2 Corinto 5 - U Maganda A Baheta Ni Jesu-Cristo

¹ Nadid, tukoy tam a masida u bággi tam a luta a kumán a bilay a páppágyanan tam mentaras a katoy kitam palla ti munduwáy. Pero tukoy tambe a te inhanda u Diyos a para nikitam a bággi a panglanget. Iye ay awan mata-matay magpakahanggan dipo iye ay ginimet nu Diyos, bakán a ginimet nu tolay.

² Mágdadaingán kitam dipo gustu tamon a mapalitan u bággi tam ti bággi a panglanget.

³ Ni mabihisan kitamon ti iye a bigu a bággi, ay awan kitamon kedemáttan a uba.

⁴ Mentaras a hed palla nikitam u date tam a bággi, ay makán daingán kitam dipo tu kahirapan tam. Bakán a dipo gusto tamon a matay, nan dipo gusto tamon a mesulot u bigu a bággi, tánni u bággi a matay ay mapalitan ti bággi a awan mata-matay.

⁵ U Diyos be u nánghanda nikitam tánni tanggapán tam u bigu a bággi. U patunay ay inyatád na nikitam u Banal na a Ispirito.

⁶ Kaya pirme a mabegsák u pággisipan me maski ni tukoy me a mentras biyag kitam palla, ay awan kitam palla makasáddáp tu bilay a inhanda nu Panginoon.

⁷ Dipo mabiyag kitam ayun tu pánnampalataya tam tu Diyos, bakán a tu bagay hide a ketan.

⁸ Kaya awan kame panghinaan ti isip maski u gusto me ay iwahak dán i bággiyan iye tánni makaguman mi dán u Panginoon.

⁹ Kaya ngani, u pinakagugusto me ay makasaya kame tu Diyos, he man ti munduwáy oni ti langet.

¹⁰ Dipo atanan tam ay umatubang ni Cristo, sakay hatulan na u ginimet tam hide maganda man oni madukás, mentaras biyag kitam palla he ti munduáy. Tanggapán nu balang essa u karapat-dapat a hatul ayun tu ginimet na.

Nákpagkasundo tu Diyos tu Pamamag-itan ni Cristo

¹¹ Kaya ngani, dipo te ánteng kame tu Diyos, ay gimitán me u atanan para maakit me u tolay hide a sumole nikuna. Tukoy nu Diyos u tunay me a pagkatolay, nakwa ay tukoy moy kami be.

¹² Kinagi me iye nikam a huway, bakán a para ipagmadakál nikam i sadile miyáy, nan para atádden kam ti rason a mepagmadakál moy kame, tanni matábbeg moy u tolay hide a mangpuri la tu bagay hide a pangluwas bakán a u maganda a ugale.

¹³ Ni kumán kame man a nasidaan ti isip, alang-alang iye tu Diyos, sakay ni matino kami man ay para iye tu kapiyyaan moy.

¹⁴ U págmahal ni Cristo nikitam, ay ina u mangatád tu kasipag me a sumunud tu kaluuban na. Maniwala kame a natay siya para tu atanan a tolay. Kaya nadid, u atanan a tolay ay mebilang a natay.

¹⁵ Natay siya para tu kapiyaan nu atanan a tolay, tánni u atanan a biyag, ay awan dán mabiyag para tu sadile de, nan para ni Cristo, a natay sakay nabiyag a huway para nide.

¹⁶ Kaya nadid, u pangileng mi dán tu atanan ay awan dán neayun tu sukatan nu tolay hide a awan mangkilala tu Diyos. Tu itod ay konna hod u pákkatukoy me ni Cristo, pero nadid ay awan dán.

¹⁷ Kaya ni deya man u nákpagkaessa ni Cristo ay essa dán a bigu a nilalang. Awan dán u date na a pagkatolay; siya ay binagu dán.

¹⁸ Iye a atanan ay gábwat tu Diyos, a nángsole nikitam nikuna tu pamamag-itan ni Cristo. Sakay inyatád na nikame u tungkulin a mangpasole tu tolay hide nikuna.

¹⁹ Gusto ni iye a kagiyán, a tu pamamag-itan ni Cristo, ay pinagsole nu Diyos u tolay hide nikuna, imbilang na hide a amigu na, sakay nilimon na dán u kasalanan de hide. Impagkatiwala na nikame u págbahagi ti iye a baheta.

²⁰ Kaya hikame ay inutusan ni Cristo; a u Diyos a mismo u mákpágguhon nikam tu pamamag-itan me. Mákpágguhon kame nikam alang-alang ni Cristo; a magsole kamon tu Diyos.

²¹ Maski nikan ay awan nagkasala ti Cristo, pero dipo nikitam, ay nebilang siya a makasalanan tánni meturing kitam nu Diyos a matuwid tu atubang na tu pamamag-itan nu pákpágkaessa tam ni Cristo.