2 Corinto 2 - U Maganda A Baheta Ni Jesu-Cristo

¹ Kanya naisip ko a dyanák palla hina umangay ni makapagpalungkut la nikam i káangay kuwe hina.

² Dipo ni atádden takam ti kalungkutan, deya pa i mangpasayaay nikán? Awan beman hikam la be?

³ Kaya nagsulaták pa nikam. Tánni, káangay ko hina ay bakán dán a lungkut u iyatád moy nikán, nan hikamon u mangpasaya nikán. Dipo maniwalaák a u kasayaan ko ay kasayaan moy be.

⁴ Dipo nikuna sulatan takam, ay grabiyák ti lungkut sakay balisa, magtákták luwa kuwáy mentras magsulaták. Sinulatan takam bakán a para atádden ti kalungkutan nan para ipabate ko nikam ni sa kodya ti kadakál u págmahal ko.

Patawadán u Nagkasala

⁵ U essa hina a kapatkákka moy a nagkasala, bakán la a hikán u pinasakitan na. Bakán be a padakállán ko i bagayan iye, pero u tatahoden, hikam a atanan u pinasakitan na.

⁶ Pero sapat dán u págparusa a ginimet nikuna nu kakpalan nikam.

⁷ Kaya patawadán moy dán siya sakay tulungan moy siya a magin matatag tu pánnampalataya na tánni awan siya matuluyan a manghina ti isip dipo tu matindi a kalungkutan.

⁸ Kaya mákkekakagbiyák nikam a ipabate moy nikuna a mahal moy padi siya.

⁹ Dipo iye u dahilan ni bakin a nagsulaták nikam, para matukuyan ko ni sássunudán moy ti husto u atanan a impáppangaral ko.

¹⁰ Ni deya man u pinatawad moy ay pinatawad ko dán be. Ni nagpatawadák man tistigu ko ti Cristo a ginimet ko itod alang-alang nikam.

¹¹ Dapat la a magpatawad kitam tánni awan kitam malinlang ni Satanas. Dipo tukoy tam u plano na a madukás.

Mabalisa ti Pablo ti Troas

¹² Nikuna immangayák ti Troas para mangaral tu Maganda a Baheta tungkul ni Cristo, ay inatáddinák nu Panginoon ti maganda a pagkakataun para magimet ku itod.

¹³ Pero awanák labe ti kapayapaan dipo awan ko netan hod u kapatkákka ko a ti Tito. Kaya nagpaalamák nide sakay dummiretso ti Macedonia.

Nagtagumpay Dipo ni Cristo

¹⁴ Pero magpasalamaták tu Diyos dipo siya u mángdipalongo tu págserbi me ni Cristo kaya lagi kame a magtagumpay. Hádya kami man a umangay ay gamitán kame nu Diyos para ipakilala ti Cristo tu tolay hide iye ay mehalimbawa tu kákkalat nu masáppot a ahob.

¹⁵ Dipo konna kame tu masáppot a handug a iyáalay ni Cristo para tu Diyos. Sakay maahob iye nu nágkaligtas dán hide sakay tu mágkepahamak hide.

¹⁶ Tu mágkepahamak hide, iye ay essa a makatay a ahob, pero tu nágkaligtas dán hide, iye ay sáppot a mangatád ti biyag. Deya u tehhod a sapat a kakayanan a makagimet ti konna hina a págserbi?

¹⁷ Dipo awan kame konna tu agum a gággimitán de a negosyo u upos nu Diyos. Tukoy me a áelingán kame nu Diyos kaya bilang mánnampalataya ni Cristo sakay tagapagserbi nu Diyos, ay tapat kame a mangaral tu upos na.