पिलिपी 1 - Korwa Bible

पउलूस अगीते मसी सलाम

¹ ने अजी बोपोहकूतिंग, पिलिपी सहररे इदानकुःआ अरू ईसू मसी सुदाकू मिनीयना हँकुःआ जमा भगवानरिकुःआ सुद होड़कू अरू कलसियारिकुःआ मूक होड़कू अरू सेवकियाकू अपे लगा ईसू मसीरिकिनाः सेवादारकिन अलिंग पउलूस अरू तिमुतियूस, नाःआ चिठीलिंग ओजाःगेतना।

² अबूरीग अपांग भगवान अरू परबू ईसू मसी, अपेकिन मयावा अरू सलसतरेकिन दोहो ओवापे।

पउलूसराः अरजी

³ अपेयिंग उहियारपेता, हना जमा बेला ईंग ईंगरीग भगवानिंग धनियाबादगेयता।

⁴ भगवानराः नपाय सरवनपे अयूमतेरा, हना दिन वरी हना नपाय सरवन होड़कू एचेरे कता उदुःवाकू लगा ईंगपे सेवा देंगवातेरा।

⁵ हनालगा अपेयिंग उहियारपेता, हना जमा बेला मुरुक बहालते, अपे लगा भगवान एचेरेयिंग अरजीता।

⁶ अरू अपे बदीरे मीटोंग कतायिंग सुनुदीबाःगोतेरा, ईसू मसी कुदा वेगता हना दिन वरी, भगवान अपे एचेरेय बुँहड़ीकेरा हनानाः नपाय बुताय एचे पुरावगोडता, माःआन।

⁷ नुँहू ईंग जेहेलरे इनिदानिंग मेला अरू मड़ंगरे नपाय सरवन, सताय हवे माःआनिंग कनता कताय मेला, अपे भगवानराः मया इया ईंगपे सेवा देंगवातेरा। अपे ईंगराः जीवरे इदानपेःआ। हनालगा अपे बदीरे नाःआ इयायिंग ओंगले दो नपाय इदा।

⁸ ईसू मसी अपेय दुलारकेरा हनन इया, ईंग हों अपेयिंग दुलारतना, अरू अपे ञेल लगायिंग उंभरावयना। नाःआ कता सताय हवे माःआन भगवान सुदीयतना।

⁹ एटाः होड़कू लगा अपेराः अलार-दुलार बगरागोड ञवन लगायिंग अरजीतना। अपे भगवान बदीरे, अरू नपायतेपे सुदी अवेय लगा, अरू जमा सताय कताकूनपे बुझाव अवेन लगा होयिंग अरजीतना,

¹⁰ जेमहा अपे ननपायते नपाय कता जमालेःआपे सुदी अवेय, अरू ईसू मसी कुदा वेग वरी सुद अरू बेगर गारबारतेःआ नपाय लूर-नेवन अपे जीवरे होया जुवाः।

¹¹ नाःआ इयाःआ नपाय लूर-नेवन ईसू मसीते अपेराः जीवरे होयाःता, अरू हनाते होड़कू भगवानकू जाग अरूकू मान मरजइतगेय।

परसार बुता बदीरे पउलूसराः ओंगोलकून

¹² दो ईंगरिकुःआ अजी बोपोहकूतिंग, अपे नाःआ कता सुनुदीबाःगोडपे लगायिंग चहाःतना। ईंग जीवरे होयानेना हना जमा कटसियाकूनते भगवानराः नपाय सरवन मुरुक बगरा होड़कू अयुमे लगा होयाकिया।

¹³ मरंग राजा कइसरराः गड़हीरिकुःआ अगुरादारकू अरू मुरुक होड़कू ईंग बदीरेकू सुदीगोतेडा, हाँय ईसू मसी बदीरेय परसारतेरा। हनालगा जेहेलरे सींगतो इदानिया, माःआन।

¹⁴ ईंग जेहेलरे इदानिंगा, हनालगा बिसवासी होड़कू अते मुरुक होड़कू, भगवान एचेरे भरसातेडखन बेगर बोरते नपाय सरवन कता उदुःगे लगा अनउरकू डीड़यान।

¹⁵ तोनोंग तोनोंग होड़कू ईंगराः इराते अरू अड़ा-चउकीते ईंग अते अँननकू मरंग बड़ाँः लगा नपाय सरवनकू परसारगेतना। मनदो एटाः होड़कू नपाय ओंगोलतेकू परसारगेतना।

¹⁶ हँकुःआ होड़कू दुलारते नपाय सरवनकू कता उदुःगेतना, अरू ईंग बदीरेकू सुसुदीतना, हाँय नपाय सरवन सताय हवे माःआने कताय अते, जेहेलरे इदानिया, माःआन।

¹⁷ अरू इराते नपाय सरवनकू कतायता हँकुःआ होड़कू, नपाय ओंगोलते कोवान, मनदो अँननकू मरंग बड़ाँःराः ओंगोलते, ईंग जेहेलरे इनिदानिंग मेला, एचे कटसियागिंग लगाकू परसारगेतना।

¹⁸ नाःआते चिला होयाःता? तोनोंगाः बेलूर ओंगोलते सहे नपाय ओंगोलते, नाःआ बनर ओंगोलते मसीराः बदीरेकू परसारगेता दो नाःआते ईंग बहालरे इदानिंगा अरू बनाहाल बहालतेयिंग दोहोनता। हाव, ईंग बनाहाल बहालतेयिंग दोहोनता।

नपाय जीव जियाःराः मतलोब

¹⁹ दो ईंग सुसुदीतना, अपेराः अरजीते अरू ईसू मसीराः सुद बिरुवाराः संघराते, ईंग जीवरे होयाकिया नाःआते भगवान ईंगे सडावता।

²⁰ ईंगराः चहाः अरू असरा ननानाःरे टक-टक इदा, ईंग भगवान मड़ंगरे कहियो ओरोयिंग गियूनेना, मनदो ईंग ईसू मसीराः बदीरे डीड़कियानखनिंग जियाव अवेन, जेमहा ईंग गुजुः सहे जीयतिंग दोहोन, ईंगराः जीवते, ईसू मसीराः मान मरजइत नुँहू अरू मड़ंगरे हों होनोयागोड ञवन।

²¹ दो ईंग जीयतिंग दोहोन दो मसी लगायिंग दोहोनता अरू ईंग गुजुः दो ईंग लगा अरू नफा होयाःता।

²² ईंग जिनियतिंग दोहोन दो परबू लगा नपाय सेवायिंग सेवा अवेता। ओहरे! ईंग मेरिंग सुसुदीतना ईंग लगा चिला नपाय दोहोनता, ईंग गोएग जुवाः जा जीयतिंग दोहोन?

²³ ईंग जीव दो बार बंटायना। मी जीव कतायतना, गोएगकियानखन ईसू मसी सुदा दोहोन लगायिंग तरसाःतना। ननानाः ईंग लगा मुरुक ननपाय होयाकुःआ।

²⁴ मनदो मी जीव कतायतना ईंगराः जीयत दोहोन अपे लगा मुरुक जरूरी इदा।

²⁵ दो ईंग सुनुदीबाःगोतेडिंग, ईंग जीयत दोहोकियानखन भगवान एचेरे अपेराः बिसवास बड़ियाड़गुः लगा अरू हनानाः बिसवासरे अपे बनाहालतेपे दोहोन लगायिंग संघरावापेता।

²⁶ दो ईंग अपे सुदा अरू जुमाः लगायिंग सेन, हनमेला ईसू मसी ईंग जीवरे एचेकेरा, हना अते अपे हाँय अरूपे जाग अवेयता।

²⁷ तोनोंग इया होयाः, अपेराः लूर-नेवन ईसू मसीराः कतत नपाय सरवन इया होनोयाः लगा इदा। दो ईंग अपे एचेरेयिंग सेन सहे मेरिंग सेन, अपे बदीरेयिंग अयुमे, हँकू बिसवासरे बड़ियाड़ इदानकुःआ। ईंग नाःआ होयिंग अयुमे, हँकू मिनी जीवकियानखन मिनी ओंगोलते, ईसू मसीराः नपाय सरवन एटाः होड़कू बिसवासगे लगा, मुरुककू मिहनइतगेतना, माःआन।

²⁸ अपेकू घंटावता हँकुःआ होड़कू सुदा अहापे बोर। अपे डीड़तेपे दोहोन दो, हँकुःआ होड़कू सुदीगोडता, भगवान अबूय लाय एंडाबूता, मनदो हाँय हँकूय सडावकूता, माःआन।

²⁹ अपे ईसू मसी एचेरे बिसवासगे लगा एकला कोवान, मनदो हाँय लगा कटसिया हों सहाव लगाय दहिनवाडपेःआ।

³⁰ ईंगके परावनेना हना कटसियापे ञेलतेरा अरू नुँहू हों ईंग सेने पारतना हनानाः कटसियाराः बदीरेपे अयुमेतना। अरू अपे हों हनानाः कटसियातेपे सेने पारतना।