पिलिपी 3 - Korwa Bible

भगवान मड़ंगरे बेगर गारबार होड़कू

¹ ने अजी बोपोहकूतिंग, ईंग अपे एचेरे अरूयिंग कतायतना। अपे ईसू मसी सुदा मिनीयान अते बहालतेपे दोहोन। ईंग मड़ंगिंग ओजाःतेरा हनानाः कता अपे लगा घड़ी घड़ी ओजाःगे लगा ईंग मेरिंग लंगानता। अरू ननानाः अते अपे लबरा चेडदार होड़कू अते बनसावतोपे दोहोनता।

² खखतना लगाकू कतायता हँकुःआ कुतुकू इया बेलूर होड़कू अते सवासितीपे दोहोन।

³ मनदो अबू भगवानराः बिरुवाते हाँय जाग घड़ीन ईसू मसीबू मान मरजइतता। अरू होड़कूराः खतना इयाःआ रिती-बिधीरे मेरबू भरसाता। हनालगा सताय खतनात होड़कू अँननबू हवे।

⁴ ईंग इनिंग एचेरे भरसान लगा मुरुक ओंगोलकून इदा। तोनोंगीग होड़ अनँयग आँयगरे भरसागुः लगाय ओंगलेतना दो, हाँय अते हों ईंग इनिंग एचेरे बगरायिंग भरसा अवेयता।

⁵ नाःआ कता अयुमेपे, ईंग जनमावनेनते आठ दिनरे ईंगराः खतना होयानेना, अरू ईंग इसराएलरीग नइड़-बाँस होड़ हवे, अरू बिनियामीन गोतोर अतेयिंग जनमावकिया, अरू ईंग सताय एहूदा होड़ हवे, अरू एहूदाकूराः नियमकून नपायतेकू मनाःता हँकुःआ फरीसी गउदारीग होड़ हवे,

⁶ अरू मोसेसराः नियम नपायते मनाः बदीरे ईंग बेगर गारबार होड़िंग दोहोना। भगवान मान मरजइत लगा सनपड़ावतोयिंग दोहोना अरू हनालगा कलसियारिकुःआ बिसवासी होड़कूयिंग संतावतेरा।

⁷ मनदो ईंग लगा नफा दोहोना, हना जमाकून ईसू मसी लगा नुँहू हनी माःआनिंग ओंगलेतना।

⁸ हाव, परबू ईसू मसी नपायते सुदीगेय लगायिंग चहाःतना अरू हाँयिंग सुदी, ईंग लगा जमालेःआते मनइद कता हवे। ननानाः लगा मड़ंगरे ईंग लगा नफा दोहोना, हनानाः कताकून सदाःआ इदा माःआन ओंगोलतेडखनिंग अड़ाःगोतेडा। अरू ईसू ईंग पवाः लगा अरू हाँय सुदा मिनी जुवाः लगा हना जमाकून खरसी हवे माःआनिंग ओंगलेतना।

⁹ नुँहू ईंग ईंगराः तोनोंगाः नपाय बुता एचे अते सहे नियम मनाः अते भगवानराः ओंगोलरे बेगर गारबार होड़ मेरिंग बड़ाँवगना, मनदो ईंग ईसू मसी एचेरेयिंग बिसवासकेरा, हना अते ईंग भगवानराः ओंगोलरे बेगर गारबार होड़िंग बड़ाँवकिया। हाव, बिनिसवास एकलाते भगवानराः ओंगोलरे बेगर गारबार होड़िंग बड़ाँवकिया।

¹⁰ ईसू मसी जमालेःआते सुदीगेय लगायिंग चहाःतना। ईसू मसी गोएगतो अते भगवान जियाव रेमतिरिया हना जंगर अटकारगे लगा हों ईंग चहाःतना। अरू ईसू मसी करा इया कटसिया सहावतेडखने गोएगनेना हन, ईंग हों बुझावकियानखन अटकारगे लगायिंग चहाःतना,

¹¹ जेमहा होयाःकून करे ईंग हों गोएगतो होड़कू अतेयिंग जियाव रिमुः।

मड़ंगाः कताकून लगा नोटोः-नोटोः

¹² ईंग नाःआ जमाकूनिंग पवावयान सहे जमालेःआते नपाय इदानिंगा माःआन मेरिंग कतायतना। मनदो ईसू मसी ईंगे साबकेरा हनानाः ओंगोल पुरावगे लगायिंग मिहिनइतगेतना।

¹³ ने अजी बोपोहकूतिंग, ईंग पवावकिया माःआनते अहगरबी इया कोवायिंगा, मनदो ईंग मिनीटोंग ओंगोलरे इदानिंगा। ईंग तयोम अगी इदा हना कताकून लिड़िंग एंडाकेडखन मड़ंग अगीराः कताकून लगायिंग तक-तकाःतना।

¹⁴ बतकाः होड़कू इमान पवाः लगा तक-तकावकियानखनकू बतकाःता हनन इया ईसू मसीते सेरमो देसराः इमान पवाः लगा भगवान ईंगे राःकेरा।

¹⁵ अबू अते, भगवानराः ओंगोल इया जमालेःआते उडु-बुडूत इदानबुःआ, अबू नाःआ इयाःआ ओंगोलरे सनालावगोड ञवन लगा इदा। मनदो तोनोंगीग एचेरे एटाः इयाःआ ओंगोल इदान दो, भगवान हँकूराः हना ओंगोल ननपायतेय एचे सुदीगोडकूता।

¹⁶ दो अबू चेडकिया हनन इया सनालावगोड ञवन लगा इदा।

¹⁷ ने अजी बोपोहकूतिंग, अपे जमाकू ईंग इया नपाय लूर-नेवनपे सलाः। अरू अले इया नपाय लूर-नेवनतेकू सलाःतना, हँकुःआ होड़कूपे सहियार।

¹⁸ ईंग मड़ंगरे अपे एचेरे मुरुकिंग कता उदुःवाडपेःआ अरू नुँहू हों ईंग अपे एचेरे इनियाम घड़ीनिंग कता उदुःगेतना, मुरुक होड़कू मसीराः कुरूसरिकुःआ मुदइ होड़कू इयाकू जियाःतना।

¹⁹ हँकुःआ होड़कू भगवान लाय एंडाकू लगाय ओंगोल दोहोकेरा। हँकू अँननकूराः नफा लगा अंदू घड़ीनकू दोहोनता अरू गियुः इयाःआ कताकूनरेकू बड़वारता। हँकूराः ओंगोल चउंदीसराः जिनिसकूनरे टक-टकित दोहोनता।

²⁰ मनदो अबूराः राइज सेरमो देस हवे अरू सेरमो देस अतेय कुदा वेगता अबूरीग सडावदार परबू ईसू मसी लगाबू टकागोड ञवनतना।

²¹ दो ईसू मसी कुदा वेग मेला अबूराः अबड़ अरू गुजुः इयाःआ देह बदलाकेडखन आँयगराः देह इयाय अगम नपाये तुलागोडता। हाँयके जमा जिया-जउतकून एचेरे हातपात इदा अरू हाँय अनँयग जंगरते अबूराः देहे बदलावगोडता।