LUKAS 19 - PERJANJIAN BARU NALCA YUBA

Yesus Ab Zakheus Beb Yuba

¹ Yesus ara wera Yerikho heikek lanal biniboka, bununaʾ aboka balamok.

² Yerikho heikek ara, mok soko amba rupiah molowoka donaʾanya bonaʾ dubnya ben hnon, alja si nera Zakheus bek ulumok.

³ Alja dara, Yesus ara hurub sonya bek lelemak do senewoka eibnamna senen dulumok bok, nimi mandebnaʾ ab, alab dara nonga burum ab dadya, Yesus nong ok ara pe eibnenggumok.

⁴ Anasemba Zakheus bera berra aboka nimi mengeb hwiboka Yesus yibinamla senen pikek yabalya dara, eibnunaʾ aboka, gal ak welewoka bukumok.

⁵ Yesus ara yalamokaʾ ara, anyagan yok dara, keeb weininggoka, ”Zakheus o, sum enera nara anjaʾ ek sam yanamnaʾ anasa, wera anda berra yinggilom,” hyok.

⁶ Dara Zakheus bera berra aboka sokok yingginiboka, Yesus ak pika dibok.

⁷ Nimi nidyaʾ ara anyek eibek dara, hyak nauba dogom eleng alamek. Anya sikja lelemekaʾ ara, ”Wei, hyak malya nongnya bedya ek nim e bul bilimla bar!” aboka lelemek.

⁸ Wera ek ab dara, Zakheus bera sekoka Yesus ak, ”Wenelesilimnya o, dibaʾ unuwanamnaʾ ara nadya bonaʾ nidyaʾ ara hnoumunga gaboka, bonaʾ orok nang rupiah deknyekanya, bokoka eleganesin, dara onoʾ nimi nidyaʾ nadya sondaʾ leboka usisa nang era, sikba onsok lunuwoka, dombadya anaso sounuwoka eleganesin!” hyok.

⁹ Dara onoʾ Yesus adya alak, ”Beneba Abraham nang yilaʾ ak anasa, sumen nong ak, e nenyek an Imik Neyung adya blebsilikanya, wenyek dib embengaʾ unaʾ elegeisil.

¹⁰ Nimi dibaʾ me ara, weiningdangamoknya nenyek eboka blebnunaʾ aboka yeilimok,” hyok.

Rupiah Yubaʾ Ak Sunuwoka Lebok Yuba

¹¹ Yesus ara anam yuba salamokaʾ anasa kelemek salek, nim adya dara, Yesus ara Yerusalem heikek berem ulumokaʾ anasa, Imik Neyung adya wenyok nong sokok sam wenelemnesil senemekaʾ anasa, wera onoʾ ban sununaʾ enyek hnon sunuwoka lebsukaʾ ara,

¹² ”Nimi dubnya bedya me hnon, mok soko dubnya sekiyiweinija dara, yanamna senewoka yok sokok bilimok.

¹³ Wera bera anam binggumok salek, alda nimi sagobadya alak arawoka wa welemek nang ek yoululum aboka, rupiah yubaʾ damoka yok-yok elegosuk. Alja dara, Na bilimnya salek enyek, ugunda ban rupiah enedya, nauba dolulaʾ aboka, bonaʾ nauba dekoka deklemnelum, hyok.”

¹⁴ ”Bok alja meneng mok nim edya, alda lek senemek. Anasa wera, bera dubnya sekiyiwanamekaʾ ak seleb byuk bok, Nunja mok ara ban benyek, dubnya unaʾ lek amak, wenyaro byik.

¹⁵ Bok ban dubnya bedya me nera seleb dubnya ulumnelam aboka sekiyiwek dara, alja mok sokok saaboka yok. Seleb yok dara, alja wa wenaʾ nang ek, Rupiah deklelulum aboka elegesisaʾ ara, wera hekbadya dokaʾ anyek nekel yananulum, hyok.”

¹⁶ ”Men elegemoknya bedya yeiniboka, Neyung o, anja rupiah elegenulumaʾ ara, nadya dara deklamsaʾ ara, lunuwoka dek sounuwasa dara, sagobadya dok, aboka lebok.

¹⁷ Dara dubnya bedya unumoknya benyek an, Anda pewolum, anda hyak wa pe wenya ululam! Anda meknya nek pe bojam weboka unululamaʾ anasa, wera heika sagobadya hiboka dubnya sekiyiwanenggen, hyok.

¹⁸ Dara onoʾ yoknya bedya yeiniboka, Neyung o, anja rupiah damoka hnonok elegenulumaʾ ara, nadya dara, lambadya dek sounuwasa, hyok.

¹⁹ Dubnya bedya unumoknya bek an, Wera anda pewolumaʾ anasa, heika lambadya heikek dubnya sekiyiwanenggen, hyok.”

²⁰ ”Dara yoknya ben hnon yeiniboka, Neyung o, anja rupiah yubaʾ elegenulumaʾ ara, nadya hwin lubuldanaʾ lomok doronggoka beibsaʾ ara, wera onsok an dam nang bo elegel yagen.

²¹ Neyung, anda ganya gasa nongnya uboka, anda anjaʾ gomaʾ anyek lolowoka dololamaʾ hnon, hnonda anja soruk yokaʾ adya weboka mebnenggumna masa ek anyeb doka daklelamnya bek anasa, nara lok amba ubsa, hyok.

²² Dara dubnya bedya ban unumoknya bek an, Anda hyak malya unaʾ hwam wa wenya bek ululam! Anja lebdalam yuba nong enedyok wera nadya yana lelewanenggen. Anja dara nak ara, nadya gom bok, salyaʾ lolowoka dolomnaʾ hnon, nadya soruk adya weboka mebnenggumna ak ab doka daklamnaʾ hnon, nadya ganya gasa ulumnaʾ ak hnon ella ulunelem de?

²³ Anyek ella ubnulum bok dara, al dam nang yeiniboka beillilamnaʾ amba maklesaknya neb doblulaʾ aboka, nadya elegenggesa rupiah era hekasa senenggom rupiah beilinaʾ ek sam dorongganggunulum do? wenyaboka heibok,” hyok.

²⁴ ”Dara onoʾ dubnya bera anyagan yok ulumek nang ek, Alja bomla rupiah era doboka, sagobadya rupiah yaknya bek an elegolulum, hyok.

²⁵ Bok anyagan ulumek nang edya dara, Neyung o, bera seleb alda sagobadya rupiah ulumla bar, hyek.

²⁶ Danyek dubnya bedya lebnemokaʾ ara, Ugunda hyak pe beknelum, Heknyek nauba ululanya bek anyek, eimik nauba sounuwoka eleganamla. Bok yokaʾ-yokaʾ oroknya bera, alak an mekaʾ ululanya neneba nidyaʾ dobnamla.

²⁷ Anya wenera, nak an alda nunja mok sokok dubnya deisilyek senewoka isaʾ gebnyek nim era, nidyaʾ nimi bo yeiniboka, nadyaʾ saramek anyeb hyakaʾ obnelum, hyok,” wenyaboka lebok.

Yerusalem Heikek Wekel Yok Yuba

²⁸ Wera Yesus ara banyek nidyaʾ laga wenyaboka lebgogowok dara, alda Yerusalem heikek sam mengewoka balamok.

²⁹ Wera Zaitun mein berem Betfage moka, Betania heik berem bokok ab dara, alja yuba doro diriga ban nanga penya nang ek, ugunda men bururum aboka boksuk.

³⁰ Yesus adya dara, ”Ugunda men okan heikek enyek an burumun dara, nim abaksin pam goubenyaʾ anyek, soudyaʾ gereklomeijaʾ ak eibnerum. Pam enera nimi hyak mekaʾ hnon abageiniwanggumeija pam ek ulumla. Anyek ugunda soudyaʾ lobdumunekanya, bo yanarum.

³¹ Nimi yok nim edya, ugunda pam ara hekasa soudyaʾ loblerum aboka heibsija dara, Wenelesilnya bedya do yoururum, amlaʾ anasa ulunam, henerum,” hyok.

³² Yesus adyaʾ yuba doro diriga ban nang penya nang era, biniboka nidyaʾ Yesus adya lemok sok sunuwoka unu gigiwoka eiyirek.

³³ Wera sikda biniboka pam soudyaʾ lobol yabarek sab-sab, pam damnya bedya yeiniboka, ”Ugunda hekasa pam era soudyaʾ loblerum do?” hyok.

³⁴ Dara sikja lebdekja, ”Wenelesilnya bedya na dobnamna amlaʾ anasa ulunam,” herek.

³⁵ Dara soudyaʾ loboka, pam era Yesus ak bo yarek. Wera seleb pam gwadyek sam boksom adya yangiyiwek dara, Yesus ara pam en gwadyek bukiyiwek.

³⁶ Dara Yesus ara pam en eilib bukoka balamok dara, nimi nauba sikja boksom edya Yesus binimok pikek yangaro balamek.

³⁷ Wera Yerusalem heik berem, Zaitun meinik abaʾ ara yanggalamek pikek yanggok dara, nimi nauba Yesus ak diriga balamek nang edya nidyaʾ Imik Neyung adya hyak senenggom damoka lok so migib ununaʾ unulumokaʾ anyek, sikda Imik Neyung ak perob aboka nauba giblemek.

³⁸ Dara sikja lelemekja, ”Wenelesilnya bedya si pik moruboka yok dubnya bera aljaʾ senedya migibaʾ ara hyak pe ululul! Imik heikek ara, perobaʾ anyek uboka, Imik Neyung ak sobaʾ giblenok e!” alamek.

³⁹ Wenyek Parisi nanga sik gangganek an ulumek nang edya Yesus ak, ”Neklesilimnya o, anja yuba doro diriga yalanjak nang ek yuba gelegolulum, helom,” hyek.

⁴⁰ Bok Yesus adya dara, ”Wei, ugunuk hyak dib lebnesin, Sikenek yuba sanaʾ geleganamak dara, wera ban girik danyek yuba sabnemak,” hyok.

Yesus Ara Yerusalem Heik Amba Engewok Yuba

⁴¹ Yesus ara Yerusalem heikek lanal binibmookanya, heik era oka danggiga balamok dara, kemelemookanya, alda engenaʾ sala bukok.

⁴² Yesus adya, ”Angoo, anda sumen enyek, hekaʾ adya anak namenaʾ eleganenggesoʾ ara, orowek ella ubnesom dara, wera pewanasom! Bok, anda hyak mekaʾ eibnenggublam.

⁴³ Anda eimik era, an ululamaʾ gokgobok nidyaʾ ob yeilim-yeilim aboka doluwananjak dara, onoʾ anak dukaʾ lolowoka malya nenewananjak.

⁴⁴ Imik Neyung adya anak blebgununaʾ aboka yanggal salek enyek, anda eibnenggublamaʾ anasa, anak songgija ebelengnaʾ era goʾ gasa denewanggunumla, anya yok nim edya an nonga golob menegoka anak ulunjak nimi nidyaʾ ara ob meneganamak!” aboka engewok.

Yesus Ara Imik Neyung E Lomok Wekok Yuba

⁴⁵ Yesus ara Yerusalem Imik Neyung e eremek wekoka, nimi nauba bonaʾ e lomok dekdo bulumek nimi nidyaʾ doluwoka yakal yabasuk.

⁴⁶ Yesus adya sikenek lebsukaʾ ara, ”Imik Neyung yuba bukuk sam momnya dobokaʾ ara, Imik Neyung adya dara, Nadya e nera nak heng uboka molonen e danamla, hyok bok, ugunja hogaʾ nang e nenelum!” hyok.

⁴⁷ Lika sobaʾ Yesus ara Imik Neyung ek sam yuba lel eleklesuk. Bok Imik Neyung yuba wa gakaʾ dub nang eb, Imik Neyung yuba neksin nang eb, Yahudi sokok dub nang eb dadya, Yesus ak obnemab senewoka dulumek.

⁴⁸ Bok obnemab senen pik era eibnenggumek. Nimi nidyaʾ ara Yesus adya lelemok yub enyek, perob senewoka ganya goluwoka, alja yub enyek pe kelemekaʾ anasa, pika eibnenggumek.