A Wakak na Wasiso un o Iesu Karisito o Mak i tumusi 3 - Nupela Testamen long tokples Kandas

O Iesu i ulangolango pas ara musano una Bung na Sabat

¹ Numur o Iesu i ruk melet utiro una rumu na lotu. Ara musano kura iai, a lamano i kong.

² Ara taro kura det sisio sur tu utna det in takun o Iesu nami. Ra det tamtama wakak taru ut uni, ra in ulangolango pas a musano ra una Bung na Sabat, o awu.

³ Ra o Iesu i inanos a musano ra a lamano i kong lena, “Un tur tiro numugu tan a taro rop.”

⁴ Numur o Iesu i ting det lena, “Asau i tokodos sur din pami una Bung na Sabat? Din pam a wakakino, o a laulau ino? Din ulaun taio, o din um doko taio?” Ikut det kis wowowon ma ka det balu i.

⁵ O Iesu i nas pukpukus det, in balano i sungun nam det, ikut i maris det, uni a balandet i dekdek doko. I inanos a musano ra a lamano i kong lena, “Kodos a lamam.” I kodosi, ra a lamano i tokodos melet.

⁶ Uniutra a kum Parisi det pirso ra det wasiso tomo nama taro anun o Erod, sur tu kisapi ra det in um doko o Iesu uni.

A labino kunur na taro det wan torom o Iesu

⁷ O Iesu tomo nam anun a kum nat na ususer, det wan utiro una papor ina du tasi Galili. Ma a labino kunur na taro taginin una papor Galili det muri.

⁸ A taro det longoro a kum sau ra i pami, ra a susut det wanpat toromi tagitong una ru papor Judia ma Idumea ma tagisapat o Jerusalem, ma tagitong una ara papor danim Jodan ma tagitong o Tair ma o Saidon.

⁹ Ra a kunur na taro det sa bukus, i inanos anun a kum nat na ususer, sur det in waninar tar tu pot. Ra a taro det in bukus talilis pasi, in kas uni.

¹⁰ I sa ulangolango tar a susut munung, ra a ramano kum misait bulung, det sugut saro det utiro toromi, sur det in pam a pinino.

¹¹ A taro ra a kum laulau na nion kura un det, ra det in tama i, det in puku piso sa numugu tano, ma det in woiwoi lena, “Ui a Nutun o God.”

¹² Ikut i turbat dekdek det, sur gong det inanos tar taio lena, i osi.

O Iesu i kabo pas a noino ma aru aposel

¹³ O Iesu i wan usapat una tangai, ra i kabo pas ara taro ra i ling sur det, ra det wan toromi.

¹⁴ I pilok pas a noino ma aru musano, ra i urising det a kum aposel. I pilok det sur det in nan tomo nami, ma sur in tulu det sur det in warawai.

¹⁵ Ma i pitar a dekdek torom det, sur det in lakro ru a kum laulau na nion.

¹⁶ Iri a kum risan a noino ma aru musano ra i pilok pas det: O Saimon, i ra o Iesu i urisingi nam o Pita,

¹⁷ o Jems ma o Jon dersino, aru nutnutun o Sebedi, der ra o Iesu i urising der nam o Boanerges, i kukuraino, aru nutnutun a pungpugur,

¹⁸ ma o Endru, o Pilip, o Batolomiu, o Matiu, o Tomas, o Jems a nutun o Alpius, o Tadius, o Saimon ara tagun a kum Silot,

¹⁹ ma o Judas Iskariot, i ra i usobor tar o Iesu.

Det watungi un o Iesu lena a laulau na nion kura uni

²⁰ Numur ra o Iesu i sa ruk taru una rumu, ara kunur na taro bulung det wanpat toromi, ra katu du bung sur o Iesu ma anun a kum nat na ususer det in nangon uni.

²¹ A kum kukunu, det longoro a wasiso ra uni, ra det wanpat sur det in ben pasi, uni a taro det watungi uni lena ke tokodos mo a nuknukino.

²² Ra a kum tene ususer tagun a Warkurai, ra det wan tagisapat o Jerusalem, det watungi lena, “O Belsebul, a labino anun a kum laulau na nion, kura un o Iesu, ra i ser lakro ru a kum laulau na nion nama dekdekin o Belsebul.”

²³ Ra o Iesu i kabo pas det toromi, ma i wasiso torom det nama kum wasiso elelar lenri, “Pepetlai sur o Satan in lakro melet ru o Satan?

²⁴ Ra tu gapman det melet ut det in waim etalai, a gapman ra in tur dekdek pepetlai?

²⁵ Ma ra lako taro tagun tu rumu det in waim etalai melet kut, ka det in kis tomo melet mo.

²⁶ Ra o Satan in tur na inaim melet kut nam anun a kum tultul, ma ka det in tur tomo, o Satan ken tur dekdek, in rop kut.

²⁷ “Kataio in pet lar pasi sur in ruk una rumu anun tu dekdek na musano, ma in los pas a kum utna tagitiro una nun a rumu, ra ken ker ukai mugu tari. Ra ut in ker ukai mugu tari, in los a kum utna maragom anun a musano ra.

²⁸ A inanos mot nama lingmulus, din unus ru a kum sakino petutna rop anun a taro, ma anundet a kum sakino wasiso kai un o God.

²⁹ Ikut ra taio in wasiso laulau una Tokodos na Nion, katutaio melet mo in unus lar pasi. Anun a sakino petutna ra, in kis tukum.”

³⁰ O Iesu i wasiso lenri, uni det watungi uni lena, “A laulau na nion kura uni.”

O nan o Iesu tomo nama kum tistisino

³¹ Numur o nan o Iesu ma a kum tistisino det wanpat. Det tur taru kut nago upiso ra det tulu ara sur in ben pasi torom det.

³² A kunur na taro kura det kis talilis pasi, det inanosi lena, “O nam ma a kum tistisim kunago det upiso. Det nem na tama ui.”

³³ Ra i ting det lena, “Mot nuki osi o nang, ma osi det a kum tistising?”

³⁴ Numur i tamtama torom det rop ra det kis talilis pasi, ra i watungi lena, “Tama i, det ri o nang ma a kum tistising!

³⁵ Uni osi ra i ser mur a nemnem anun o God, i ra o tising a musano, ma o tising a ino, ma o nang.”