RASUL 22 - PERJANJIAN BARU NALCA YUBA

Paulus Bera Yahudi Nang Ek Yuba Sabok Yuba

¹ Paulus wenhyok, ”Neyung yabo hemyab o! Nadya wen ugunuk yuba garabdanamna. Anasa keblulum.”

² Wera Paulus bedya Ibrani yub adya salamokaʾ kemek dara, sikda yuba sanaʾ orok anyek ganya adya ok Paulus bek kelemek. Dara onoʾ Paulus bera lebmorumok,

³ ”Nara Yahudi nang yokaʾ nong ulumna. Nara Tarsus heikek Kilikia sokok ab beibnyek bok, naubaʾ nen dara, Yerusalem heikek anyaganyeb nebsa. Dara, nun neyung yabo domek yub anyek, momnya donaʾ neksinaʾ senenggomnya Gamaliel bedya nak nidyaʾ pe neknyok. Anasa, hemyab o, ugumbabya sumen an Imik Neyung amba yeng ganya boboka yeirililum sok, nababya neikik unulamsa.

⁴ Dara, nadya wenyok lanabok yuba dolomak nimek doluwoka lobaʾ nenewoka olosisa. Nera sikda nidyaʾ gelewa ab, nengmab ab, nadya henga geregoka, gasa ek beillilisisa.

⁵ Yahudi yuba wa gakaʾ dubnya beb, yuba sanaʾ gak nang nidyaʾ ab, Paulus bera alda nenera sondaʾ lenggulumla heneseng. Dara, lebna yuba wa gakaʾ dub nang enedya, Damsyik ulumek nang ek Paulus anyagan yanamla aboka momnya doboka beiyimek. Ban momnya donaʾ en weboka beiyimeknya nera, nara Damsyik heikek bo biniboka, wenyok lanawok yuba dolomak nang enyek, henga geregoka Yerusalem heikek sam bo biniboka gasa ek beibsunun aboka bilimsa,” hyok.

Paulus Bedya Unulumoknya Nekok Yuba

⁶ ”Yubyek dukdukanek enyek, nara Damsyik heikek lanal bununaʾ aboka basa enyek, wene sab-sab yok senenggom dilinaʾ enyek imik ab uboka nak yeb ganaganyok.

⁷ Dara, nara sokok erewoka malyinggisik ab kebsa dara, nak si sibuka lebnyok ara, Saulus o, Saulus o, anda hekasa nak lobaʾ nenewoka olonelem do, anyok.

⁸ Dara nadya, Neyung o, anda heknya do aboka heibsa. Dara alja lebnyok ara, Nara anja olonelemnya, Nazaret mok ebnya Yesus ulumna, hyok.

⁹ Wera nablaboka neikaʾ dilinaʾ eiyiwoka ulumouba nang era, dilinaʾ ak dara, neikaʾ eibuba bok, yuba goklom bokaʾ ak dara, sikda kenaʾ ara orok.

¹⁰ Dara, nadya hnon heibsa, Wenelesilimnya o, nara hekaʾ ak hubnun do? aboka heibsa. Danyek Wenelesilnya bedya nak lebnyok ara, Anda bukoka Damsyik heikek bilom. Dara Damsyik heikek ab danyek, Imik Neyung adya anda unuwanalam senemlyaʾ ara neknenjak, anyok.

¹¹ Bok nak dara, heng omom dilinaʾ yeb goluwanyok adya henga luma yanyok anasa, nadya hemyab edya nak soruka gliboka Damsyik heikek bo binyek,” hyok.

¹² ”Wera Damsyik heikek ara nimi si Ananias bera hnon ulumok. Alda hyak perobnya uboka, Musa bedya unuwanalum an yub ek pe unuwoka ulumoknya ulumok. Nimi Yahudi nang nidyaʾ Damsyik heikek ulumek nang era, Ananias bek hyak perobnya senewoka ulumek.

¹³ Alda na dam sekel yeiniboka lebokja, Hem Saulus o, anja heng era gwelegoka eiblom, anyok. Dara al nenyek, nadya asoka erewoka, henga gweleganyok dara, Ananias bek eibsa.

¹⁴ Wera Ananias bedya nak lebnyok ara, Nunja neyung yabo sikja Imik Neyung adya, anda alja senelamla anyek ella dalom aboka dara, alja pelelanya eiyiwoka, alja yuba nong ak ab kebnelam anasa, gaboka donggel.

¹⁵ Anja kebmenaʾ ab, henga eibmenaʾ danyek, nimi yok nang ek lero yabanaʾ anya danalam.

¹⁶ Anasa wenera anyagan ul mandenaʾ ara mem. Anda bukoka sekmenekanya, Wenelesilnya si ak molowoka, anja malya unaʾ ara gebgululaʾ aboka, mek danaʾ doblom, anyok,” hyok.

Paulus Bek Yuba Lelelom Aboka Orugomok Yuba

¹⁷ ”Dara, onoʾ Damsyik heikek abaʾ ara Yerusalem heik bisa dara, Imik Neyung bedya yuba don ek heng uboka mololamsa enyek, Imik Neyung adya nak deknero lonyok.

¹⁸ Dara onoʾ Wenelesilnya bedya, anyagan ulumak nang era, anja lel yabasimen yuba keboka dobnenggumakaʾ eibna anasa, anda Yerusalem heik loboka, yokok berra bilom, anyok,” hyok.

¹⁹ ”Dara nadya, Wenelesilimnya o, anja Yahudi nim edya yuba don ek pik wekoka nadya anak dib senelenjek nang ek henga gouboka olosisa ara, sikda seleb ella ulunyak bar, amsa.

²⁰ Dara onoʾ neikik, anja yuba lenya Stefanus bek olomek sum eneba, naba oka sekoka or obnok senemsa. Dara, nadya Stefanus olomek nang boksom ara, nadya bo diri seklamsa, amsa.

²¹ Bok Wenelesilnya bedya nak saawoka lebnyok ara, Nadya anak hyak mok Yahudi gom nim ek bilom aboka orugenggen anasa, or bilom, anyok,” hyok.

²² Wera nimi nidyaʾ ara Paulus bedya lelemok yuba pe kelemek bok, ban sidyaʾ nonga lebok yub edya dara, sikda Paulus bek ebngalogoka, ”Ban benesonya bera ob lobnok. Alda ul mandenaʾ lek bar,” aboka lelemek.

²³ Dara nimi nidyaʾ boksoma gwayeb-gwayeb aboka, aso bonaʾ ara imik lo weininggoka, yeiriwoka lelemek.

²⁴ Wera danyek yin bonaʾ dubnya bedya, ”Paulus bera ek bo binilumukanya, alak legebnaʾ adya oboka heibnelumukanya, hekasa Yahudi nang era alak anaso ebngalagoka lelemak do aboka ella danamab,” hyok.

²⁵ Bok Paulus bek legebnaʾ deboka obnobaʾ aboka ul yabek salek enyek, Paulus bedya oka sekemok yin bonaʾ anya bek, ”Roma heik yokaʾanya bok dara, alak yana lelenaʾ orok bok, legebnaʾ deboka obneseng de?” hyok.

²⁶ Paulus bedya ban wenhyokaʾ kemok dara, yin bonaʾanya bera, senenggom yin bonaʾ dubnya bek biniboka, ”Ban benera Roma nang anasa, neyung anda alak hekaʾ hubnelam do?” hyok.

²⁷ Dara wera onoʾ yin bonaʾ dubnya bera Paulus bek biniboka, ”Wei Paulus o, anda Roma nang aldib ulumen bok dara, or nak neknelom,” hyok. Danyek Paulus bedya, ”Yo aldib, nara Roma nang ulumna,” hyok.

²⁸ Dara, senenggom yin bonaʾ dubnya bedya, Paulus bek lebokaʾ ara, ”Nara Roma nang dasaʾ ara, deknaʾ ara hyak nauba deksa adya,” hyok. Paulus bedya lebokaʾ ara, ”Bok nak dara, Roma nang yokaʾ nong adya beibnyek,” hyok.

²⁹ Dara, wene sab-sab enyek, Paulus bek heibnobaʾ umek nang era, mok so gokdongoro bek. Dara, dubnya beneba Paulus bera Roma nang bok, henga gouboka ulumab senewoka, lok ganya bobok.

Paulus Bera Yuba Sanaʾ Gak Nang Ek Bo Byik Yuba

³⁰ Wera Roma yin bonaʾ dubnya bera, hekasa Yahudi nang era, Paulus bek malya nenelemak do, senewoka damoka ella donunaʾ aboka ulumok. Anasa wera, ampum maboka gwelegoka dara, Paulus bek gasa heng ak ab lob loboka, Yahudi yuba wa gakaʾ dub nang eb, yuba sanaʾ gak nang eb, nidyaʾ mamagoka longowanamab aboka orugosuk. Dara, Paulus beneba longomekaʾ ak sam bo bilimookanya, sik saramek sekiyimok.