RASUL 17 - PERJANJIAN BARU NALCA YUBA

Tesalonika Heikek Yuba Lanawok Yuba

¹ Paulus beb Silas beb dara, pikik balarek ara, Amfipolis sam ab ara, Apolonia heikek ab uboka, Tesalonika heikek lanal birik. Dara, Tesalonika heikek ara Yahudi nim edya yuba don e hnon ulumok.

² Wera Paulus bera on ulumok so wek adya, alda Yahudi nang edya Imik Neyung ek byuk. Dara, Imik Neyung yuba momnya dobokaʾ anasa leboka, sikda neikaʾ ganya amomaʾ ubdangoka ulumek. Dara, Paulus bera ban unulumok salek ebaʾ moruwoka Sabat mem sum li winilya gobdo lemok.

³ Wera Imik Neyung yuba momnya doboka anyek sunuwoka, Paulus bedya Imik Neyung adya nimi blebsinaʾ dubnya eleganesin amoknya Kristus bera somogalyekanya onoʾ li winilinya sum era embengaʾ suboka buknamla aboka nekesuk. ”Imik Neyung adya nimi blebsinaʾ dubnya eleganesin wenyamoknya bera, Yesus aboka nadya ugunuk lero yalasin an,” hyok.

⁴ Wera, Yahudi nimi wene nang yuba dib senewoka, Paulus Silas ak sam makal balamek. Anasonya neikik, Imik Neyung bek lok ganya bolomek Yunani nimi nauba hnon unulumek. Dara wera, onoʾ mengewoka dub ulumek gelewa gong hnon makoka ulumek.

⁵ Bok Yahudi nanga nong ak dara, hman ganya nauba bolomek. Dara, Yahudi nang edya dekna gasa ak salyaʾ maro ulumek nang ek mamagoka yoululum aboka e biniboka, denga bolowoka longowoka ulumeekanya, sik ulumek heikek sam nauba malya lel meneklemek. Paulus beb, Silas beb danasa, nimek amoro yibinob aboka, Yason alameknya bedya ek sam berra wamle biniboka, e deboka Paulus Silas ak elemek.

⁶ Wera sikda Paulus beb, Silas beb, elem lomek dara, nimi si Yason beb, yok nang Imik Neyung ak dib senemek nanga hnon, salawoka heik dam nang ek gliboka bo balamek. Dara, sikja lelemek yub era, ”Ban nang danara mok soko me nidyaʾ malyaʾ nenero yabalamek nang era an. Wera nunja heikek an bobo yanggak an,” aboka lelemek.

⁷ ”Dara, Yason bedya sikenek alja ek eboka dibsuk. Dara, nang enedya lelemek ara, Roma soko dub nang edya unulumaknya nera malya aboka blekoka, sikja dara, yok dubnya hnon alja si nera Yesus alamaknya hnon ulumla alamak nang era an,” aboka lelemek.

⁸ Ban wenyaboka lelemek yub enyek kemek dara, nimi nidyaʾ anyagan heik nim eb, anyagan heik dam nang eb dara, sikja doluwoka bok menegosuk.

⁹ Dara, anyagan heik dam nang edya, Yason beb yok nang Imik Neyung dib domek nang ek, wera ugunda rupiah ak dengnaʾ dibnelum wenyamek. Wera seleb dengnaʾ dibek dara, sikenek salamek ara lobosik.

Paulus Silas Berea Heikek Ulurek Yuba

¹⁰ Dara al unuweisik sum inimnek enyek, Tesalonika heikek nim edya Paulus beb Silas bebdak, ugunda Berea heikek sam binirum aboka orugeisik. Wera Paulus Silas ara, seleb Berea heikek birik dara, Yahudi nim edya yuba don ek sam bilirek.

¹¹ Dara, Berea heikek nim era, ganya hegom aboka perob so ulumek bok, Tesalonika nim ek dara, gasa ganya bolomek. Wera onoʾ, sikda Berea nim era, Paulus bedya Imik Neyung yuba lelemok dara, sikda ganya eleleng aboka pe dolomeekanya, onoʾ Paulus bedya Yesus yuba lelesil ara, aldib gom aboka dara, Imik Neyung yuba bukuk sam sobaʾ ella danob aboka eboka einilimek.

¹² Dara, Berea Yahudi nim era hyak nauba Yesus ak dib senewoka domek dara, wera Yunani nanga nong ak dara, men mengewoka dub dangoka gelewa hnon, nengmab anababya, nauba Imik Neyung ak dib senemek.

¹³ Wera Yahudi nang edya Tesalonika heikek ab sam kelemek enyek, Paulus bera Berea heik Yesus yuba nim ek leboka unulamla an yuba kemek dara, sikbabya Berea heikek yeiniboka, nimi ganya soro-wara eiyiwoka, nimi nidyaʾ ganya ara yu neniyisik.

¹⁴ Dara wene sab-sab enyek berra aboka, Berea heikek Imik Neyung mab adya, Paulus bek senenggom mek gwan gemek or bulul aboka orugomek. Bok alda Silas beb, Timotius beb danyek ok, heik enyegan or loboka ulurek.

¹⁵ Wera Berea heikek ab ara arawoka bobeknya nera Atena heikek sam bo bokdo dorogek dara, Paulus bo bokol bilimek nang edya, Paulus bedya Silas Timotius anyek men na yan sok yorurum aboka yuba beibuk dara, sikda wenyamok yuba boboka yeilimek.

Paulus Be Atena Heikek Ulumok Yuba

¹⁶ Wera Paulus bera anam or Silas beb Timotius beb yalarija sok aboka, Atena heikek diri ulusuukanya, heik enyegan kemelemok dara, anyagan ara nimi bisaʾ molowoka hweldanaʾ ok uru balamek ak eiyimok dara, hyak ganya angoo senemok.

¹⁷ Anasa wera, Paulus bera Yahudi nim edya yuba don ek sam Imik Neyung bek lok ganya bolomek Yahudi gom nang eb, anyagan Yahudi nang yokaʾ ulumek nang eb, ganya amomaʾ ubdangoka ulumek. Anasonya neikik onoʾ deknaʾ gasaʾ pik uro balamek nang eblaboka Paulus bera sob-sobaʾ neikaʾ pe ganya amomaʾ ubdangoka uro balamok.

¹⁸ Dara onoʾ neikik wenyek, Epikuros bedya men seinimok ganya seininaʾ enyek seiniwoka ulumek nanga hnon, onoʾ Stoa bedya men seinimoknya nek seiniro ulumek nanga hnon, alablaboka neikik ganya amomaʾ ub einimek. Dara, sik gangganek ab hnon nang edya lelemekja, ”Benera ella danganaʾ ara mek bok, yuba sanaʾ anyek nauba lelemla anasa, hekaʾ anasonya ella dangoka lelemla do?” hyek. Bok onoʾ yok nang edya dara, lelemekja, ”Alda yok soko nang edya molowoka giblemak bisaʾ yub ek lero yabalamla,” alamek. Ban wenyameknya nera damok ara, Paulus bedya Yesus amba geklewoka Imik Neyung yuba lelemookanya, onoʾ somogamna seleb dara, embengaʾ suboka bulumak yuba lelemok anasa, wenyaro balamek.

¹⁹ Dara, sikda Paulus bek eboka bobek dara, Areopagus meinik sam longomekaʾ ak sam bo byik. Dara, anyaganyeb sikja Paulus bek lebek ara, ”Nunda wen anja wenyok ella danganaʾ lero yabalelam anyek ella danamab anasa, or lebsilom,” aboka molomek.

²⁰ ”Anja lelelamnya nera, nunja kelemab dara, nim okoka anyek lebla senenaʾ ara orok bok lelelam anasa, damok anyek lelemna aboka lebmen anyek ella danamab bar,” hyek.

²¹ Dara Atena nang enebabya, sekel yanggan nang bok anyagan ulumek nang era, sikja sobaʾ unulumek ara, sikja anara wenyek lanawal senewanaʾ digum ara hyak pe kelesibya senewoka sobaʾ yuba kero sabdangdo balamek ok.

²² Wera wenyamek anasa leboka, Paulus bera Areopagus meinik sam sekel biniboka, ”Wei ugunda Atena nang o, nadya kemelesin dara, ugunda hyak nauba giblelum eillilisin.

²³ Nara ugunja heik gangganek sam yabalamsakanya, ugunja giblelumaʾ deng anyek kemero yabalamsa dara, ugunja yokaʾ ak uka daboka gibnaʾ oulyang era hnonok ak eiyimsa dara, anyagan unulum ak ara lero momnya dorobja, Im nang ben hnon elgom ulumabnya nek giblemab, aro giblelumaʾ ak eiyimsa. Wei, anasa ugunja im nang elgom alalumnya nenyek wen neknesin.

²⁴ Imik Neyung ban soko enyeb, nidyaʾ sokok anyagan ulumla ab, uyimok Imik Neyung enyek ugunuk sam neksin. Dara al on Imik Neyung enyek alda nim adya wenelesak sokok ab, imik ab, dubnya ulumla. Alda nim adya yok mengewoka giblenob aboka solomak ek sam unggulumla.

²⁵ Al Imik Neyung adya alja nimi ek sam embengaʾ unaʾ ab, hibaʾ ab, yokaʾ-yokaʾ nidyaʾ ara nim ek eleklesil anasa, nim adya hnon Imik Neyung ak hnon unggulumla senewoka arawanggunuseng.

²⁶ Imik Neyung adya nimi hnonok uyimookanya, wera nimi nidyaʾ soko me nidyaʾ bokiyiwok, nidyaʾ soko deknewoka ulumnamak aboka unusuk. Al Imik Neyung adya nim ek sam, hek sum, sumen hanyagar ulumneseng ara, alja ok orowek seneiyisuk.

²⁷ Imik Neyung adya ban nidyaʾ unusuk ara, sene nak ella dangoka el yanenok aboka, wera sikda nak elemeija sum era or eibnenok aboka usuk. Bok dib nong so ara, Imik Neyung ara nuk mok sam lo yiboka alda mok unggulumla.

²⁸ Anasa nim adya hnon wenyalamak ara, Nunda embengaʾ uboka ebegoka, sokok an yabalamab ara alja migib edya ok ulumab, alamak. Anasonya neikik, youmaʾ ugunja nang bok urumnaʾ dolomek nang edya hnon lebek. Nunda nidyaʾ ara alja mabo yokaʾ nong ulumab aboka lebek,” hyok.

²⁹ ”Wei, wera nunda Imik Neyung bedya mabo yokaʾ nong ulumab dara, nunda Imik Neyung ak, emas girik anaso gom, perak girik nenenaʾ gom, onoʾ nimi ganya geremseng adya sunuwoka unulumaknya nek, nera Imik Neyung yokaʾ nong ara an senenaʾ ara mem.

³⁰ Nunja youmaʾ dongdang alamoubnya nera, Imik Neyung adya seleb hekiyiwosuk bok, wenyek dara, nimi nidyaʾ mok soko me ulumak nim ek, ugunda ganya dangawoululum wenyalasil.

³¹ Anasa wera, Imik Neyung adya nimi nidyaʾ soko ak ulumaknya nenera, pe jong yana lelewanesin senewoka seleb li orowek gegewoka dibuk. Ban unuwoka yana lelewoka ubnesilnya bera orowek Imik Neyung benedya unuwanamla aboka gegebok. Dara, nimi nidyaʾ anara dib senewoka ella danokaʾ aboka dara, nimi somoknaʾ ak ab sam, bera seleb embengaʾ suboka bukiyibok,” hyok.

³² Atena nim edya Paulus bedya nimi somogoka embengaʾ subnaʾ yuba lelemok enyek, nimi hnon adya sondaʾ anasa lelemla aboka Paulus bek oksellilimek. Anya onoʾ hnon lelemekja, ”Nunda hnon kebnemab anasa, onnya nenyek hnon yok sum saawoka lebsilom,” aboka lelemek.

³³ Dara, Paulus bera nimi longomek ak ab loboka byuk.

³⁴ Bok, sik gangganek ara nimi hnon nang era bokoka Paulus bek sam mala doboka, sikda Yesus ak dib senemek. Ara men unumek nang era hnonda, Dionisius bera alda Areopagus meinik sam longomekaʾ dubnya bera an, gel si hnon Damaris gen hnon uboka, onoʾ yok nanga hnon anaso unumek.