Aposel 8 - Nupela Testamen long tokples Kandas

¹ Ra o Sol i mulaot sur din um doko o Stiwen. Una bung ra di um doko o Stiwen, a taro det turpasi sur det in ukadik a taro na lotu sapat o Jerusalem, ma a taro na nurnur rop det wan sarara una aru papor Judia ma o Samaria. Ikut, a kum aposel ka det wan, det kis ut.

O Sol i ban laulau a taro na lotu

² A kum tene lotu mulus det por tar o Stiwen, ma det domosi.

³ Ra o Sol i ban laulau a taro na lotu. I ruk una nundet a kum rumu, i dat pas a kum musano ma a wardain, ra i uruk tar det una karabus.

O Pilip i warawai tong una papor Samaria

⁴ Ma det ra det wan sarara tagisapat o Jerusalem, det warawai nama Wakak na Wasiso una kum tamon ra det wan iai.

⁵ O Pilip i wan utiro una labino tamon tong una papor Samaria, ma i warawai un o Karisito torom det.

⁶ A kunur na taro det longoro a wasiso anun o Pilip, ma det tama a kum utna na ukisin ra i pami, ra det nem doko i sur det in longoro a kum wasiso ra i watungi.

⁷ I lakro ru a kum laulau na nion gusun a susut, ma a kum laulau na nion, ra det pirso, det kukukuk dekdek. Ma i ulangolango pas a susut ra a pinpinin det i mat, ma det kai, ra ka det wan lar pas.

⁸ Ma a taro tagun a tamon ra, det gas doko.

O Saimon a tene sangsagor

⁹ Ara musano tagitiro iai, a risano o Saimon. I ser sangsagor una susut na kilalo, ra a taro Samaria det ser kisin una kum utna ra i ser pami. Ma i warango pasi ut umatan a taro.

¹⁰ A taro rop, a kum lamlabino ma a taro oros kut, det rop det ru i, ma det watungi uni lena, “A musano ri i utur ukai a dekdekin o God, a dekdek ra di watungi nama Labino Dekdek.”

¹¹ Ra det ser longoro wakaki, uni tagun numugu utmakai, i ser ukisin det nama anun a kum sangsagor.

¹² Ikut uniri, a kum musano ma a wardain det nurnur una Wakak na Wasiso ra o Pilip i warawai nami, una matanitu anun o God, ma una risan o Iesu Karisito, ma di baptaiso det.

¹³ O Saimon utkai i nurnur, ma di baptaiso tari. I mur likliki mukut o Pilip, ra i tama a kum ukinalong ma a kum utna na ukisin ra o Pilip i pami, ra i kisin doko uni.

¹⁴ A kum aposel ra det kis sapat o Jerusalem, det longoro i lena a taro Samaria kai det sa mur a wasiso anun o God, ra det tulu ru o Pita ma o Jon torom det.

¹⁵ Ra der wanpat, der wararing un det sur det in los a Tokodos na Nion,

¹⁶ uni ke kis utmakai un taio tagun det. Di baptaiso tar det kut nama risan a Labino o Iesu.

¹⁷ Numur o Pita ma o Jon der ubek a lamander sapat netes un det, ra det losi maragom a Tokodos na Nion.

¹⁸ O Saimon i tama i ra aru aposel der ubek a lamander sapat netes una taro ma di tabor det nama Tokodos na Nion. Ra i los a mani torom der,

¹⁹ ma i watungi lena, “Mur in pitar a dekdek ra tang, sur iau kai an ubek a lamang sapat netes un taio sur in los a Tokodos na Nion.”

²⁰ Ra o Pita i balu i lena, “Ui tomo nam anum a mani mur in iru, uni u nuki lena un kul a etabor anun o God nama mani.

²¹ Katu tinibo ma katu utna anum kuri nin una utna ri, uni ke tokodos in balam umatan o God.

²² Un nukpukus gusun anum a sakino petutna ri, ma un wararing torom a Labino. Kutiro in unus ru a sakino nuknukim,

²³ uni a tama ui lena in balam i bukus nama sakino nuknuk, ma a sakino petutna i ker ukai ui.”

²⁴ Ra o Saimon i balu i lena, “Mur in wararing torom a Labino un iau, sur gong tu utna tagun a kum utna ra mur watung tari, in nanpat un iau.”

²⁵ Ra o Pita ma o Jon der sa wasiso talapor taru una kum utna ra a Labino i pami, ma der sa warawai taru kai nam anun a wasiso, der milet melet usapat o Jerusalem. Ma una nunder a inawan, der warawai nanan nama Wakak na Wasiso una susut na tamon una papor Samaria.

O Pilip i etorom ara musano a te Itiopia

²⁶ A ensel anun a Labino i watungi tan o Pilip lena, “Un katutur, ma un nan utong una matmatano tobar sur a kisapi tagisapat o Jerusalem utong o Gasa. A kisapi ra, i wan una nubual kalako taro uni.”

²⁷ Ra o Pilip i katutur pas, ma i wan. Ra der etorom nam ara musano tagitong o Itiopia, a labino tene tamtamabat a ututna anun a Kandake, a kwin anun a taro Itiopia. A musano ri i wan usapat o Jerusalem ra i lotu torom o God.

²⁸ Numur i milet melet sur anun a tamon. Una nun a inawan, i kis taru una karis, ma i luk nanan a buk anun a poropet Aisaia.

²⁹ Ra a Tokodos na Nion i watungi tan o Pilip lena, “Un nan milau a karis, ma un nan tomo nami.”

³⁰ Ra o Pilip i kalabor sur a karis, ra i longoro a musano ra i luk a buk anun a poropet Aisaia, ma i tingi lena, “Le, u talapor ut un asau ra u luki?”

³¹ Ra i balu i lena, “An tasman petlani, ra kataio in watung palosi torom iau?” Ra i saring o Pilip sur in kas ma der in kis tomo.

³² Iri a kum wasiso na Buk Tabu ra i luki: “Di beni elar nama sipsip, sur din um doko i. Ke wasiso, elar nama sipsip ra i tur wowowon torom o naro ra i kumuri.

³³ Di ban umaimai tari, ma ka di warkurai i nama tokodosino. Osi ra in wasiso una nun a kum nat? Katu nutunu, uni i rop anun a nilaun taginin una rakrakon bual.” Ais 53:7-8

³⁴ Ra a te Itiopia i watungi tan o Pilip lena, “Un inanos iau, a poropet i watung a wasiso ri un osi? Uni ut, o un taio gisen?”

³⁵ Ra o Pilip i turpas a papalos toromi. I inanosi una Wakak na Wasiso un o Iesu, turpasi ut una buk ra a te Itiopia i luki.

^36-37 Ra der wan nanan una kisapi, der wan taru un ara danim, ra a te Itiopia i watungi tan o Pilip lena, “Tama i, iri a danim, asau melet mo i turbat iau sur gong di baptaiso iau?”

³⁸ Ra i turbat a karis sur in tur. Numur der wan pirso sur a danim, ra o Pilip i baptaiso i.

³⁹ Ra der saur gusun a danim, uniutra a Nion a Labino i los ru o Pilip. Ra a te Itiopia ke tama meleti mo. Ikut a te Itiopia i wan melet una nun a inawan nama labino gasgas una nun a nilaun.

⁴⁰ O Pilip i tama i lena, kurong mi una tamon Asdot. I wan tagitiro iai, ra i warawai nanan nama Wakak na Wasiso una kum tamon tuk tong o Sisaria.