RASUL 12 - PERJANJIAN BARU NALCA YUBA

Yakobus Be Somogookanya Petrus Be Henga Lobek Yuba

¹ Ban neik salek enyek, Herodes dubnya bera, Imik Neyung yuba donaʾ nim ek igin yakaʾ kweboka ob einisuk.

² Dara al onoʾ Herodes bedya orugosuk adya Yohanes bedya alja weis Yakobus bera waren gabo adya omek.

³ Wera ban Herodes bedya unumok anyek, nimi nidyaʾ ganya adya pelemla senemek eiyimok dara, onoʾ Yahudi nang edya welenaʾ orok roti gwaneng den salek Herodes bedya Petrus bek salawoka, henga gereganelum aboka orugusuk.

⁴ Wera, Petrus bek seleb salawoka henga goumek dara, nimi henga goubuka uka gasa beillilisik ek sam doronggoka beiyimek. Dara, Petrus be henga geregoka beiyimek ak ara yin bon nang yaknaʾ dombadya jam bokoka, onoʾ nimi nonga yin bon nang eneba dombadya nang pikik leboka welemek. Wera Yahudi nang edya welenaʾ orok roti gwaneng den sum era seleb debgogowoka ubije enyek, Herodes bedya dara, Petrus bek nimi hnoum yana lelewanamna senemok.

Imik Neyung Lero Adya Petrus Be Henga Lobok Yuba

⁵ Anasa wera, Petrus bera anam nimi henga gereksin ek sam or ulumok bok, Imik Neyung yuba donaʾ nim era sob-sobaʾ Petrus bemba leboka, Imik Neyung ak heng uboka molol dibolloklomek.

⁶ Wera, Herodes bedya Petrus bek ampum nimi hnoum yana lelewanamna aboka mabok sum enyek, Petrus bera gasa henga penya adya goboka, yin bon nang penya ulurek gangganek okan beiyimek. Dara onoʾ, henga gereksin ek pik sindamak ara onoʾ yin bonaʾ nang nimi penya nang welerek.

⁷ Dara, al wene sab-sab enyek, Wenelesilnya bedya lero be hnon, nimi henga gouboka beillilisik ek sekok dara, alja dilinaʾ edya henga gouboka beillilisik e yeboka lomok. Dara, lero enedya Petrus be mamokaʾ ak warawoka gaawoka bukiyimok. Dara, lero enedya Petrus bek, ”Wei Petrus o, men berra aboka buklom,” aboka orugumok. Wera wene salek enyek, gasa heng edya Petrus bek gouboka beiyimek ara albeyok alja sorukuk ab loboka mamagemok.

⁸ Wera onoʾ lero adya Petrus bek, ”Anja akleng ongowoka, yan ongonaʾ norobdangoka ublom,” hyok. Dara unumok dara, onoʾ lero adya Petrus bek, ”Anja wameldanaʾ akleng goluwoka, nak dobdo yanenelem,” hyok.

⁹ Dara wenyek, Petrus bera nimi gasa gouboka beilisin ek ab ara lero ablaboka neikaʾ goberek. Bok Petrus bedya dara, nera aldib kaboka okoka ulunam senenaʾ loboka alja dara, ononaʾ dib ulunam do, senemok.

¹⁰ Wera Petrus beb lero ab dara, seleb pik yaknaʾ mennya neb, penenyaʾanya neb dara piboka, onoʾ senenggom gasa pikik hyak sidyaʾ nongnya nek lanal birik. Wera, pik sereknaʾ nidyaʾ ara albeyok bakoka mamagemok dara, sikda goboka pik nong pik bilireekanya, pik gwandanya ak bilirek dara, lero era Petrus bok albeyok anyagan loboka dengaro lobok.

¹¹ Wera ban nidyaʾ seleb unubgogobok danyek, Petrus bera ella dangoka lebokja, ”Wera wenyek Wenelesilnya bedya alja lero bokol yeiniboka Herodes bedya soruk migib ak ab hnon, Yahudi nim edya nak yokaʾ-yokaʾ unuwanamab senelenyakaʾ anyek, blebnelaʾ ak ara ella dan,” hyok.

¹² Petrus bedya wenyaboka seleb seiniwoka ganya dibaʾ seleb yok dara, alda Yohanes bok yok si nera Markus alameknya bedya alja genong Maria gedya ek bilimok. Dara, al on ek ara nimi nauba longowoka Imik Neyung ak heng uboka mololemek.

¹³ Petrus bera biniboka, beiyik pik sereknaʾ ak glorum-glorum amok dara, ek wa welemok gel alja si nera Rode gedya pika baknunaʾ aboka bilimok.

¹⁴ Dara, Petrus bedya beiyik ab uboka, pika baknelom al yabok enyek, al okoka kebok. Dara, Rode gera, eiya anasa, pika baknenggonggom nimi longowoka heng uboka lelemek nang ek, ”Petrus bera onoʾ beiyik sam seleb yal,” al bilimok.

¹⁵ Dara, longowoka heng uboka lelemek nang edya, Rode gek, ”Anda serema salenggel gom?” aboka lemek. Bok Rode gedya, hyak dukaʾ lolom-lolom aboka, ”Nara Petrus bedya yuba okoka kemna,” aboka lelemok. Dara onoʾ longomek nang edya, ”Nera Petrus bedya alja ganya yamaʾ ak lemla,” alamek.

¹⁶ Dara onoʾ neik salek era, Petrus bera sobaʾ pika glorum-glorum abdibigemok. Dara, sikda pika bakoka Petrus be yokaʾ nong ak okoka eiyimek dara, sikja ganya loka dasuk.

¹⁷ Wera, Petrus bedya ugunda yuba iriri anaʾ ara mem loblulum aboka soruka moub-moub aboka lesuk dara, onoʾ alja sikenek Wenelesilnya Imik Neyung bedya nimi henga gereksin ek ab hekaʾ huboka henga loboka bo gobonel anyek, longomek nang ek nekesuk. Dara, Petrus bedya, ”Ban nak unuwanel anasa, hemyab o, yok nang ek hnon, Yakobus bek hnon, wenyaboka neknelum,” aboka lebsuk. Seleb wenyaboka lebgogobok dara, Petrus bera anyagan ara loboka yokok sam lo bilimok.

¹⁸ Ampum maboka gwelegok dara, yin bon nang era, doluwoka yuba gangawoka leldalamek. Dara, sikda Petrus bek unumok anyek, hekaʾ humla do senewoka ganya erosuk.

¹⁹ Dara, Herodes bedya Petrus bek onsok eboka dobnelum aboka orugusuk dara, elemek nang era eiriwanggumek. Wera dara, Herodes bedya nimi henga gereksin ek sam welemek nang era sikenek pe wenggulumak badya aboka, nidyaʾ heiboka onoʾ obnelum aboka orugusuk. Ban unubgogowok dara, Herodes bera Yudea sokok ab ara Kaisarea heikek biniboka liga wen malamok.

Herodes Be Somogok Yuba

²⁰ Tirus nim eb, Sidon nim eb, Herodes bera sikenek yu ganya bosuk anasa, sikda hiboka Herodes bek hogunga bo amal yeilimek. Men dara, Herodes be ulumok heik damnya Blastus bedya sikenek mala dobsulul aboka, alak yuba sal yeilimek. Dara, alda keboka mala dosuk dara, sikda dena unuruwaʾ ara, Herodes bedya mokeb ok ganya welemek anasa, sikda Herodes bek biniboka ganya neikaʾ hekoka hibnob aboka molol yeilimek.

²¹ Dara, onoʾ yok sum orowek sumen unuwanamna aboka Herodes bedya gegemok sum enyek, Herodes bera sik senenggom dub nang akleng ongowoka, perob mek alakdobaʾ dub nang bun ekla bunaʾ ak bukoka, nimi nidyaʾ mamagiyiwoka, nara anyek unuwanamna aboka wenewoka lelemok.

²² Dara, nimi nidyaʾ longol yeiniboka kelemek nim edya, Herodes bemba geklewoka lelemekja, ”Anara nimi sirikaʾ yub adya lenggulumla, alda nunja dib gibnaʾanya bedya lelemla,” aboka lelemek.

²³ Dara, wene salek enyek, Herodes bera Imik Neyung si ak imik nenewoka gibnenggulumokjok anasa leboka, Wenelesilnya bedya lero adya Herodes bek obok dara, Herodes bera besa adya delemeekanya somogok.

²⁴ Dara, Imik Neyung yub ara, mok soko neikaʾ ok oboka lelebgiga balamok.

²⁵ Wera Barnabas beb, Saulus beb dara, Yerusalem heik seleb biniboka, sikja sikenek orugesik wa seleb webgogorek dara, Yerusalem heik ab ara, Yohanes yok si Markus be hnon eboka bobdeekanya, onoʾ Antiokhia heikek yeilimek.