Filemon 1 - U Maganda A Baheta Ni Jesu-Cristo

¹ Iye a sulat ay gábwat nikán a ti Pablo, a pumáppireso dipo tu pángpakapospos ko tu Panginoon tam a ti Jesu-Cristo. U kapátkákka tam a ti Timoteo u kaguman ku he. I sulat miyan iye ay para niko, Filemon, a mahal mi a kaguman tu gawain nu Panginoon.

² I sulatan iye ay para be tu kapatkákka tam a babbey a ti Apia, sakay ti Arquipo a kapareho tam a sundalo ni Cristo, Sakay para be tu mánnampalataya hide a mágsimba tu bilay mo.

³ Pagpalaán kam nakwa sakay atádden nu Diyos a Ama tam sakay nu Panginoon tam a ti Jesu-Cristo ti kapayapaan.

U Págmahal sakay Pánniwala ni Filemon

⁴ Pirmiyák a magpasalamat tu Diyos kada ipagdasal taka,

⁵ dipo nabaheta ko a dakál u págmahal mo tu atanan a mánnampalataya hide, sakay nanalig ka ti husto tu Panginoon Jesus.

⁶ I dasal ku la a mas lalo mu pa a ipakapospos tu agum u pánnampalataya mo. Tánni lumagu u pang-unawa mo tu atanan a mágkaganda a bagay a neatád nikitam dipo he nikitam ti Cristo.

⁷ Dipo tu págmahal mo, kapatkákka a Filemon, ay nasayaák sakay napabegsákkák. Dipo be niko ay napabegsák u mánnampalataya hide.

U Pákkekakagbi ni Pablo ni Filemon

⁸ Nadid, bilang apostol ni Cristo, ay maare taka a utusan tu dapat mo a gimitán;

⁹ pero dipo mahal taka bilang kapátkákka ko, kaya mákkekakagbiyák dálla niko. Hikán ti Pablo, a matanda dan sakay nadid ay pumáppireso pa dipo ni Cristo Jesus.

¹⁰ Mákpágguhunák niko para tu anak ko a ti Onesimo, siya u nagin anak ko ti pánnampalataya mentaras a hedák ti piresuwanáy.

¹¹ Tu itod ay awan ka ti pakinabang nikuna, pero nadid ay dakál dán u metulung na nikita a duwwa.

¹² Pasoliyán ku dán niko ti Onesimo, maski ni ikalungkut ku iye ti husto a kumán a u ipatawed ko niko ay i puso kuwáy.

¹³ Gusto ko nakwa a mágyan pala siya nikán, mentaras a pumáppiresuwák dipo tu Maganda a Baheta. Tánni tu pamamag-itan ni Onesimo ay makatulung ka nikán.

¹⁴ Pero awan ko itod gimitán ni awan ka ti pahintulut, dipo u gustu ko ay u kusang-luub a págtulung mo nikán bakán a napilitan kala.

¹⁵ Palagay ko nehiwalay niko ti Onesimo ti sabadit a panahun tánni tu kássole na hina niko, ay makaguman mo dán siya hanggan-hanggan.

¹⁶ Bakán dán a alipin nan essa dán a pinakamamahal a kapatkákka. Nepamahal dán siya nikán, pero mas lalo dán niko, bakán la a essa alipin nan kapatkákka mupa tu Panginoon.

¹⁷ Kaya ni talaga a inturingák mo a tunay mo a kaguman tu págserbi, ay tanggapán mo ti Onesimo a konna tu págtanggap mo nikán.

¹⁸ Ni tehhod siya a ginimet a madukás niko oni te utang siya, ay singihán mu dálla nikán.

¹⁹ Hikán a ti Pablo i nángsulatay he, hikán i mangbayaday tu ányaman a utang ni Onesimo niko. Pero ni tuusán ay utang mu be nikán u pákkatenggi mo ni Cristo.

²⁰ Kaya kapátkákka, pagustuwanák mu pay ti kagiyán kuwáy alang-alang tu Panginoon. Pasayaánnák pay bilang kapatkákka mo ni Cristo.

²¹ Nagsulaták niko dipo te tiwalaák a pagustuwanák mo ti kagiyán kuwáy. Tukoy ko a mas pa u gimitán mo nan tu impákkekagbi ko.

²² Sakay pánghandaák mo be ti tulusan ko dipo umasaák a sanigan nu Diyos u dasal mo a makasoliyák hina para bisitaán taka.

U Pangdimodyan a Pákkumusta

²³ Kumusta kan, kagi ni Epafras a kaguman ko a pumáppireso dipo ni Jesu-Cristo.

²⁴ Mákkumusta be di Markos, Aristarco, Demas sakay ti Lukas a kaguman ko tu gawain.

²⁵ Págpalaán kam nakwa nu Panginoon tam a ti Jesu-Cristo.