RASUL 25 - PERJANJIAN BARU NALCA YUBA

Paulus Bera Festus Bek Abaʾ Ara Kaisar Bek Bo Bininyak Molomok Yuba

¹ Wera Festus bera mok enyegan seleb yeiniboka, li winilya ok maboka gwelegok dara, alda Kaisarea mok eb ara, Yerusalem moka byuk.

² Wera Yerusalem heikek ab dara, Yahudi yuba wa gakaʾ dub nang eb, yok Yahudi dub nang eb dadya, Festus bek yeiniboka, Paulus bek alda nunja mok soko lobaʾ nenewoka malya nenelesil aboka lelemek.

³ Wera Yahudi nang edya dara, Paulus bera Yerusalem heikek bo yanamak salek enyek, obnamab senemek anasa, wera Festus benyek alda ganya perob senewesilya dara, or Paulus bo yanok aboka orugesilom aboka molomek.

⁴ Bok Festus bedya Yahudi nang ek lebok ara, ”Paulus bera Kaisarea heikek sam or ulumla anasa, na nong anyek mek anam onoʾ saawoka ono bununaʾ aboka umna,” hyok.

⁵ ”Anasa wera, ugunja dub nang edya nablaboka Kaisarea heikek bindiwoka, nera Paulus bera aldib malya umlya dara, alak yana lelewoka unuwanamab,” hyok.

⁶ Wera onoʾ Festus bera, Yerusalem heikek ara li linbadya gom, sagobadya gom anaba, maldabnaʾ loboka, onsok Kaisarea heikek saawoka yeilimok. Wera ampum yenebok dara, Festus bera yuba longowoka sabnamab aboka umekaʾ seleb dara, Paulus bera anyagan doboka bo yoululum aboka orugosuk.

⁷ Wera Paulus bera seleb yok dara, Yahudi nang era Yerusalem heikek ab yeilimek nang edya, Paulus bek, wera alda nunja sokok malya ulusilnya aboka alja hogung ak sekoka nauba yana kiboka lelemek. Bok, sikja ban nenyek malya ubok anasa lelemab aboka, Paulus bek damoka yana lelenaʾ ara orok.

⁸ Wenyalamek bok, Paulus bera al damnya yuba garabdangoka lebok ara, ”Musa bedya momnya dobok yub ek gom, Imik Neyung bedya ek gom, nadya malya unaʾ ara hyak gobdo orok,” hyok.

⁹ Bok Festus bera, Yahudi nim edya nak perob senewanenokaʾ aboka, mala doboka Paulus bek heibukaʾ ara, ”Anda Yerusalem heikek bindiwoka, nadya saramek sam ban nidyaʾ yana kiboka lelenjaknya nenera yana lelewanenjab de?” hyok.

¹⁰ Bok Paulus bedya lebok ara, ”Nara alan Roma dubnya bedya meemok ak an seleb sekemna anasa, wera al anyagan yana lelewaneneseng. Nara Yahudi nang ek malya unaʾ usinaʾ orok ara, anda seleb eiyilam.

¹¹ Nara yokaʾ memaʾ ak blekoka malya umnya dara, wera naba henga goubuka or obnenulum senewanesinyebok, nak yana kiboka lelenyaknya nera dib gom bok anasa, wera, onoʾ yok nang edya or an oblulum aboka eleganggununeseng. Anasa, nara Roma dubnya bedya nimi yana lelesinaʾ ak an yana lelewanenyak,” hyok.

¹² Wera onoʾ Festus beb, alja aralemek nang eb, seleb yuba sabdangemek dara, Festus bedya Paulus bek, ”Anda Roma dubnya bedya yana lelesinaʾ ak an yana lelewanenyak helem anasa, wera anda Kaisar dubnya bek bo amal binenjak,” hyok.

Paulus Bera Agripa Beb Bernike Gebdak Bo Amal Byik Yuba

¹³ Wera onoʾ liga wen maboka gwelegok dara, Agripa dubnya beb, alja gel Bernike geb, Festus bek perob aboka gibnom aboka Kaisarea heikek yeilirek.

¹⁴ Wera Kaisarea heikek liga wen maboka gwelegek dara, Festus bedya Agripa bek, Paulus bek henga geregoka unulumek yub era, nidyaʾ nekemok. Dara Festus bedya nekoka ara, ”Anyagan ara Feliks bedya henga geregoka beib loboknya ben hnon ulumla.

¹⁵ Men nara Yerusalem heikek ulumsa sum enyek, Yahudi yuba wa gakaʾ dub nang eb, Yahudi yuba dam nang eb dadya, Paulus bek henga geregoka oblom aboka lebek.

¹⁶ Bok nadya lebsa ara, Roma nang ek dara, salyaʾ nadya ok ganya doboka henga gereganggunusinya. Sik unulumak ara, yuba damoka minimna nang eb, alak ununanya bek yuba saboka lelemna nang eb, al nonga yuba damoka yana kinanya beneba, darasam yuba sekeldalanabok bar anasa, nadyok ganya doboka unuwanggunusinya, amsa.

¹⁷ Wera sikda anyagan yek dara, ampum so maboka gwelegok dara, maldabnaʾ loboka, men nimi mamagiyiwoka seleb longowek dara, Paulus bera men berra bo yanalum aboka orugeisisa.

¹⁸ Wera al Paulus bek sondaʾ anasa, miniyiwoka yana kimek nang edya, sikda sekoka Paulus bek malya ululanya bera an aboka yana kiboka lelemek dara, nadya anyek-anyek malya umok senesenya nenyek, sikda hyak neknenggumek.

¹⁹ Bok sikda lelemek ara, sik Yahudi nang yuba donaʾ damok amba hnon, onoʾ somogomoknya Yesus benyek, Paulus benen nong adya, embengaʾ ulumla alamoknya nenesa hnon, yana kiboka lelemek,” hyok.

²⁰ ”Wera Yahudi nang edya Paulus bek yuba nauba miniwoka lelemek adya hnon, anyek-anyek lelemab aboka damoka pe lelenaʾ orok adya hnon, nara ganya ebnyok anasa, wera nara Paulus bek, sik Yahudi nang edya miniwoka lelenjak yub enera, Yerusalem heikek ab yana lelewanenjak gom aboka heibsa.

²¹ Bok Paulus bera al damnya, nara hyak imik senenggomaʾ yana lelelesak ek welewoka sabnemab abdok dara, wera anasa nadya dara, Paulus bek or henga geregemun ara, eimik era Kaisar dubnya bek bo binimab aboka lemsa,” hyok.

²² Dara Agripa bedya Festus bek, ”Hem o, Paulus alamaknya bedya lelemla yub enyek, naba okoka kebsinya,” hyok dara, Festus bedya Agripa bek, ”Wera neyung, ampum ak alja yeiniboka lel yabalya yub ara kebnelam,” hyok.

²³ Wera ampum maboka gwelegok dara, Agripa beb, Bernike geb dara, yin bonaʾ dub nang eb, heik dub nang eb, hyak nimi nauba wekoka, boksom glaboka giboka ulumekaʾ hnoum, Paulus bedya lel yabalya yub enyek kebnom aboka yeilirek. Dara, Festus bedya Paulus beneba or doboka bo yoululum aboka orugusuk dara, bo yek.

²⁴ Dara unu wekemek sum enyek, Festus bedya, ”Perobnya Agripa beb, ugunda anyagan wekel yeililum nang o, ban benyek eillililum. Nimi nidyaʾ Yahudi nim edya, or nera Yerusalem heikek sam hnon, anyagan ab anaba, nak an or anja don alak yokaʾ ublom aboka oruganyek. Sikda nak yeiriwoka nak unuwolul senen lelemek ara, Paulus bera alda embengaʾ unggulumnamso, obnemak aboka yuba nauba lelenyek.

²⁵ Bok nadya keeboka ubsa dara, hyak nimi somoklomak senenggom malya unaʾ era hnon unaʾ orok anasa lobsa. Bok, hnonda Paulus bedya al damnya, nara Kaisar dubnya bedya senenggomaʾ yana lelesinaʾ ek ab yana lelewaneneseng aboka molomok anasa, wera Kaisar dubnya bek or bo binimak aboka garamsa,” hyok.

²⁶ ”Bok, nara Paulus bek anyek yokaʾ enyek aboka, Kaisar dubnya bek ara, Paulus bemba pe nekoka momnya doboka beilisin ara orok. Wera an nenesa leboka, sum enera nimi nidyaʾ weklumaʾ gangganek an, hyak dib nong so ara, anda hyak senenggom dubnya Agripa an nong ak anyek, nonogoka ubmen adya, wera yana lelenaʾ damok ublya dara, momnya dobnun aboka bo yeilimna.

²⁷ Nadya seininanya nera, nimi ben hnon henga geregenanya bera, damok ara anyek okoka malya ubokaʾ ara elgom bok, salyaʾ yok nang edya yana kiboka lelemaknya nenesa dub nang ek beilinaʾ ara perob gom senelamna,” hyok.