RASUL 9 - PERJANJIAN BARU NALCA YUBA

Saulus Be Ganya Dangawok Yuba

¹ Dara onoʾ al neik salek Saulus bera Wenelesilnya Yesus ak diriga ban nang ek yeiriwoka olosunun senen ganya boboka, yub adya lobaʾ nenellilisuk.

² Dara Saulus ganya enyek boboka, Yahudi yuba wa gakaʾ dubnya bek biniboka, Damsyik heikek Yahudi nim edya yuba don e dam nang amba, sikja nimi migiba geboka olosak momnya donaʾ anyek elegeinija enyek, Yesus ak dib senelemeija nang enyek, Damsyik heikek sam ulumeijaʾ ak eibnya dara, henga gouboka Yerusalem heikek bo yanasin senewoka dubnya bek molomok.

³ Wera seleb or unuwanalam hyek dara, Saulus bera Damsyik heikek bununaʾ aboka, heik berem lanal bok enyek, yok senenggom dilinaʾ era, imik ab sam ara, alja gokgobok nidyaʾ yeb ganagamok.

⁴ Wera danyek, Saulus bera sokok sam malyingginiboka, onoʾ imik ab sam yuba hnon alak, ”Saulus o, Saulus o, anda hekasa nak lobaʾ nenewoka olonelem do?” hyok.

⁵ Wera Saulus bedya, ”Neyung o, anda heknya do,” aboka heimok. Dara onoʾ adya Saulus bek lebok ara, ”Nara Yesus anja lobaʾ nenewoka olonelemnya bera nara alan,” hyok.

⁶ Dara on yub adya Saulus bek, ”Wera anda bukmenekanya, heikek men berra wekel bilom. Seleb bimen danyek, anak eimik era yokaʾ-yokaʾ anja unuwanalam ara neknenjak,” hyok.

⁷ Wera Saulus beblaboka neikaʾ balamek nang era, Saulus bek lelemok yub era, nong ara eilinaʾ orok bok, yuba dem adya ok lelemok anasa, loka daboka yuba mekaʾ doro sabnenggumek.

⁸ Wera Saulus bera sekoka henga gwelek sunumok bok, heng ubsalamok adya hyak okna dangamok. Anasa wera, yok nang edya Saulus bek soruka glibsalawoka, pika nekoka Damsyik heikek bo wekemek.

⁹ Wera onoʾ al Saulus bera li winilya henga ubsalamok dara, malamookanya, denaʾ ab, mek anaba mekaʾ denaʾ loboka mabmorumok.

¹⁰ Dara onoʾ Damsyik heikek ara Wenelesilnya Yesus yuba doro diriga balamoknya nimi si Ananias ben hnon ulumok. Dara, Ananias inimnek lendara mamok enyek, Wenelesilnya bedya alak lebokja, ”Wei Ananias o,” hyok dara, Ananias bedya, ”Wenelesilimnya o, nara an e,” hyok.

¹¹ Dara, Wenelesilnya bedya onoʾ alak lemokja, ”Anda al wene salek berra balom. Jong pikik, Yudas bedya ek ono bilom. Tarsus heikek ab Saulus alamaknya benyek anyagono ulumla gom aboka, nim ek heibnelam. Benera wera heng uboka Imik Neyung mololamla,” hyok.

¹² ”Al Saulus bera onoʾ lendara mamlakanya, Ananias alameknya benyek, Saulus bek yeiniboka, merewolulaʾ aboka alja heng ek soruka diyiwoka heng uboka Imik Neyung ak molomlaʾ ak eibdangamla,” hyok.

¹³ Bok Ananias bedya dara, ”Wenelesilimnya, o nara ban benesa nimi nauba alsamba, alja nimi munaʾ Imik Neyung mab Yerusalem heikek ara nauba oboka unulusil alamaknya bek anasa,” hyok.

¹⁴ ”Wen era, alda Yahudi yuba wa gakaʾ dub nang ek molowoka, Damsyik heik anja yuba dolomak nang ek heng geregosunun aboka yeililabok anasa lebna,” hyok.

¹⁵ Bok Wenelesilnya bedya Ananias bek, ”Anda or bilom e,” hyok. ”Nadya Saulus bek, nak aralenulul aboka, nadya yub enyek Yahudi gom nim ek hnon, mok soko dub nang ek hnon, alja mok nim Israeli nim ek hnon, leb elekdo yibilul aboka, nadya gaboka domna anasa, anda or alak bilom.

¹⁶ Dara nadya eimik era, Saulus bek nasamba leboka alak yokaʾ-yokaʾ nidyaʾ igina kwebnamla anyek elegoka aawanamna anasa, or bilom,” hyok.

¹⁷ Dara Ananias bera, Yudas bedya ek biniboka, Saulus bek soruka diyiwoka umok. Ananias bedya Saulus bek lebokaʾ ara, ”Hem Saulus o, ampum pikik yalamom danyek eiyimomnya Wenelesilnya Yesus bedya, nara anyagan yanamna adya anda merewoka, Imik Neyung Geisinya adya deknewanenggel anasa, wenyaboka alak bilom amla anasa yeilimna,” hyok.

¹⁸ Dara al wene sab-sab enyek, hadyaʾ hayaʾ anaso anyek, Saulus bedya hengek ab glob deboka yibiniboka, heng ara eikaʾ nong anyek onsok umok. Dara, Saulus mamok ara bukuk dara, meka damek.

¹⁹ Wera Saulus bera denaʾ debgogowok dara, onsok migib umok. Dara, Saulus bera Yesus yuba doro diriga ban nang eblaboka neikaʾ Damsyik heik ara li wen mabek.

Saulus Bedya Damsyik Heik Yuba Lelesuk Yuba

²⁰ Dara nenyek moruwoka, Yahudi nim edya yuba don e pik biniboka, nimi yok nang ek, Yesus ara aldib Imik Neyung bedya me dibaʾ aboka lel eleklesuk.

²¹ Saulus bedya wenyaboka yuba lelemok anyek, nimi nidyaʾ kemek dara, hyak loka dasuk. Dara sikda lelemek ara, ”Benedya Yerusalem heik ara, Yesus si ak dib senelemek nang oboka unggulusuknya de?” aboka lelemek. Dara onoʾ, ”Anyagan yeilimo anaba, anyagan ulumak yuba donaʾ nang enyek, heng gobuka yuba wa gakaʾ dub nang ek Yerusalem heik bo busunun aboka yanggumo de?” aboka lelemek.

²² Bok Saulus bedya lel yabok yub enyek, migib danggiga bok. Dara Saulus bedya, Yesus ara Kristus aldib nimi blebsinaʾ dubnya ulumla aboka Yesus adya yuba lel yabok dara Yahudi nang era, Damsyik heikek ulumek nang era, malya lelemla aboka yuba sanaʾ ara okna dabdosuk.

²³ Wera li gong wenebadya balamok dara, Yahudi nang edya, yuba saboka Saulus bek obnemab senewoka gegeb lobek bok,

²⁴ Saulus bera, alak obnemab senewekaʾ ara seleb kesuk. Dara, Yahudi nang era, Saulus bera Damsyik heikek ulumok anasa, yabalya enyek obnob aboka, inimnek yubyek pika wekel balamek ak welsinilimek.

²⁵ Bok, onoʾ yok inimnek mabok danyek, Saulus benya neikaʾ ulumek yuba domek nang edya sor serrem lomok ongowoka, senenggom girik lekaʾ wilimakaʾ lom pik olowoka weilik bilom aboka bokdo dorogomek.

Saulus Bera Yerusalem Heikik Ulumok Yuba

²⁶ Wera Damsyik heik ab uboka, Saulus bera Yerusalem heik byuk dara, anyagan ulumek Yesus yuba doro diriga ban nang eb, neikaʾ heibnob aboka dulumok. Bok sikja dara, Saulus bera aldib Yesus yuba doro diriga bannya dok ara, dib senewanggumek anasa, sikda Saulus bek obnesiljok ulumla do senewoka hyak lok ganya bomek.

²⁷ Wera onoʾ eimik Barnabas bedya Saulus bek yeiniboka, Saulus eboka bobok dara, Yesus yuba lenaʾ gak nang ek bo biniboka amasuk. Dara Barnabas bedya Saulus bera hekaʾ anaso uboka Wenelesilnya bek eibookanya, onoʾ hekaʾ huboka Wenelesilnya bedya alak lemok ara sikenek nekesuk. Wera onoʾ Barnabas al Saulus hyak asaʾ nong anyek, Damsyik heikek Imik Neyung si nimi yok nang ek lel eleklesuk anyek sikenek nekesuk.

²⁸ Anasa wera, Saulus bera Yerusalem heikek Yesus yuba doboka ulumek nang eb neikaʾ uboka, Yerusalem heikek nidyaʾ yabalamookanya, asaʾ ganya boboka, Wenelesilnya bedya si leb elekdo yabalasuk.

²⁹ Dara Saulus bera, Yahudi nang bok, Yunani yuba salamek nang eb, neikaʾ yuba heibdangoka, onoʾ sabdangdang balameekanya, sikda Saulus bek obnemab senen ganya boboka dulumek.

³⁰ Wera Yesus yuba dolomek nang edya, Saulus bek Yahudi nang edya obnobaʾ aboka ubak an yuba kemek dara, sikda Saulus bek eboka bobeknya nera Kaisarea heikek bo mal byik ara, onoʾ Tarsus alba eilinya heikek bokol byik.

³¹ Dara wenyek, Imik Neyung yuba donaʾ nim anyek, Yudea sokok hnon, Galilea sokok hnon, Samaria moka hnon, ulumek nim era, kaboka pe ulumek. Imik Neyung Geisinya adya arawoka, sikda Wenelesilnya bek lok ganya boboka, yuba dolomek nimi nidyaʾ ara, ganya gasa kaboka, sik nonga yuba dolomek, anaba nauba danggiga balamok.

Petrus Bera Lida Heik Yope Heik Ulumok Yuba

³² Petrus bera yok-yok moka biniboka, Imik Neyung yuba doboka ulumek nim ek kemel giriklesuk. Dara ono yok sum enyek, Petrus bera Lida heik sam munaʾ Imik Neyung mab ek kemel bilisuk.

³³ Wera Lida heikek ara, Petrus bera, nimi hnon alda nonga heimokaʾ anyek malamok salek era, seleb gibnaʾ ara linbadya lemok ak, alja si nera Eneas alameknya beb neikaʾ ehwibdangarek.

³⁴ Petrus bedya Eneas bek lebokja, ”Eneas, Yesus Kristus adya anak seleb hwebgel anasa, anda bukoka anja ekla malalamaʾ nidyaʾ pe winiwoka ul yabalom,” hyok. Dara, wene sab-sab Eneas bera bukuka sekemok.

³⁵ Wera danyek nimi nidyaʾ Lida nim eb, Saron nim eb, Eneas bek unu hwemok ak eibek dara, sikda Yesus ak dib senewoka domek.

³⁶ Dara onoʾ Yope heikek ara gel hnon, alja si nera Tabita gek ulumok. Dara, alda Yesus ak dib senewoka domok gel ulumok. (Alja si nera Yunani yub adya dara, Dorkas alamek, nera nunja yub era bei busaʾ pam alamab.) Dara, gel gera perobnya nok unuwoka, bonaʾ garan ulumna nim ek arawoka ulusuk.

³⁷ Ban sum enyek alda neiknaʾ salawoka somogomok. Wera alja beʾ goumek ara, seleb meka hwiyimek dara, dil binob aboka, imik ek eini beiyimek.

³⁸ Yope heikek ara, Lida heik ab dara, hyak oka, mok gom anasa, Yesus yuba doboka Lida heikek ulumek nang edya Petrus bera Yope heikek ulumla an yuba kemek dara, ban wenyaboka e yorurum aboka, ”Men hyak berra aboka yalom,” aboka el bururum aboka penya nang orugusik.

³⁹ Dara, Petrus ben nong ak wenyaboka el byik dara, Petrus bera sekoka neikaʾ balamek ara, Yope heikek Dorkas ge somogomok ak beiyimek ek byik dara, Petrus bera alda imik ek sam e byik. Dara anyagan nenya seleb somogomok anasa or youwek ulumek gelewa nidyaʾ era, Petrus be sekel byuk enyek, aknel ganagal biniboka, Dorkas ge embengaʾ ulumok wenyek, sikenek wiboka elegesuk aklenga danyek aawoka, hyak nauba engewoka lelemek.

⁴⁰ Petrus bedya anyagan engero bulumek nimi danyek, ugunda nidyaʾ goboka beiyik bululum aboka, albeyok anyagan koma lumugoka Imik Neyung ak heng uboka molomok. Wera Petrus bera Dorkas gedya beʾ gala gouboka beiyimek ak keeboka lemokja, ”Tabita o, anda buklom,” hyok. Dara, Dorkas gera henga gwelegoka kemelemok enyek, Petrus bek eiyimok dara, alda bukumok.

⁴¹ Dara, Petrus bedya Dorkas gek soruk salawoka gliboka bukiyimok. Dara Petrus bera, anyagan ulumek munaʾ Imik Neyung mab eb, youwek salyaʾ ulumek gelewa eb yoululum aboka, Dorkas ge embengaʾ hweboka bukiyimok gel gera, wera anya e aboka sikenek elegesuk.

⁴² Petrus bedya ban unuwoka hwemok yub era, Yope moka nidyaʾ oboka lelemok dara, anadya nimi nauba Wenelesilnya bek dib senemek.

⁴³ Wera Petrus bera anyagan mok goulunaʾ aklenga wilimoknya alja si nera Simon bedya ek li wenebadya neikaʾ maboka ulumek.