RASUL 8 - PERJANJIAN BARU NALCA YUBA

Saulus Bera Imik Neyung Mabo Oro Yabelesuk Yuba

¹ Saulus bera anyagan ulumok ara, Stefanus bek obek dara, perob senemok. Dara al neik sum enyek, men obadya nang Imik Neyung yuba lenaʾ gak nang enyek orok bok, yok Yerusalem heikek sam ab yuba donaʾ nim ek, doluwoka yaklanawoka doboka olosik dara, doluwoka bokdangoka hnonda Yudea sam hnon, hnonda Samaria sam hnon, doknol balamek.

² Dara onoʾ, hyak pe Imik Neyung ak lok ganya bolomek nang adya Stefanus bek nauba engewoka soko lokoka diyimek.

³ Bok, Saulus bera yeiniboka Imik Neyung yuba donaʾ nim era, nauba deijik senewoka soldob menegonun aboka dulumok. Dara, alda hnon ek obgogowan dara, onoʾ hnon yok ek biniboka Imik Neyung yuba dib senemna nang, nengmab ab gelewa ab, doboka bobna dara, nimi henga gereksin ek sam henga geregel balasuk.

Pilipus Bera Samaria Heik Sam Yuba Lelemok Yuba

⁴ Wera, Imik Neyung yuba dib senewoka domek nang sikenek doluwoka olosikaʾ anasa, doknol balamek ak sam nidyaʾ ara, Imik Neyung yuba nauba leb elekdo yabalemek.

⁵ Dara, Pilipus bera Samaria senenggom heik biniboka, Imik Neyung adya nimi blebsinaʾ dubnya eleganesin amokaʾ Kristus anyek, lel eleklesuk.

⁶ Dara, Pilipus bedya Imik Neyung yuba lelemookanya, yokaʾ-yokaʾ nauba lokso Imik Neyung ak ab beknaʾ dibaʾ unuro yabalamokaʾ anyek, nim adya eiyimek dara, sikda loka daboka, ganya ologoka, pe kelemek.

⁷ Dara, Pilipus bedya, yana gwanalamok nanga hnon, hwelesuk. Yana soruka heimna nanga hnon, nauba hwelesuk. Hnonda bisaʾ wekemna nanga hnon era, bisaʾ yakoka nauba hwelesuk dara, bisaʾ ara ngeboka ngalagoka goblemek.

⁸ Dara, nimi nidyaʾ Samaria heik ulumek heik nanga nidyaʾ ara hyak eiya dablasuk.

⁹ Dara onoʾ, Samaria heik ara, nimi si Simon alda nimi hwelesuk adya, Samaria nimi lobaʾ nenelesuknya hnon ulumok. Dara, nimi nidyaʾ alak lok ganya bolomek. Onoʾ al onnya bedya nara hyak senenggomnya abdangoka leldalamok.

¹⁰ Dara, al damnya nera senenggomaʾ aldalamok adya, Samaria nimi mek nanga nauba nanga nidyaʾ, alak keeboka dib senelemek. Dara, Samaria nimi lelemek ara, ”Ban ben era alda hyak senenggomnya, hyak Imik Neyung migib ak gologoknya bek ulumla,” aboka lelemek.

¹¹ Ban Simon bera Samaria heik ara hyak youmaʾ orowek alja hwelesuk migib edya, hyak nimi nauba lobaʾ nenelesuk. Anadya alak alda perob senenggomnya senewoka nimi nauba alak kelemek.

¹² Bok, Pilipus bedya sik Samaria nim ek, Imik Neyung yuba leboka, nimi blebsinaʾ dubnya si Yesus Kristus adya, eimik wenelemnesil aboka lelemok dara, Samaria nim era Pilipus bedya lelemok yub ek dib senemek. Dara, sikda gelewa anaba, nengmab anaba, nidyaʾ meka dalasuk.

¹³ Simon be nimi hwelesuknya beneba, dib senemok. Dara onoʾ alba meka dabgogomok seleb dara, Pilipus beblaboka neikaʾ uro yabalerek. Wera Pilipus bedya, Imik Neyung adya hyak lokso migib anyek beknaʾ dibaʾ unulumok dara, Simon bera hyak lok anasa, ngolukdo ulumok.

¹⁴ Dara, Yerusalem heik ab yuba lenaʾ gak nang edya, Samaria nang era Imik Neyung yuba dib dobak an yuba kemek dara, anasa wera Petrus Yohanes ak kemel binirum aboka bokol bilisik.

¹⁵ Wera Petrus beb, Yohanes beb, Samaria heik seleb birik dara, Samaria nim ek Imik Neyung Geisinya sekel yinggisulul aboka heng uboka mololorek.

¹⁶ Samaria nim era, Pilipus bedya Wenelesilnya Yesus bedya si ok sibuka meka dab losuk dara, Geisinya ara sikenek anam dib sekel yanggom anasa, Imik Neyung Geisinya sekel youlul aboka heng uboka molorek.

¹⁷ Dara, Petrus beb, Yohanes beb dadya, Samaria nim ek sikja soruka salawoka heng uboka lelesirik dara, wera Imik Neyung adya Geisinya ara dib domek.

¹⁸ Dara, Simon bera, Samaria nim ek Petrus Yohanes adya soruka diyiwoka, heng uboka lelerek enyek, Samaria nim Imik Neyung Geisinya dobek anyek eiyimok dara, anasa wera, Simon bera Petrus Yohanes ak rupiah bo yeiniboka,

¹⁹ ”Ugunja unuwosurum migib enyek nak hnon eleganerum adya, nababya nadya soruk yok nang ek diyiwoka heng uboka lebsinya dara, Imik Neyung adya Geisinya dib dobnemak bar,” aboka molomok.

²⁰ Bok Petrus bedya, Simon be hwelesuknya bek, ”An nong ab, anja rupiah eb, bisaʾ heik bululum. Anja dara, Imik Neyung adya eleklesil migib era rupiah adya dekoka dolomak senelam de? Hyak orok nong!

²¹ Anda Imik Neyung ak jong ganya ara orok anasa, nunja welemab wa nek ara, neika arawoka wenaʾ ara loblom.

²² Anasa wera, anja seinilam malya unaʾ ek ab ganya dangawoka, Imik Neyung Wenelesilnya bek mololdalalom. Dara, anja malya unaʾ meewanenggel gom aboka eibnemab.

²³ Anda bisaʾ adya heng gobiyiwoka, sikirob ganya deknenggel, eiyimna,” hyok.

²⁴ Dara Simon bedya, Petrus Yohanes ak, ”Wera ugun penya adya nidyaʾ nak lebnurumnya nera nak unaʾ lobnulul aboka, nasamba Wenelesilnya bek molowonurum,” hyok.

²⁵ Wera Petrus beb, Yohanes, beb, sikda Samaria nim ek seleb Imik Neyung yuba lebgogowoka, yokaʾ-yokaʾ nidyaʾ laga leboka nekoka seleb ubdek dara, sik penya dara, on pik Yerusalem heikek birik. Dara, pikik balarek ab dara, Samaria heik gokgobok pik mek heik gong pik Imik Neyung yuba leb elekgiga balarek.

Etiopianya Be Yuba Domok Yuba

²⁶ Dara, Wenelesilnya lero edya Pilipus bek yeiniboka, ”Anda men oblyek sam Yerusalem heik ab ara, Gaza heik moruwoka jakarob pikik sam bilom. Dara, pik era albeyok gakdenaʾ ak ulumla anyek, anda men balom,” aboka orugumok.

^27-28 Wera Pilipus bera keboka wenhyok pikik sam lanal byuk. Ban salek enyek, nimi ben hnon dub nang wa welemoknya bera Yerusalem heik ab ara, alja heikek bunun aboka, benebabya neik pik balamok. Ban bera Etiopia sokok mok soko dam gel, Kandake gedya bonaʾ nidyaʾ meewoka unaʾ dubnya ulumok. Dara, Yerusalem heikek Imik Neyung gibel bilimok ara, seleb dara, ek Etiopia sam bunun aboka, pama glilimla e lomok bukoka pika balamok. Wera pik anam buka balamookanya, onoʾ ununumnaʾ lenya Yesaya yub ak momnya dobokaʾ anyek einibgiga balamok.

²⁹ Dara onoʾ Imik Neyung Geisinya adya, Pilipus bek, ”Anda alda yabalamla ak sam dol gonul bilom,” hyok.

³⁰ Wera Pilipus bera ok so biniboka kelemok enyek, bera ununumnaʾ lenya Yesaya yub ak bukoka einibgiga balamokaʾ ak kemok. Dara, Pilipus bedya Yesaya yuba einilimoknya bek, ”Wera neyung o, anja einililamaʾ ara damok ara anyek lebok ak einilamna senewoka ella ulam gom?” aboka heibok.

³¹ Dara benedya, ”Nimi yok nang edya, nera damok ara ban nenesa lebok aboka neknenaʾ orok dara, hekaʾ huboka ella danasinya do?” wenhyok dara, wera onoʾ Pilipus bek, ”Nadya pam e dubuk an bul yalom,” hyok.

³² Dara Etiopianya bedya, Imik Neyung yuba einilimokaʾ ara ban: ”Alda domba pam ara pam olomak nang ek bo balamak sok, alak doboka bo bilimek. Dara, domba pama me ak honga garalamna ek yuba sanggulumla sok, albabya si akoka yuba sanaʾ ara orok.

³³ Alak derewoka malya nenewoka, onoʾ pe yana lelewanggonggom umek. Alja ganya nong era sokok ab ara seleb dolebok anasa, dara ben hnonok sibin adya anaba, alja mab era alan aboka, nim ek neknenggunusil.”

³⁴ Dara, Etiopianya bedya Pilipus bek, ”Ununumnaʾ lelemoknya bedya ban wenyaboka momnya dobokaʾ ara, al nong amba lebdok gom, nimi yok nim emba geklewoka lebok gom?” aboka heimok.

³⁵ Dara, Pilipus bedya Yesaya yuba momnya dobokaʾ ak men einiwoka, nenyek dara, anasa lebok aboka, Wenelesilnya Yesus amba lebok aboka perob lero yaban yuba leb elegemok.

³⁶ Wera sik penya dara, pikik anam balareekanya, wera meka ulumokaʾ ak sam yok sam birik. Dara, Etiopianya bedya, ”Wera, mek ara an ulumla anyek kendelom. Anasa wera, nak ara hekaʾ mekso ulunel anasa, meka danenaʾ ara lobnenelem do?” hyok.

³⁷ Dara Pilipus bedya Etiopianya bek, ”Neyung o, anda hyak Yesus ak ganya gekman dib senewamen dara, wera meka dabnenggen,” hyok. Dara Etiopianya bedya, ”Nara Yesus Kristus ara Imik Neyung bedya me dib ulumla ara dib senelamna,” hyok.

³⁸ Dara onnya bedya, ”Pam e nera anyagan dek-deka sobnanam,” aboka orugumok dara, sikda anyagan balarek ara dek-deka sorek. Dara Pilipus beb, Etiopianya beb, mek inik yingginiboka, Pilipus bedya alak meka dabok.

³⁹ Wera mekek ab ara goboka yabarek dara, Pilipus bera Imik Neyung Geisinya adya wene sab-sab doboka yokok bo bilimok. Dara, Etiopianya bedya dara, Pilipus bek mekaʾ eil donaʾ ara hyak orok. Bok, ban Etiopia dub nang wa wenaʾ dubnya bera ganya eiya daboka alja ek pik bilimok.

⁴⁰ Bok wera onoʾ, Pilipus bera biliga Asdod heikek sekok ok eibdok. Dara, alda onoʾ yabalamookanya, Yesus adya perob Imik Neyung yuba yok-yok heikek sam leb elekgiga balamok ara, Kaisarea heikek lanal bilimok.