1 Corinto 5 - U Maganda A Baheta Ni Jesu-Cristo

U Parusa tu Makán Gimitán ti Madukás

¹ Nakademát nikán u baheta a essa kan nikam u naggimet ti madangát dipo inagum na u kabanga nu ama na. Maski u awan hide makidiyos ay awan di ina magimet.

² Sakay hambug kam palla! Dapat masanike kam sakay maglungkut. Paibután moy tu grupo u makán gimitán ti iye!

³ Maski awanák hina ay kátnaák labe hina ti ispirito, kaya kumánnák labe a katoy hina. Kaya u maggimet ti ina ay hinatulan ko dán

⁴ tu ngahan nu Panginoon Jesus. Ni mamággipun-ipun kam, kagumanák moy ti ispirito, sakay tu kapangyariyan nu Panginoon tam a ti Jesus,

⁵ iyatád moy ni Satanas i tolayan ina tánni mepahamak u bággi na sakay tán para maligtas u ispirito na tu Aldew nu Pághatul nu Panginoon.

⁶ Dyan kam magmadakál. Awan moy beman tukoy a u madukás a gimet ay kumán a u págpaalsa ti tinapay? Dipo maski ni badit la ay meahes u atanan.

⁷ Kanya ibutan moy dán u date a págpaalsa, u kasalanan tánni luminis kam. Tánni mepareho kam tu essa a bigu a namasa a awan ti págpaalsa. U tatahoden ay nalinisan kamon dipo nealay ti Cristo para nikitam. Konna siya tu tupa a iyalay kada aldew nu káttaleb.

⁸ Kaya ngane ipagsaya tam iye a Piyesta, pero bakán a tu pamamag-itan nu tinapay a te date a págpaalsa nan tu pamamag-itan nu tinapay a awan ti págpaalsa. U gusto a kagiyán niiye ay adággen tamon u kadukássan tam sakay kahalayan sakay mabiyag kitam ti malinis sakay tapat.

⁹ Nagsulaták nikam tu itod a dyan kam mákpággagum tu tolay hide a mangilállake sakay mangibábbey.

¹⁰ Bakán a u gustu ko a kagiyán ay adeyuwan moy u awan hide mánnampalataya a mággagimitán ti madukás, madadámmot, matakaw oni sumamba tu diyos-diyosan. Dipo ni adeyuwan moy u awan hide mánnampalataya ay kailangan moy a lumakad ti munduwan iye pero awan be maare.

¹¹ U gusto ko a kagiyán a awan moy pákkagumanan ay u makánkagiyán hide a Kristiyano pero mággagimitán labe hide ti madukás, madadámmot, sumamba tu diyos-diyosan, magsesti, máglalasingán, sakay mágtakaw. Dyan kam mamákkan nide.

^12-13 Sabagay, awanák ti karapatan a humatul tu awan hide Kristiyano; u Diyos u manghatul nide. Awan beman u kapatkákka moy ti pánnampalataya u dapat moy a hatulan? Konna he u kinagi nu Kasulatan, “Ibutan moy tu grupo u mággagimitán ti madukás.”