RASUL 27 - PERJANJIAN BARU NALCA YUBA

Paulus Bera Roma Heikek Byuk Yuba

¹ Wera nunda mek ekla bunaʾ adya Italia sokok binimab aboka seleb wenyabgegemek dara, yok henga goubuka beiyisik nang eb, Paulus beb dara, Kaisar bedya yin bonaʾ nang dubnya si Yulius bek, anja bo binilam aboka alak elegemek.

² Dara, nunda Adramitium heik ab yok mek ekla bunaʾ ek, Asia sokok mek gemek ulumek heikek bununaʾ aboka umok mek ekla bunaʾ ek bukuka lanawoka bilimouba.

³ Ampum maboka gwelegob seleb dara, onoʾ Sidon heikek byuba. Sidon heikek ara, Yulius bedya Paulus bek ara pe unuwoka, Paulus bera alja hemyab ek, or kemero yibilom hyok dara, Paulus bek okna uboka garan ulumok bonaʾ hnon aramek.

⁴ Wera onoʾ Sidon heik ab uboka, mek ekla bunaʾ pik lanawoka mek dubuk bukoka balamouba dara, kaboʾ adya nu balamouba pika garawoka ulusuk dara, Siprus mek dubuk soko eilibik pik ge moboka balamouba.

⁵ Wera anyaganyeb uboka senenggomaʾ anyek longowoka lobok mek dub pik, nera Kilikia moka hnon, Pamfilia moka hnon, neik berem ngeklubdarek ak mok eb uboka, Likia moka Mira heikek byuba.

⁶ Wera Mira heikek byubuk ab danyek, yok mek ekla bunaʾ hnon Aleksandria mok eb ara, Italia moka heikek bununaʾ aboka ul yabok mek ekla bunaʾ ek eiyiwoka, yin bonaʾ dubnya Yulius bedya nuk mek ekla bunaʾ enyegan doboka dibsuk.

⁷ Wera Italia moka balamoubuk ab dara, mek ekla bunaʾ ara hyak mandewoka nemen balamouba. Wera hyak oknaʾ ulusuk bok, mabgiga balamoub ara, Knidus mok era ok berem ubok bok, or hnomunga salyaʾ ak byuba. Knidus moka heikek byubuk ab dara, kaboʾ anyek or sobaʾ dolomoknya nenesa, men danyek anyan binimab senemouba pik era binggububa. Bok kaboʾ orok pik binob senebuba dara, Salmone moka yema amoʾ leboka Kreta mek dubuk soko pik byuba.

⁸ Wera hyak okna bok, hyak ganya igina kweboka, mek ekla bunaʾ ak buka bilimoubnya nera, Lasea heik berem okan mek ekla bunaʾ pe bulumla ak alamek ak sam byuba.

⁹ Ban unuwoka balamouba salek enyek, Yahudi nang edya sikja heknaʾ perob sum aboka memelemek sum era seleb unubgogomok. Anasa, salyaʾ kaboʾ adya waboka obsununaʾ aboka ulumok adya, wera perob binisibya salek era seleb dengamok. Anasa wera, Paulus bedya sikinek wenewosuk ara,

¹⁰ ”Hem yab o, nadya senenanya nera, nunda bindibiganamab dara, hyak nauba okna dabnesil. Nunda yokaʾ-yokaʾ heboka salyaʾ lelem danamla. Nera nunja bomab bonaʾ eb, nun buka yabalamab mek ekla bunaʾ ok gom, alda nunja nong eneba nauba ob yangawanasil,” hyok.

¹¹ Bok yin bonaʾ dubnya bedya dara, alda mek ekla bunaʾ damnya beb, mek ekla bunaʾ bolomek nang eb dadya, lelemek yub danyek dib senewoka, Paulus bedya lelemok yub ara, kebnenggumok.

¹² Wera perob mek ekla bunaʾ malamla ak ara perob gom adya, wera anyagan ara, saragenaʾ li dara, kaboka mabdabnenggunumso anasa, wera mek ekla bunaʾ gliboka bolomek nang nauba so edya dara, anyagan ara loboka saragenaʾ li ubnalabok anasa, men Feniks moka binimab senemek. Feniks alamek heik era, Kreta mek dubuk sokok sam uboka, mek ekla bunaʾ bul yalamok mek gemek ara, kemban dabo sam hnon, kemban woru sam hnon ulumok.

Kaboʾ Adya Meka Eiliwoka Obsununaʾ Ulumok Yuba

¹³ Dara ban salek era, woru sam ab kaboʾ enyek nemen dolomok dara, onoʾ danyek mek ekla bunaʾ bolomek nang edya dara, or pe lanawoka balanob senemek. Wera igin yakaʾ dolinglemakaʾ ara glibsalawoka seleb gwanewoka doro beiyiwoka, Kreta moka gek sam ok dobgiga balamouba.

¹⁴ Bok onoʾ wene salek mandewanggonggom, yali sam dabo kaboʾ alamek kaboʾ enyek, mok soko doubuk sam ab ara dorogol yabok.

¹⁵ Dara nunja bukumouba mek ekla bunaʾ ak kaboʾ wekoka olol yalamok. Dara, ngalengaʾ goluwoka bimenggom anasa, salyaʾ lelem ok or bo balasulul aboka lomoubnya nera, kaboʾ mandebnaʾ anyek nauba anasa sene ubdangamouba.

¹⁶ Wera nunda Kauda mek dubuk soko berem sekna gwanen ak so yabuba dara, mek mek ekla bunaʾ enyek nauba mek ekla bunaʾ ak bo yeiniboka pe geregemoba.

¹⁷ Mek mek ekla bunaʾ seleb doro beiyimouba dara, wera nauba mek ekla bunaʾ nidyaʾ senenggom heng edya gasa norob ganagoka umek. Mek ekla bunaʾ anyek Sirtus moka egenyak sam diboka malya ublyek aboka lok anasa, mek ekla bunaʾ ak golulumek boksom enyek loboka doboka, kaboʾ doroklomokaʾ sunuwoka balamouba.

¹⁸ Bok senenggom kaboʾ ek dara, lobla henggonggom sobaʾ obdibigosuk dara, ampum hnon maboka gwelegok dara, wera mek ekla bunaʾ lomok sam bomouba bonaʾ era, hnon doluwoka mek gwan dubuk bobok einimek.

¹⁹ Wera onoʾ ana gweleknek winilinya sum era, mek ekla bunaʾ bolomek nang edya, sikja soruk adya mek ekla bunaʾ alja bonaʾ anaba mek gwanek sam bobogomek.

²⁰ Wera nunda liga wen anam pikik balamoubuk ab dara, heng ab, guraʾ ab dara, mekaʾ gobdo eilinaʾ ara hyak eibnenggumouba dara, onoʾ kaboʾ nong anaba hyak sobaʾ sounum-sounum aboka doldibilloklemok. Wera unulumok adya, wera nunja dara, embengaʾ merewanamab senenaʾ era hyak gobdo dengarawosuk.

²¹ Wera liga wen mabek ara, gwaneng ara hyak gobdo denggumek. Dara Paulus bedya nimi hnoum gangganek sam sekoka lebok ara, ”Hem yab o, ugunda men nadya lemsa yuba kesomokanya, Kreta sokok ab lanawoka yangganaʾ orok dara, unuwoka bonaʾ yokaʾ-yokaʾ nidyaʾ heboka bobogoka unuwanggunusibya bok,” aboka lelemok.

²² ”Bok onoʾ wenebabya ganya siklewoka ulululum aboka moloweisin. Wera nun nong ak dara, somoknaʾ ara somoganggunumab bok, alda mek ekla bunaʾ ak hnonok weiningganamab. Anasa, ganya siklewoka ulululum aboka nara ugunuk nauba leb wenewesin.

²³ Anasa wera ousa inimnek enyek, nadya giblamna Imik Neyung alja lero edya nak yeiniboka lenelja,

²⁴ Paulus o, anda lok ganya bonaʾ ara mem. Anda Kaisar dubnya bek alja hogung ak binilam bok anasa, onoʾ Imik Neyung adya, alja anak perob ununaʾ edya anasa leboka anab neikaʾ mek ekla bunaʾ pik yabalelum nanga nidyaʾ ara merewanalum, anel.

²⁵ Anasa, hemyab o, ugunda hyak ganya siklewoka ulululum. Nara Imik Neyung adya nak seleb unuwanamna aboka wenyanel sok aldib unuwanamla senelamna.

²⁶ Bok nunda eimik era, salyaʾ yok mek dubuk sokok bo seingnel binisil,” hyok.

²⁷ Wera li meija dubukaʾ nong sum enyek, nunda Adria mek gwan dubuk sam anam bo gweblesuk. Wera hyak inimnek dukdukanek enyek, mek ekla bunaʾ bolomek nang edya, seleb mek gek berem yanggab senemek.

²⁸ Anasa wera, sikda girika henga geregoka sokok ara okan do aboka mek lomok sam sunuwanob aboka boro boblinggemek. Dara, mek lomok ara denga hnonok ebdobnya mekbadya meter so wareb ulumok eiyimek. Mek anam dara, onoʾ sunuwoka denga hnonok ebdobnya winilya meter so ulumok eiyimek.

²⁹ Wera sikda mek ekla bunaʾ ak sam welemek nang edya dara, mek ekla bunaʾ ara girikek u dublyek senewoka, igin yakaʾ berelemak girik dombadya era, mek ekla bunaʾ weilik sam boro boblinggemek seleb dara, wera onoʾ sikja dara, men berra aboka gwelegalya senemek.

³⁰ Dara, mek ekla bunaʾ glilimek nang era, men berra mek ekla bunaʾ ak ab ara lo binob senewoka, sikda igin yakaʾ girik mek ekla bunaʾ saramek sam boro boblingganamab aboka sene umeekanya, mek mek ekla bunaʾ era mek sam doro doblinggemek.

³¹ Bok Paulus bedya sekoka, mek ekla bunaʾ lomok an ulumek yin bonaʾ dubnya beb, yin bonaʾ nang ebdak lebsuk ara, ”Mek ekla bunaʾ glilimak nang enyek, nidyaʾ anyagan unggulumeija dara, ugunuk dara, hyak merewanggunulum,” hyok.

³² Anasa wera, yin bon nang edya mek mek ekla bunaʾ heng era, ya mobenggemek dara, meka bo bilimok.

³³ Dara, henga welda seknun aboka ul yabok salek enyek, Paulus bedya, ugunda nidyaʾ hnon denelum aboka, dukaʾ lolom-lolom hesuukanya wenhyok, ”Hem yab o, ugunda wanaʾ doluwoka, denaʾ denggulum salek era, liga meija dubukaʾ badya mab gwelegolum dara, yokaʾ hnon denaʾ orok.

³⁴ Anasa wene salek mekaʾ hnon del yabalelulum aboka orugeisin. Wera anadya ugunda nonga migib uboka blebnesil. Anya wera, ugunja hong dok hnonok sibin anababya denghenggunusil,” hyok.

³⁵ Paulus bedya ban seleb wenyaboka lebgogomok dara, alda roti gwanenga doboka, sikja saramek sam Wenelesilnya bek molowoka, soboka deb einiwok.

³⁶ Dara, sikda nidyaʾ ara ganya saawoka hegom asuukanya, neikaʾ demek.

³⁷ Nunda nidyaʾ neik mek ekla bunaʾ ak ulumouba nang era hiboka dara, denga sagobadya uboka ebdobnya nera hnabbadya nim ulumouba.

³⁸ Dara, sikda seleb debgogomab senemek dara, yok bomek gandum doka nidyaʾ mekek doboka bobogomek adya, mek ekla bunaʾ jakman dangiyimek.

³⁹ Seleb gwelek sirigok dara, ban eibik soko ara hek soko do senemek. Bok, perob egenyaʾ sokok lomon denek sam eiyimek dara, or dara, banyagan salyaʾ mal lobol binimab, senemek.

⁴⁰ Dara, ban igin yakaʾ geregemek heng era men moboka, girik ara mek lomok lobonggeekanya, neik salek era mek ekla bunaʾ powegellilimek gal ak heng geregemek heng anababya lob lobek. Onoʾ, saramek sam kaboʾ don akleng kaboʾ doblul aboka sunuwoka nobek dara, mek gemek sam lanal byik.

⁴¹ Bok, ekla bunaʾ era men yok mek lomok egenyaʾ ak ikil byuk. Dara, mek ekla bunaʾ u ara gasa darawoka ebegamenggom dok. Dara, mek ekla bunaʾ amaʾ ak sam senenggom mek yaknaʾ adya job menegok.

⁴² Yin bonaʾ nang dara, henga gouboka beiyimek nang ara, mek gekoka dibaʾ bindoweijek anasa, men obnob senemek.

⁴³ Bok, yin bonaʾ dubnya bera, Paulus bek blebnun senemookanya, sikja obnamab senewoka gegemeknya nera, or-or uboka sikliyimok. Alda mek geknaʾ ella nang ara men sakdo dorogoka mek gemek gekoka binilum aboka orugosuk.

⁴⁴ Yok nang ak dara, ebelengnaʾ jobdobaʾ gom, yok jobdobaʾ gom, salawoka mek gemek binimak senewoka orugomok. Ban unumek adya, sikda nidyaʾ mek gemek blebdangoka bilimek.