3 Juan 1 - U Maganda A Baheta Ni Jesu-Cristo

¹ Hikán a Tagapangasiwa u nagsulat ti iye. Iye a sulat ay para tu pinakamamahal ko a amigu a ti Gayo.

² Mahal ko a Gayo, idáddasal ko a hod ka nakwa ti maganda a kalagayan sakay maganda a pámmamággi a konna tu tukoy ko a maganda mo a biyag a ispirituwal.

³ Masayaák a tahod nikuna dimmemát u agum tam a kákkapatkákka sakay imbaheta de nikán a tapat ka tu tatahoden sakay talaga a nabiyag ka ayun ti iye.

⁴ Awan dán ti agum a mas makapangpasaya nikán ni mabaheta ko a nabiyag a ayun tu tatahoden u anak ko hide ti pánnampalataya.

Pinure ti Gayo

⁵ Mahal ko a amigu, u págserbi mo tu kákkapatkákka tam hide sakay maski u awan mo hide matenggi ay nangpatunay a matapat ka.

⁶ Ibábbaheta de ti simbaanáy u tungkul tu págmahal mo. Nakwa tulungan mo hide tu kailangan de tu páglakbay de tu paraan a makasaya tu Diyos.

⁷ Dipo inwahak de u banuwan de para magbaheta tu Maganda a Baheta tungkul ni Cristo. Sakay awan de ugale a tumanggap maski ánya man a tulung tu awan hide mánnampalataya tu Diyos.

⁸ Dapat tam hide a tulungan tánni makatulung kitam nide tu págpakalat de tu tatahoden a toldu.

Ti Diotrefes sakay ti Demetrio

⁹ Nagsulaták tu mánnampalataya hide pero awan pinahalagaan ni Diotrefes u kinagi ko; dipo u gusto na ay siya u tenggiyán a puno.

¹⁰ Kanya káddemát ko hina ay iluwas ko u atanan a ginággimet na: u kakabuliyan a kinákkagi na a kontara nikame. Sakay awan padi siya nakontento ti itod, nan awan na pa tanggapán u kákkapatkákka tam a dummemát. Sakay bawalan na pa u masoh hide a mangtanggap nide. Sakay awan na dán hide pakultadan a mákpagipun-ipun tu kákkapatkakka hide ti pánnampalataya ni Cristo.

¹¹ Mahal ko a amigu, dyan mo ahigán iye hide a madukás a halimbawa. U ahigán mo ay u maganda, dipo u maggimet ti maganda ay anak nu Diyos; u maggimet ti madukás ay awan palla nakatengge tu Diyos.

¹² Maganda u kinagi nu kakpalan tungkul ni Demetrio sakay ketan tu matuwid na a kákkabiyag. Ina be u kákkagiyán me sakay tukoy mo a tatahoden iye.

Katapusan nu Sulat

¹³ Makpalák pa nakwa a kagiyán niko pero awan ko dán insulat.

¹⁴ Umasaák a awan dán magmalay ay magketa kita sakay magkauhon.

¹⁵ Magkahod ka nakwa ti kapayapaan. Kumusta ka kan kagi nu amigu tam hide he. Ikumustaák mo be tu atanan a amigu tam hina hide.