पिलिपी 2 - Korwa Bible

ईसू मसीराः ओंगोल इयापे जियाः

¹ ईसू मसी अपेय कता-बहालकेरा अरू हाँय दुलारकेडपेखन अपेराः जीवे हड़ियाड़केरा। सुद बिरुवा अपेय मिनी जुमूटकेडपेःआ अरू अपे अँननपे अपे सोगा होड़ेंगतना अरू मया होड़ेंगतनापे।

² दो अपे मिनी जीवते अलार-दुलार होड़ेंग घड़ीन, मिनी ओंगोल अरू चाहाःतेपे दोहोन, जेमहा ईंगराः जीव बनाहालते पेरेग जुवाः।

³ अपे एटाः होड़कू अते मरंगपे बड़ाँः लगा अरू अपे बड़वारगुः लगा, तोनोंगाः अहापे एचेय। मनदो अपे अँननपे अपे हुडिंग ओंगलुः घड़ीन, एटाः होड़कू अपे अते मरंगपे ओंगोलकू।

⁴ अपे अँननपे लगा एकला अलोपे ओंगोलगोड ञवन, मनदो एटाः होड़कू लगा होँपे ओंगोलगोड ञवन।

⁵ ईसू मसीराः लूर-नेवन दोहोना हनन इया, अपेराः लूर-नेवन हों होयाः लगा इदा।

⁶ हाँय जमालेःआते भनगवाने दोहोना, हनते हों हाँय भगवान बरोबइर दोहोन लगा, मेरेय ओंगोल दोहोगाड।

⁷ मनदो हाँय जमालेःआ अड़ाःतेडखन, मनुवाराः सुरइत मुरइतरेय जनमावनेना, अरू बेगारी होड़ इयाय बड़ाँवनेना।

⁸ हाँय मनुवा इयाय दोहोना, अरू अनँयग आँयग हुडिंगे बड़ाँवनेनखन कुरूसरे गुजुः वरी हों भगवानराः जमा कताय मनावनेना।

⁹ हनालगा भगवान हाँय मनारंग हातपात ओवाडिगखन हाँयराः ञाव जमाकूराः ञाव अते जगलेय बड़ाँवकेरा,

¹⁰ जेमहा जमा होड़कू ईसूराः ञाव अयूमकेडखनकू उकुड़ोमगुः। सेरमो देसरिकुःआ अरू ओतरिकुःआ अरू पतालपूररिकुःआ जमाकू हाँयकू सलाम घड़ीनकू उकुड़ोमगुः,

¹¹ हँकू इनीसू मसी, परबू हवे माःआनकू कबुलाःता जेमहा अपांग भगवानराः मान मरजइत होयाः।

अपेराः जीव मरसल इया टेडेग लगा इदा

¹² दो ईंगरिकुःआ अजी बोपोहकूतिंग, अपे सुदायिंग दोहोन मेला, ईंगराः चेडतो जमा बेलापे मनावगोड ञवना। अरू नुँहू अपे सुदा कोवायिंगा हों अपे अरू नपायतेपे मनावगोड ञवन। भगवान सडावकेडकुःआ हँकुःआ होड़कू जियाः लगा इदा हनन इया, अपे हों भगवान मड़ंगरे अकूस मनाः घड़ीन मुरुक मिहनइतकेडखन जियाः लगा इदा।

¹³ दो भगवान ननायगुःता हनन इयाबू जियाः लगा अबू जीवरे चहाः अरू जंगरे एमे हड़ाःवाबूता।

¹⁴ जमा इयाःआ बुता बेगर कुरबुराःते अरू बेगर अड़ा-चउकीतेपे बुता।

¹⁵ नाःआ अते अपे बेलूर ओंगोलरिकुःआ होड़कू तलारे भगवानरिकुःआ लइंकू इया बेगर गारबार अरू सुद जीवपे जियाव अवेनता। दो हँकुःआ होड़कू तलारे अपे टेडेगतो इपीलकू इयापे दोहोनता।

¹⁶ अपे, जीव एमेता हना सरवन इयापे जियाः दो, ईसू कुदा वेगता हना दिन ईंग अपे बदीरे बहालते नपायतेयिंग कता अवेयता अरू ईंगराः मिहनइत सदाःआ ओरो होयानेना।

¹⁷ भगवान एचेरे अपेराः बिसवास अरू सेवा भगवान लगा दाः बलिदानकू दूलता हना इया इदा। अरू हना बलिदान पुरावगे लगा ईंगके गुजुः हों पराः, हनारे हों ईंग अपे सुदायिंग बनाहाल जुवाःता।

¹⁸ ननन इया अपे हों ईंग सुदापे बनाहाल जुवाः।

तिमुतियूस अरू इपापुरूदितूस

¹⁹ परबू ईसूराः ओंगोल इदान दो, ईंग तिमुतियूस अपे एचेरे हलीयिंग वारेयता, जेमहा हाँय अपे अतेय कुदा वेगकियानखन अपे बदीरे नपाय सरवने कता उदुःवायिंग अरू हनाते ईंगराः जीव अहाल-बहाल जुवाः।

²⁰ तिमुतियूस अड़ाःवाडखन इनिंग इया अपे बदीरेय ओंगोलगोड ञवनता, एटाः तोनोंगीग होड़ ईंग एचेरे कोवाया।

²¹ हँकू जमाकू ईसू मसीराः ओंगोल इया तोनोंगाः एचे लगा मेरकू ओंगलेता, मनदो हँकू अँननकू एकला लगाकू ओंगलेता।

²² मनदो अपे सुनुदीकेरा तिमुतियूस बिसवासगेयीग होड़ हवे माःआन अनँयग उदुःकिया, अरू मी होड़ बेटा अपात सुदाय बुताता, हनन इया हाँय ईंग सुदा भगवानराः नपाय सरवन परसारगे लगा ईंगे सेवा देंगवाकेरा।

²³ दरवाःआ हना दिनरे ईंग जीवरे चिला होयाःता, हना सुदीकेडखन तयोमरे ईंग हाँय अपे एचेरे ओनोहेन वारगोडेय लगायिंग ओंगलेतना।

²⁴ ईंग हों अपे एचेरे ओहेन सेन लगा परबू एचेरेयिंग भरसा दोहोकेरा।

²⁵ इपापुरूदितूस, ईंगरीग बोहोयिंग इया इदानिया। हाँय ईंग सुदा भगवानरीग सिपाही इया इदानिया अरू ईंगरीग सेवा देंगवा होड़ हवे। अपे हाँय ईंग एचेरेपे वारकिरिया, अरू हाँय ईंग जमालेःआय संघरावारिंगा। हनते हों, हाँय अपे एचेरे वार कुदागेय लगायिंग ओंगलेतना।

²⁶ इपापुरूदितूस बेमारीरे इदानिया माःआनपे अयूमतेरा दो, आयँगराः जीव मुरुके कुहकाःआ अरू हाँय अपे ञेल लगाय उंभरावयना।

²⁷ हाव, हाँय बेमारीरेय दोनोहोना अरू हाँयराः मड़ा महक उडुंगयान। मनदो भनगवान हाँये मयावातेरा। भगवान हाँय एकला कोवान, मनदो ईंग होंय मयावातेरा, जेमहा ईंगराः जीव अहा अदरुजीन।

²⁸ नननलगा ईंग हाँय वारेय लगा मुरुकिंग कुरनिसगेतना, जेमहा हाँय अपे सुदा हों जुमावकियानखनपे अहाल बहाल जुवाः अरू ईंगराः जीव सलसत जुवाः।

²⁹ हाँय अपे एचेरेय सेन दो, नाँय ईसू मसीरीग होड़ हवे, माःआन ओंगोलवाडखन मुरुक बहालते हाँयपे नेत-नेवार, अरू नाःआ इयाकुःआ होड़कू, अपे मान मरजइतकू लगा इदा।

³⁰ हाँय ईसू मसीराः बुता बदीरे गोनेगगुःरेय दोहोना अरू अनँयग जीव गुजुः जियाः ओंगोल अड़ाः एंडाकेडखन अपे ईंग मेरपे एमे अवेवागडिंग हना संघरा हाँय एमेवातिरिंगा।