Káddemát na tu bilay di Zacarias ay kinumusta na ti Elizabet.

⁴¹ Nikuna masaneg ni Elizabet u pángngumusta ni Maria ay bigla a nagahikád u anak tu tiyan na sakay naputat siya ti Banal a Ispirito.

⁴² Nepákhaw siya tu saya na, “Pinagpala ka tu kabábbiyan sakay pinagpala be u kátna ti tiyan muwe a anak!

⁴³ Deyaák beman para bisitaán nu ina nu Panginoon ko?

⁴⁴ Tu pákkasaneg ko tu kumusta mo ay mággaahikadán u anak ti tiyan kuwáy dipo tu saya na.

⁴⁵ Pinagpala ka ta naniwala ka a mangyare niko u impekagi nu Panginoon.”

U Kansiyon a Págpure ni Maria

⁴⁶ Káttapos ay nagpuri ti Maria kinagi na, “Tunay págpure kuwáy niko Panginoon a Diyos.

⁴⁷ Sakay tunay be i saya kuwáy dipo tu Diyos a Tagapagligtas ko.

⁴⁸ Dipo awanák pinabayan nu Panginoon maski ni mababaák la a utusan! Sapul nadid ay dulawanák nu atanan a tolay a pinágpala.

⁴⁹ Dipo dakila u Diyos, kanya makpal a mágkaganda a bagay u ginimet na tu biyag ko. Malinis siya!

⁵⁰ U kagbi na ay para tu atanan tolay sakay tu atanan a lahe a tehhod a ánteng nikuna.

⁵¹ Impeta na u kapangyariyan na, kaya pinagwatak-watak na u hambug hide.

⁵² Inibutan na u hare hide tu pághare de, sakay inlangkaw na u mágkababa hide.

⁵³ Binássog na ti mágkaganda a bagay u mágkahirap hide, sakay pinalakad na u mágkayaman hide a awan ti tawed maski ni ánya.

⁵⁴ Tinupad na u pananto na tu nuno tam hide. Tinulungan na u banuwan na a Israel dipo makákkagbiyán siya.

⁵⁵ Dipo inpananto na tu lahe ni Abraham a kagbiyan na hide hanggan-hanggan.”

⁵⁶ Nágyan pa ti Maria tu kád Elizabet ti tállo a bulan bago siya nagsole.

U Kákkeenak ni Juan Bautista

⁵⁷ Nikuna a bulan dán ni Elizabet ay nagenak siya ti lállake a anak.

⁵⁸ Tunay u saya nu kadatig de hide a bilay sakay u kákkapatkákka de hide nikuna a mabaheta de a pinagpala siya nu Panginoon, sakay nákpagsaya hide nikuna.

⁵⁹ Tu kasasimba dán nu anak ay pinature de. Gusto nakwan nu kákkapatkákka de hide a ingahan u anak tu ama na a ti Zacarias.

⁶⁰ Pero kinagi ni Elizabet, “Bakán a Zacarias nan Juan i pángngahanan tamay nikuna.”

⁶¹ Kinagi de, “Maski essa man ti kákkapatkákka moye hide ay awan ti ngahan a konna hina.”

⁶² Kanya sininyasan de u ama na sakay tinanung di siya ni ánya i pángngahan naay tu anak.

⁶³ Kanya nák-aged ti Zacarias ti pagsulatan sakay insulat na a, “Juan i ngahan naay.” Kanya nahákned hide a atanan.

⁶⁴ Ti itod be a odas ay nakapagupos a huway ti Zacarias sakay napuri tu Panginoon.

⁶⁵ Neántingan u atanan a tagahod sakay nebaheta tu mabuke-buked a lugar ti Judea u tungkul tu nangyare di Zacarias sakay ti Elizabet.

⁶⁶ Atanan nu nakasaneg ti iye ay nággisip-isip tu nangyare sakay kinagi de, “Ánya wád i mangyariyay ti anakáy káddakál na?” Magin dakila siya dipo u Panginoon ay pirmi nikuna.

U Kansiyon ni Zacarias

⁶⁷ Naputat ti Banal a Ispirito ni Zacarias a ama nu anak sakay naghula ti mensahe a gábwat tu Diyos,

⁶⁸ “Puriyán u Panginoon a Diyos nu Israel. Dipo immangay he siya ti lutaáy para palayaán sakay iligtas u anak na hide.

⁶⁹ Nangatád nikitam u Panginoon ti makapangyariyan a tagapagligtas, a gábwat tu lahe ni hare a David a tagapagserbi na.

⁷⁰ Iye ay sigun tu inpananto na tu itod pa tu pamamag-itan nu prupeta na hide a malinis,

⁷¹ a iligtas na kitam tu atanan a kadima tam, sakay tu atanan a maiyamut nikitam.

⁷² Nagpananto bi siya a kagbiyan na u nuno tam hide, sakay awan na kalimunan u kasunduwan de a banal.

⁷³ Inpananto na iye a kasunduwan tu nuno tam a ti Abraham,

⁷⁴ a iligtas na kitam tu kadima tam hide, tánni makapagserbi kitam nikuna a awan ti ánteng.

⁷⁵ Makapagserbi kitamon a te malinis a biyag tu pangileng nu Diyos mentaras a katoy kitam palla ti lutaáy.

⁷⁶ Sakay hiko Anak ko ay dulawán de a prupeta nu Kataas-taasan a Diyos a makapangyariyan tu atanan; dipo hiko i mángdipalonguway a mánghanda tu paglakadan nu Panginoon,

⁷⁷ sakay itoldu mo u kaligtasan tu tolay na hide, tu pamamag-itan nu págkahod ti kapatawaden nu kasalanan de hide.

⁷⁸ Mapagmahal sakay makákkagbiyán u Diyos tam. Dipo tu kagbi nu Panginoon nikitam ay immangay he a konna tu kássikat nu aldew.

⁷⁹ Tán mademlagen u katoy hide tu kadiklámman sakay u nágkatay dán ti kasalanan, Igiyya na kitamon patamo tu kapayapaan.”

⁸⁰ Sakay dimmakál u anak a tehhod a mabegsak a ispirito a gábwat tu Diyos. Nágyan siya tu parang hanggan tu aldew a pimmeta siya tu taga-Israel hide.