उदुःतो कताकून 8 - Korwa Bible

सात नमार मोहर अरू सोनाराः डुबहा

¹ भेड़ा होन सात नमार मोहरे उघाड़तेड दो सेरमो देसरे आधा घंटा वरी कहिसाः अरो मेर अयूमगान।

² हनते ईंग सातगोटोंग बराहीलकू भगवानराः मड़ंगरे चड़ाँतिंग ञेलतेडकुःआ। हँकू मेमेडटोंग मेमेडटोंग मरंग सोहनाईकू पवावनेना।

³ भगवानराः गदी मड़ंगरे मीटोंग धाम दोहोना। अरू एटाःयीग, सेरमो देसरीग बराहील सकलाकू सोलोंगता हना सोनाराः डुबहा साबतेडखन धाम कुटीरेय चड़ाँयान। अरू हना गदी मड़ंगराः सोनाराः धामरे भगवानरिकुःआ सुद होड़कूराः अरजी सुदा देगगे लगा हाँयग बराहील मुरुक सकलाय पवावनेना।

⁴ दो हना सकलाराः सोकोल भगवानरिकुःआ सुद होड़कूराः अरजी सुदा, हाँयग बराहीलराः तिःई अते भगवान एचेरे सोदोरयान।

⁵ हनते हाँयग बराहील सकलाकू दोहोता हना सोनाराः डुबहा गोःतेडखन हना धामराः सेंगेले रेमतेरा अरू चउंदीसरेय गिरहागोतेड। हनमेला ठेड़ररे विड़चेड़नेना अरू बदरी हदूड़नेना अरू ओत डोलाःआ।

सातगोटोंग मरंग सोहनाई

⁶ हनते सातगोटोंग सेरमो देसरिकुःआ बराहीलकू सातगोटोंग मरंग सोहनाई ओओंग लगाकू सपड़ावयान।

⁷ मड़ंगीग बराहील अनँयग सोहनाईए ओंगतेरा दो, बलंगीते मेसात अरील अरू सेंगेल, दाः झड़ियाव उयुःता इया ओतरे लोजोरनेना। हनमेला ओत अरू सींग दूबकून अरू जमा हड़ियड़ बीरकून पेय बंटारे मेमेड बंटा लो एंडायान।

⁸ हनते बार नमारीग बराहील अनँयग मरंग सोहनाईए ओंगतेरा दो, मीटोंग सलगावतो मरंग पहाड़ इयाःआ तोनोंगाः जिनिस, समुंदररे लोजोरयान।

⁹ हनमेला समुंदरराः दाः पेय बंटारे मी बंटा बलंगीयान, अरू समुंदररिकुःआ जिया-जउतकू पेय बंटारे मी बंटाकू गोएगयान, अरू जहाजकून पेय बंटारे मी बंटाकून लाय एंडायान।

¹⁰ हनते पेय नमारीग बराहील अनँयग मरंग सोहनाईए ओंगतेरा दो, मुरी इया सलगाःआ हना मीटोंग मरंग इपील सेरमो अते लोजोरयान। हना इपील नईकून अरू दाः सूतीकूनराः पेय बंटाराः मी बंटारे लोजोरयान।

¹¹ हाँयग इपीलराः ञाव दोहोना हटी तोरगे। हनते जमा दाः पेय बंटारे मी बंटा हटीयान अरू मुरुक होड़कू हना हटी दाःकू ञूतेड अतेकू गोएगयान।

¹² हनते चइर नमारीग बराहील अनँयग मरंग सोहनाईए ओंगतेरा दो, बेर, बांगो अरू इपीलकू पेय बंटारे मी बंटा अंदरायान। हनालगा दिनरे चइर घंटा अंदरायान अरू हनन इया रइतरे हों चइर घंटा भीट भीट अंदरायान।

¹³ हनते मीटोंग कुड़ीड सेरमोरे उडाःतोयिंग ञेलतिरिया अरू हाँयराः मुरुक सटी अरोयिंग अयूमतेरा, “पेयगोटोंग सेरमो देसरिकुःआ बराहीलकू मरंग सोहनाई ओंग लगा सपड़ावतो इदानकुःआ। हनालगा चउंदीसरिकुःआ होड़कू लगा सिकिसता, सिकिसता, मुरुक सिकिसता होयाःता।”