II Samuel 4 - Sră Goh 2018

Isbôset gơkòl tơnchơt

¹ Tòm tŭ Isbôset kòn klau Sol dê kơno la Apner neh chơt tòm Hebrôn, gen khai gơdô nùs mơ jơh Israel rngòt rngơt ngan.

² Mơ tai, kòn klau Sol dê gơs bàr nă cau at bồ mpồl ling jak brồ tòmlơh nisơna: dô nă sơnđan la Baana, dô nă sơnđan la Rekap; bol khai la ală kòn klau Rimmôn cau Benjamin tòm Beerôt. Bơh Beerôt geh sền la gơrê bal mơ Benjamin,

³ Tŭ hơ̆ làng bol Beerôt neh dô pleh hơ Gitaim mơ bol khai la cau lơgar bơdìh ơm tềng hơ̆ jơl tus di ngai do.

⁴ Jônathan, kòn klau Sol dê, gơs dô nă kòn klau gơlte bàr đah jơng. Khai neh pram nam, tòm tŭ kơno jơnau yal bơh Sol mơ Jônathan tus bơh Jejreel. Cau ròng khai yò khai nàng dô pleh, mơya tòm tŭ khai ntoat dô sơrbac sơrbang, khai gơplơ̆ mơ gơlik kwet gơlte. Sơnđan khai la Mephibôset.

⁵ Mơ tai, Rekap mơ Baana, ală kòn klau Rimmôn cau Beerôt lik lòt; mơ bol khai tus tềng hơ̆ tòm tŭ trồ gam duh, tòm tŭ Isbôset ơm bic rlô gùl ngai.

⁶ Bol khai mut tòm dơlam hìu, lơh be lòt ai kòi mi, mơ bol khai srơp Isbôset di klung khai dê. Gen Rekap mơ Baana bi khai dô pleh.

⁷ Bol khai neh mut tòm hìu tòm tŭ Isbôset ơm bic hơđang cơnòng tòm ơdŭ bic. Bol khai brồ lơh khai, tơnchơt khai mơ koh bồ khai. Bol khai ai bồ Isbôset mơ lòt gùng jơh mang tus hơ Araba.

⁸ Bol khai cèng bồ Isbôset tus hơ Dabit tòm Hebrôn, mơ đơs mơ cau bơtau lah: “Do la bồ Isbôset kòn klau Sol, cau sò tơm bơtau dê, la cau neh jòi gùng nàng tă bơta kis bơtau dê. Ngai do Yàng Jehôwa neh sal tê cau tòm añ in la bơtau hơđang Sol mơ jơi bơtiàn khai dê.”

⁹ Dabit ho wơl mơ Rekap mơ Baana la ală kòn klau Rimmôn cau Beerôt, mơ lah: “Di ngan kung be Yàng Jehôwa kis, la Bơtau neh dong tă añ klàs bơh di ală bơta rung rài bòl glar,

¹⁰ tòm tŭ gơs dô nă cau tus yal añ in git la Sol neh chơt, mơ kơlôi lah khai yal añ in dô nơm jơnau niam, añ neh tơnchơt cau hơ̆ tòm Jiklak, hơ̆ la phan ƀàn añ neh ai khai in bơh jơnau yal hơ̆.

¹¹ Gen oă rlau mơ hơ̆ tai, tòm tŭ gơs ală cau iơh bơsak neh tơnchơt dô nă cau ò tìs glài ơm bic hơđang cơnòng tòm hìu is khai dê, añ rơp ò lùp wơl mhàm khai dê bơh di tê bol mê mơ tơnroh bol mê bơh di plai ù ò ơ?”

¹² Behơ̆ Dabit ai jơnau sồr ală cau pơnu khai dê mơ bol khai tơnchơt bàr nă cau hơ̆. Bol khai koh tê mơ jơng bol hơ̆ dê mơ yồng ƀồc bol khai rềp di tơnau Hebrôn. Mơya bol khai ai bồ Isbôset mơ tơp tòm bơtô ƀồc Apner tòm Hebrôn.