1 Juan 5 - U Maganda A Baheta Ni Jesu-Cristo

Napagtagumpayan Tamon i Munduway

¹ Ni maniwala kitam a ti Jesus u Cristo a sinugu nu Diyos, ay anak kitam ngane nu Diyos. Sakay ni ti deya man u magmahal tu Ama ay magmahal be tu kapareho de a anak nu Ama.

² Sa iye u pakatukuyan tam a mahal tam u anak hide nu Diyos: Ni mahalán tam u Diyos sakay sunudán u utus na hide.

³ Dipo u tatahoden a magmahal tu Diyos ay u sumunud tu utus na hide. Sakay awan mahirap a sunudán u utus na hide,

⁴ dipo napagtagumpayan dán nu atanan a anak nu Diyos u mágkadukás a gimet ti munduway. Nagtagumpay kitam dipo tu pánnampalataya tam ni Jesu-Cristo.

⁵ Awan ti iba a magtagumpay tu mágkadukás a gimet ti munduway nan u maniwala la a ti Jesus ay Anak nu Diyos.

U Mágpatunay hide tungkul ni Jesu-Cristo

⁶ Ti Jesu-Cristo ay immangay ti munduwáy, nabawtismuwan tu dinom sakay timmuhog u digi na tu kákkatay na. Bakán la siya a nabawtismuwan tu dinom nan timmuhog pa u digi na. U Banal a Ispirito u mangpatunay a tatahoden iye, dipo u tatahoden la u katoy tu Banal a Ispirito.

⁷ Kanya tehhod a tállo a makapagpatunay a ti Jesu-Cristo ay Anak nu Diyos:

⁸ U Banal a Ispirito, u dinom sakay u digi. Nagkaessa i tállowan iye tu págpatunay de.

⁹ Ni maniwala kitam tu págpatunay nu tolay hide, ay dapat mas paniwalaan tam u págpatunay nu Diyos. Dipo siya mismo u nangatád ti tálluwan iye a patunay tungkul tu Anak na.

¹⁰ Ni ti deyaman u sumampalataya tu Anak nu Diyos ay maniwala ti iye a patunay. Ni ti deyaman u awan sumampalataya tu patunay nu Diyos ay ginimet na a mabule u Diyos. Dipo awan siya maniwala tu págpatunay na tungkul tu Anak na.

¹¹ Sa iye u patunay nu Diyos: Inyatád na nikitam u biyag a awan ti kahád, sakay matanggap tam iye tu pamamag-itan nu Anak na.

¹² Ni ti deyaman u nákpagkaessa tu Anak nu Diyos ay tehhod a biyag a awan ti kahád pero u awan hide nákpagkaessa tu nu Anak nu Diyos ay awan ti biyag a awan ti kahád.

U Biyag a Awan ti Kahád

¹³ Insulat ko iye nikam tánni matukuyan moy a u simmampalataya hide tu Anak nu Diyos ay tehhod a biyag a awan ti kahád.

¹⁴ Kaya awan kitam magalangan a umadene nikuna dipo tukoy tam a iyatád na u ányaman a agidán tam ni ayun iye tu kagustuwan na.

¹⁵ Ni tukoy tam a sanigán na kitam, tukoy tam be a iyatád na u ányaman a agidán tam nikuna.

¹⁶ Ni ti deyaman u maketa tu kapatkákka na a naggimet ti kasalanan a awan himmayun tu kákkatay ay ipagdasal na itod a kapatkákka tu Diyos a makapangatád nikuna ti bigu a biyag. Iye ay para tu kapatkákka hide a awan himmayun u kasalanan de tu kákkatay. Dipo tehhod a kasalanan a humayun ti kákkatay, pero awan ko kagiyán a ipagdasal moy u makán gimitán ti konna hod.

¹⁷ U atanan a madukás a gimet ay kasalanan pero te kasalanan a awan humayun ti kákkatay.

¹⁸ Tukoy tam a u anak hide nu Diyos ay awan tulos-tulos ti págkakasala, dipo bantayan hide ni Jesu-Cristo. Sakay awan hide maare a ahikadán ni Satanas.

¹⁹ Tukoy tam a anak kitam nu Diyos sakay tukoy tam be a u buo a mundo ay katoy tu kapangyariyan ni Satanas.

²⁰ Tukoy tam a immangay dán he u Anak nu Diyos sakay inatádden na kitam ti pággintendi tánni matukuyan tam u tatahoden a Diyos. Sakay katoy kitam tu tatahoden a Diyos, tu Anak na a ti Jesu-Cristo. Siya u tatahoden a Diyos sakay u Biyag a awan ti Kahád.

²¹ Anak ko hide, umadeyo kam tu diyos-diyosan hide.