1 Juan 4 - U Maganda A Baheta Ni Jesu-Cristo

Makilala u Ispirito a Gábwat tu Diyos

¹ Mahal ko a kákkapatkákka, dyan moy paniwalaan u balang magkagi a katoy nide u Ispirito nu Diyos. Nan subukán moy pa hide ni talaga a gábwat tu Diyos u Ispirito a katoy nide. Dipo makpal dán a liwat a prupeta ti munduwáy.

² Iye u pakatukuyan tam ni u Ispirito ngane nu Diyos u katoy nide: Ni kagiyan de a nagin tolay ti Jesu-Cristo.

³ Pero u awan magkagi ti konna hod tungkul ni Jesus ay awan nikuna u Banal a Ispirito nan u ispirito nu kontara ni Cristo u katoy nide. Nasaneg moy a pademát u kontara ni Cristo ti munduwáy sakay nadid ay atoy dán.

⁴ Anak ko hide, kao kamon nu Diyos sakay napagtagumpayan moy dán u liwat hide a prupeta. Dipo u Ispirito a katoy nikam ay mas makapangyariyan nan u ispirito a katoy ti munduway.

⁵ Makamundu hide, kanya makamundu labe u itoldu de hide sakay u kapareho di labe hide a makamundu u mágsaneg nide.

⁶ Pero kao kitamon nu Diyos kanya ni ti deyaman u tumenggi tu Diyos ay mágsaneg nikitam; pero awan mágsaneg nikitam u awan kao nu Diyos. Hed tam he a matukuyan ni tideya u magtoldu ti tatahoden a gábwat tu Ispirito nu Diyos sakay nitideya u magtoldu ti kakabuliyan a gábwat ni Satanas.

U Diyos ay Págmahal

⁷ Mahal ko hide a kákkapatkákka, magmahalan kitam dipo gábwat tu Diyos u págmahal. U magmahal tu kapatkákka na ay anak nu Diyos sakay tumengge tu Diyos.

⁸ U awan magmahal ay awan tumenggi tu Diyos, dipo u Diyos ay págmahal.

⁹ Impeta dán nu Diyos u págmahal na nikitam nikuna pinaangay na u kaessa-essa na a Anak ti munduwáy tánni magkahod kitam ti biyag a awan ti kahád tu pamamag-itan na.

¹⁰ Iye u tatahoden a págmahal: bakán a minahal tam u Diyos, nan hikitam u minahal na. Iye u dahilan kanya na he a pinaangay u Anak na tánni magin alay para tu kapatawaden nu kasalanan tam hide.

¹¹ Mahal ko hide a kákkapatkákka, dipo konna hod ti kadakál u págmahal nikitam nu Diyos, dapat magmahalan kitam be.

¹² Maski nikan ay awan palla ti naketa tu Diyos, pero ni magmahalan kitam ay katoy siya nikitam sakay magin ganap nikitam u págmahal na.

¹³ Tukoy tam a nákpagkaessa kitam tu Diyos sakay u Diyos ay nákpagkaessa be nikitam dipo inyatád na nikitam u Banal na a Ispirito.

¹⁴ Netan me sakay pinatunayan tu agum a pinaangay nu Ama u Anak na tán iligtas u tolay hide ti munduway.

¹⁵ U mángpahayag a ti Jesus ay Anak nu Diyos ay katoy tu Diyos sakay katoy be nikuna u Diyos.

¹⁶ Tukoy tam a mahal kitam nu Diyos, sakay pinagtiwalaan tam iye a tatahoden. U Diyos ay págmahal. U tolay a pirme a magmahal ay nákpagkaessa tu Diyos sakay nákpagkaessa be u Diyos nikuna.

¹⁷ U págmahal ay nagin ganap nikitam kanya awan tam kantingan u Aldew nu Pághukum. Dipo nabiyag kitam a konna tu kákkabiyag ni Cristo, maski katoy kitam palla ti munduway.

¹⁸ Awan ti kahalo a ánteng u págmahal, dipo u tatahoden a págmahal ay ibutan na u atanan a ánteng. Kanya ni deya man u manteng ay awan palla nikuna u tatahoden a págmahal. Dipo u ánteng ay kaguman nu parusa.

¹⁹ Magmahal kitam dipo u Diyos u dipalongo a nagmahal nikitam.

²⁰ Ni ti deya man u magkagi a “Mahal ko u Diyos” pero maiyamut labe tu kapatkákka na ay mabule. Dipo ni u kapatkákka na a ketan na dán ay awan na pa mamahal, kodya na a mamahal u Diyos a awan na ketan?

²¹ Sa iye u utus a inyatád nikitam ni Cristo: ni ti deya man u magmahal tu Diyos ay dapat be a magmahal tu kapatkákka na.