1 Juan 1 - U Maganda A Baheta Ni Jesu-Cristo

U Upos a Makapangatád ti Biyag

¹ Summulat kame nikam tungkul nikuna a tu sapul pa ay átna dán, u Upos a Makapangatád ti Biyag. Nasaneg mi siya, sakay netan me, namámmalas sakay natawiden.

² Nikuna a mehayag dán siya a makapangatád ti biyag ay netan mi siya, pinatunayan me sakay inpangaral me nikam a hod nikuna u biyag a awan ti kahád. Sapul pa tu sapul ay kaguman dán siya nu Diyos Ama sakay pimmeta siya nikame.

³ Inpakapospos mi ngane nikam u netan me sakay nasaneg tánni makaguman mikam tu pákpagkaessa me tu Ama sakay tu Anak na a ti Jesu-Cristo.

⁴ Insulat mi iye tánni magin tunay u kasayaan tam.

Mabiyag Ayun tu Demlag

⁵ Sa iye u nasaneg me tu Anak na sakay inpakapospos mi be nikam, u Diyos ay demlag sakay awan ti ányaman a kadiklamman nikuna.

⁶ Kaya ni kagiyán tam a nákpágkaessa kitam nikuna pero mabiyag kitam palla tu kadiklámman ay nagbuli-bule kitam sakay awan mabiyag ayun tu tatahoden.

⁷ Pero ni mabiyag kitam ayun tu demlag a konna tu Diyos a katoy tu demlag ay tehod kitam a pákpagkaessa tu balang essa. Sakay u digi ni Jesus a Anak nu Diyos u nanglinis tu atanan a kasalanan tam.

⁸ Ni kagiyán tam a awan kitam ti kasalanan ay lállokuwán tam la u sadile tam sakay awan nikitam u tatahoden.

⁹ Pero ni aminán tam tu Diyos u kasalanan tam hide ay siguradu a patawadán na kitam sakay linisan na kitam tu mágkadukás tam a gimet dipo siya ay matapat sakay matuwid.

¹⁰ Pero ni kagiyán tam a awan kitam nakagimet ti kasalanan ay ginimet tam a mabule u Diyos sakay awan ketan tu biyag tam u Upos na.