पिलिपी 4 - Korwa Bible

¹ दो ईंगरिकुःआ अजी बोपोहकूतिंग, ईंग अपेयिंग दुलारता अरू अपे ञेञेल लगायिंग उंभराःतना। अपे बदीरे ईंग बहालिंग दोहोनता अरू अपे भगवान अगीते ईंगराः बनी इया इदानपेःआ। हनालगा अपे ईंग कताकेरा, हनन इया बिसवासरे बड़ियाड़गुःपे।

टुटीग सलाह

² ने एवदी अरू सुंतुकी, अबा परबू ईसू एचेरेबा बिसवासगेतना। हनालगा ईंग अबा एचेरे गोड़न पइयनकियानखनिंग कतायतना, “अबा अलोबा कड़ी होड़ेंग, मनदो सलसतरेबा दोहोन।”

³ ने सुजगे, आम ईंगरीग बिसवासगेयीग सेवा देंगवा होड़ हवे। नँकिनाः अइमीकिन, कलमेस अरू एटाः सेवा देंगवा होड़कू अरू ईंग सुदा, नपाय सरवन कता उदुःगे लगा मुरुककिन सेसा-दुराकिया। अरू नँकुःआ जमा होड़कूराः ञाव, जीवराः कागदरे भगवान ओजाःकेरा। हनालगा ने सुजगे, आम नँकिनाः अइमीकिन सलसतरेकिन दोहोन लगाम संघरावाकिन।

⁴ अपे परबू एचेरे जमा बेला बहालतेपे दोहोन! अरूयिंग कतायतना, अपे बनाहालतेपे दोहोन!

⁵ परबू ओहेने कुदा वेगता। हनालगा अपे सुधिया होड़कू इयापे जियाः।

⁶ तोनोंग इयाःआ ओंगोल कुहकाःरे अपे अलोपे दोहोन। मनदो जमा बरानाः लगापे अरजीगोड ञवन। अरू धनियाबाद घड़ीन अपे लगा हुडिंग बगरा इदा हना भगवान एचेरेपे असेय।

⁷ हनन इयापे एचेय दो ईसू मसी सुदा मिनीयान अते भगवान अपेराः जीव अरू ओंगोल सलसतरेय दोनोहोगोडता। अबू मनुवाकू नाःआ सलसत, कहियो ओरोबू सुदी तजाः अवेतेरा।

⁸ दो ईंगरिकुःआ अजी बोपोहकूतिंग, ईंग नाःआ चिठी टुटीगगे अते मड़ंग अपे एचेरेयिंग कतायतना, सताय अरू मान मरजइतगे इदा हना कताकून, अरू नपाय अरू सुद इदा हना कताकून, अरू होड़कू ननायगोडकूता अरू भल-भलायवाकूता हना कताकून, हना जमाकूनपे ओंगोलगोड ञवन। अरू नाय नपाय अरू जागगे इयाःआ इदा हनानाः कताकूनपे ओंगोलगोड ञवन।

⁹ ईंग अपेयिंग चेडकेरा अरूयिंग कता उदुःतेरा अरू अपे ईंग अतेपे अयूमकेरा अरू अपे ईंग एचेतपे ञेलकेरा, हना जमाकूनपे मनावगोड ञवन। दो सलसत एमेवाबूता, हाँयग भगवान अपे सुदाय दोनोहोनता।

पिलिपी बिसवासीकू पउलूस धनियाबादगेतना

¹⁰ ने अजी बोपोहकूतिंग, अपे मुरुक दिन तयोमरे ईंग अरू संघरावायिंग लगा सपड़ावतो इदानपेःआ। हनालगा अपे बदीरे ईंग मुरुक बहालरे इदानिंगा। अपे ईंग संघरावा लगापे ओंगलेःआ, मनदो अपे दाव मेरपे पवावगान। हनालगा अपे ईंग मेरपे संघरा अवेवागडिंग।

¹¹ अपे अहापे ओंगले नाँय लगा तोनोंगाः हुडिंग बगरा इदा। हनालगा नाँय नाःआ इयाय कतायतना, माःआन। ईंग तोनोंगाः हाल-चालरे संतोकगे लगायिंग चेडकिया।

¹² ईंग एचेरे गुनमिन दोहोन सहे बगरा दोहोन, बनर बेलारे संतोकरे दोहोन लगायिंग सुदीयता। ईंग जमालेःआ हाल-चालरे संतोकरे दोहोन लगायिंग सुदीयता, बीत दोहोन लगा सहे रंगेगतो दोहोन लगा अरू गिरहत दोहोन लगा सहे गरीब दोहोन लगा हों ईंग सुदीयता।

¹³ ईसू मसी ईंगराः जीवे बड़ियाड़गेतान अते ईंग जमालेःआयिंग एचे अवेयता।

¹⁴ हनते हों अपे करा इया ईंगराः कटसिया बेलारेपे संघरावातिरिंगा, हना दो ननपाय दोहोना।

¹⁵ ने पिलिपीरिकुःआ होड़कू, अपे अँननपे सुदीयतना, मड़ंग मी तुरहा भगवानराः नपाय सरवन ईंग अपे एचेरेयिंग परसारतेरा। हना तयोमरे मकिदुनिया देस अतेयिंग सलाः मेला अपे अड़ाःकेडखन तोनोंगाः कलसियारिकुःआ होड़कू ढिबुवा एमेवाडखन मेरकू संघरावागडिंगा।

¹⁶ ननन इया ईंग तिसलूनिका सहररेयिंग दोहोन मेला हों ईंग लगा हुडिंग-बगराना दो अपे घड़ी घड़ी ईंगपे संघरावातिरिंगा।

¹⁷ ईंग बदीरे अपे अहापे ओंगोलगे, नाँय तोनोंगाः संघरा पवाः लगाय चहाःतना, माःआन। मनदो ईंग चहाःतना, अपे ईंगपे संघरावातेरा, हनाते भगवान अपे इमाने एमेवापे।

¹⁸ अपे इपापुरूदितूसते ईंग लगापे वारतेरा हना संघरा, ईंग पवावकियानखनिंग संतोकयना। नुँहू ईंग एचेरे तोनोंग इयाःआ हुडिंग बगरा कोवानेःआ अरू जनामालेःआ इनिदा। अपेराः संघरा भगवान लगा नपाय महक एमेयता हना बलिदान इया इदा अरू हनाते हाँय ननाययना।

¹⁹ ईसू मसी अबू लगाय एचेकेरा हना अते भगवान अपेराः जनामालेःआ हुडिंग बगरा, अनँयगराः आन-धान अतेय एमे पुरावगोडता।

²⁰ दो अबूरीग अपांग भगवान अबू सगर सइट वरीबू जागगोड ञवन। आमीन!

टुटीग सलाम

²¹ ईसू मसीरे मिनी इदानकुःआ, भगवानरिकुःआ जमा सुद होड़कू एचेरे ईंग अगीते मसी सलाम माःआनपे कतावाकू। ईंग सुदा इदानकुःआ हँकुःआ अजी बोपोहकूतिंग हों अपेकू मसी सलामतना।

²² नाःआ सहररे अरू कइसर राजाराः ओड़ाःरे इदानकुःआ, भगवानरिकुःआ जमा सुद होड़कू अपेकू मसी सलामतना।

²³ परबू ईसू मसी अपेराः जीवे मयावा।