RASUL 6 - PERJANJIAN BARU NALCA YUBA

Sekbadya Nang Imik Neyung Wa Amba Sekiyimek Yuba

¹ Dara, wene salek era, Yesus yuba doro diriga ban nang era, onoʾ nauba danggiga balamok salek enyek, Yahudi nang bok Yunani yuba salamek nang edya, onoʾ Yahudi nang yokaʾ ak walamek. Yunani yuba salamek nang edya, nunja you gelewa era, bonaʾ yok nang ek ara nauba boklelum jok, ban you gelewa ek hnon donggulumak, aboka walamek.

² Anasa wera, obadya yub lenaʾ gak nang edya, yok yuba lenaʾ gak nang nidyaʾ neikaʾ ak mamagiyiwoka, sikenek, ”Nunda denaʾ anasa boklomeibyekanya, Imik Neyung yuba lenaʾ lobnemab dara, malya nong.

³ Dara wera, unulum anasa leboka, ugun gangganek ab yuba saboka, ugunja lelum ara webnok aboka, sikja ganya geremseng uboka Imik Neyung Geisinya adya ok deknewoka ulumeija nang ek, sekbadya sekiyiwanamab.

⁴ Anasa nuk dara, heng uboka molowoka, Imik Neyung yuba leboka unulumnamab ok,” hyek.

⁵ Dara, nimi nidyaʾ obadya nang lebsik yub era perob senemek dara, nimi si Stefanus bek, Imik Neyung Geisinya adya ok alja ganya deknewoka, Yesus ak hyak dib senewoka, ganya ologoka domoknya bek sekiyimek. Dara onoʾ, yok nang hnon sekiyisik nang era, hnonda Pilipus, hnonda Prokhorus, hnonda Nikanor, hnonda Timon, Parmenas, Nikolaus Antiokhia mok ebnya hnon, sekiyimek. Nikolaus bera alda Yahudi nang gom bok, Yahudi nang Imik Neyung yuba ak wekoka domok.

⁶ Dara, ban sekbadya nang era doboka obadya yuba lenaʾ gak nang ek, wera sekiyiwanamab nang era an aboka lebek dara, obadya nang edya, soruka sikenek diyiwoka, heng uboka molosik.

⁷ Wera danyek, Imik Neyung yub ara, onoʾ mok soko oboka lelebgiga yabalamok. Dara, Yerusalem heikek ara, nim Imik Neyung yuba doro diriga ban nang era nauba danggiga balamookanya, onoʾ al Yahudi yuba wa gakaʾ dub nang nauba eneba, Yesus ak dib senewoka Imik Neyung yuba dib domek.

Stephanus Bek Yana Kiboka Wabek Yuba

⁸ Stefanus bera Imik Neyung adya wanaʾ uboka eleksinaʾ ab migib unaʾ ab dadya, deknewoka ulumok adya, alja hyak lok soʾ ab, senenggom beknaʾ anaba nimi hnoum nauba unuro yabalemok.

⁹ Bok yok nang edya, sikda Meebdanggogomek Nang e aboka silimek ek Yahudi nim edya yuba don ek dolomek nang edya alak walamek. Ban nang era Yahudi nang bok, si yok-yok, hnonda Kirene nang, dara onoʾ hnonda Aleksandria nang. Dara, hnonda Kilikia mok eb, Asia mok eb, sikda Stefanus beblaboka yuba gangawoka mala lanab dangamek.

¹⁰ Bok, Stefanus bedya yuba nidyaʾ salamoknya nera, Imik Neyung Geisinya adya anyek-anyek sablul aboka geremseng ganya eleklemok adya salamok dara, sikda nidyaʾ nang adya dara, nera malya lelemla aboka, alak saawoka lenaʾ okna dangasuk.

¹¹ Anasa wera Yahudi nang edya, Stefanus bera Musa bek hnon, Imik Neyung ak hnon, malya lelemla aboka, nimi wene nang edya sondaʾ anasa, miniwoka lebnok aboka, onowoka orugosik.

¹² Dara ban unuwoka, Yahudi yuba dam nang ek hnon, sikja yuba neksin nang ek hnon, nimi salyaʾ yok nim ek hnon, doblomek. Dara, sikda Stefanus bek henga goubuka, Yahudi yuba sanaʾ gak nang ek bo bilimek.

¹³ Dara onoʾ, Stefanus bek yana kimek nang, sonda bok, lelewoka neknok aboka bo yeilimek. Dara, sondaʾ anasa Stefanus bek minimek nang edya lelemekja, ”Stefanus bera Imik Neyung adya geisa e nek malya e aboka lelemlakanya, Musa bedya unuwanalum an yub era malya yub aboka lelelanya bera an,” aboka sondaʾ anasa wenyaboka yana kimek.

¹⁴ ”Stefanus bedya dara, Nazaret mok ebnya Yesus adya Imik Neyung e nenyek golowoka beibnamlakanya, Musa bedya Israeli nang unulumnulum aboka elegosukaʾ nidyaʾ ara yoknya dangawanamla alamla kemouba,” aboka lelemek.

¹⁵ Nimi nidyaʾ yuba sanaʾ gak nang longomek nang edya, Stefanus bek kemelemek dara, Stefanus bedya hogung era lero hogung anaso dangamok eiyimek.