Aposel 1 - Nupela Testamen long tokples Kandas

^1-3 Torom o Tiopilus, Una nung a mugano buk, a tumus a kum utna rop o Iesu i sa pam tari ma i sa ususer tar a taro nami, una turturkibin anun a pinapam, tuk una bung ra o God i ben toto pasi usapat una langit. Numur tan anun a minat, i wanan pat melet torom anun a kum aposel, ma a kum utna ra i pami i ulingmulusi lena, i sa laun melet gusun a minat. A wat na noino bung i kis melet pasi nin upiso ra i wanan pat torom det, ma i wasiso una matanitu anun o God. Ra i ususer tar anun a kum aposel nama dekdekin a Tokodos na Nion, a kum aposel ra i pilok pas det.

⁴ Un ara bung tagun a kum bung numur tan anun a katkatutur melet gusun a minat, det kis tomo una inangon, ra i turbat det lena, “Gong mot wan gusun o Jerusalem, mot in kis langlang pas a Tokodos na Nion, ra o Tita i sa uliliman taru uni, ra a sa inanos tar mot nami.

⁵ O Jon i baptaiso nama danim, ikut ken suano i, ra din baptaiso mot nama Tokodos na Nion.”

O Iesu i wan toto usapat una langit

⁶ Ra a kum aposel det kis tomo nam o Iesu, det tingi lena, “Labino, pepetlai, uniri un pitar melet tar a gapman torom met a taro Israel, sur met ut met in tamtamabat met ma met in kis langolango gusun a gapman Rom?”

⁷ I balu det lena, “Awu sur a utna anumot sur mot in tasman a bung o a du bung ra o Tita i sa kubus tari sur in pitari uni.

⁸ Ikut a Tokodos na Nion in kis un mot, ma mot in utur ukai a dekdek, ma a utna ra mot tama i un iau, mot in wasiso uni sapat o Jerusalem, ma una kum tamon rop tong una ru papor Judia ma o Samaria, ma una rakrakon bual rop.”

⁹ Ra i sa rop anun a wasiso, o God i ben toto pasi usapat una langit. Ra det tamtama utmakai, a bakut i pulus bat pasi gusun anundet a tamtama.

¹⁰ Det tatatado utmakai usapat una bakut ra o Iesu i wan gusun det, ra aiapiap kut aru musano ra der emar nama kum kabang na malu der tur pat nisandet.

¹¹ Ma der watungi lena, “Mot a kum te Galili, sur asau ra mot tur ma mot tatado usapat una bakut? O Iesu mo sapat, i ra o God i sa ben pasi gusun mot usapat una langit, in nanpat melet urin, elar ut nami ra mot tama ru i, ra i wan usapat netes.”

O Matias i keles o Judas Iskariot

¹² Numur a kum aposel det wan gusun a tangai di watungi nama Tangai na Oliw ra det milet melet usapat o Jerusalem. I milau i kut o Jerusalem.

¹³ Ra det wanpat sapat o Jerusalem, det ruk una rumu ma det kis una kukur rumu sapat netes. A kukur rumu ra det ininep ma det kiskis uni. Det ri, ra det kiskis tomo tiro iai: O Pita, o Jon, o Jems, o Endru, o Pilip, o Tomas, o Batolomiu, o Matiu, o Jems a nutun o Alpius, o Saimon ara tagun a kum Silot, ma o Judas, a nutun ara Jems gisen.

¹⁴ Det tomo nam o Maria o nan o Iesu, ma a kum tistisin o Iesu, ma a ramano kum wardain kai. Det rop ka det mana nama niaring una kum bung.

¹⁵ Un ara bung epotor tan a kum bung ra, a kum tene nurnur det kis tomo. Det elar nam ara mar ma ru noino det. O Pita i tur ma i watungi lena,

¹⁶ “A kum tistising, a wasiso anun a Tokodos na Nion, ra o Dewid i wasiso taru uni numugu utmakai una Buk Tabu, uniri di sa pam sot pasi. I wasiso un o Judas, i ra i mugu det ra det pam pas o Iesu.

¹⁷ I ara tagun met, ma i kai i los a tinibo tomo nam met una pinapam ri.”

¹⁸ Ra o Judas i kul pas a du piso nama mani tagun anun a sakino pinapam ra i pam tari. Numur i puku pirso tiro iai una nun a du piso, in masarino i mugu. Ra in balano i tupurus potor, ma in narus na balano i tilior piso rop.

¹⁹ Det rop ra det kis tiro o Jerusalem, det longoro i, ma det watung a piso ra nam anundet a wasiso, Akeldama, a kukuraino, a piso na gap.

²⁰ O Pita i watungi utkai lena, “Di sa tumus tari una Kum Kelekele anun o Dewid lena, ‘A kinano in belbel, ma gong taio i kis uni.’ Sng 69:25 Ma di tumus tari kai lenri, ‘Taio in kelesi una nun a pinapam.’ Sng 109:8

^21-22 I mo ra i wakak ra dat in pilok pas tu musano, sur i kai in tene wasiso talapor tomo nam dat, un o Iesu lena i katutur melet gusun a minat. I wakak ra a musano ra, taio ut tagun dat ra dat ser kis tomo nam o Iesu, turpasi ra o Jon i baptais, tuk una bung ra di ben pas o Iesu gusun dat usapat una langit.”

²³ Ra det watung pat pas aru musano: O Josep, di watungi nam o Basabas, ma ara risano kai o Jastus, der nam o Matias.

²⁴ Ma det wararing lena, “Labino, u sa tasman a balan a taro rop, un ese met, osi mulus tagun der ri u sa pilok pasi,

²⁵ sur in los a pinapam na aposel, ra o Judas i sa mat pas gusuni ma i sa wan sur a tamon ra i sot nam anun a sakino petutna.”

²⁶ Det pam a pinapam na pipilok nama ru wat, ra a wat anun o Matias i wanpat. Ra det luk tomo pasi nama noino ma ra aposel.