मरकूस 7 - Korwa Bible

जीव मइलावगोडता हना जिनिसकून

¹ दो एरुसलेम सहर अते तोनोंग तोनोंग फरीसी होड़कू अरू एटाः एहूदा नियम चेडदार होड़कू ईसू एचेरे जुमाः लगाकू वेजेडा।

² अरू ईसूरिकुःआ चेलाकू अते अदोम चेलाकू बेगर तिःई अचंगतेकू जोमा, हना हँकू ञेलतेरा।

³ (फरीसी होड़कू अरू जमा एहूदाकू अँकूरिकुःआ खुटिपरिया होड़कूराः रिती-बिधी इयाकू सलाःआ अरू हँकूराः रिती-बिधी इया तिःई अरीनकू अचंगगुः वरी हँकू तोनोंगाः जिनिस मेरकू जोमा।

⁴ अरू हनन इया हँकू बजार अते ओड़ाःरेकू वेगता दो हँकू अरीनकू उमुः वरी तोनोंगाः जिनिस मेरकू जोमा। हँकू अँकूराः रिती-बिधी इया गिलासकून, दाः बुराः भंडाकून, पितड़राः इसिंग चटूकूनकू बुहाला अरू एटाः एटाः कताकूनकू एचेया।)

⁵ दो फरीसी होड़कू अरू एहूदा नियम चेडदार होड़कू ईसूरिकुःआ चेलाकू एचेया हनाकू ञेलतेड अरू हाँय एचेरेकू होंबोरतेड, “ने गुरुजी, चिला लगा आमरिकुःआ चेलाकू अबू खुटिपरियारिकुःआ होड़कूराः रिती-बिधी इया मेरकू सलाःतना अरू मइलावतो तिःईतेकू जोमतना?”

⁶ दो ईसू हँकू एचेरेय कतातेरा, “भगवानराः बड़रा कतायीग होड़ एसयाह, अपे पचघुचिया होड़कू बदीरे मड़ंगरेय कतातेरा हना कता जमा सताय हवे। भगवानराः कागदरे ओजाःतो इदा, नँकुःआ होड़कू बनाड़रा बड़रारे ईंगकू मान-मरजइतता, मनदो हँकूराः ओंगोल ईंग अते एनेटाः अगी दोहोनता।

⁷ हँकुःआ होड़कू बेगर मतलोब ईंगकू जागतना, अरू हँकूराः चेड जमा होड़कूराः ओंगोलते इदा, हना नियमकून हवे।

⁸ अपे भगवानराः नियमकून मनाः अड़ाःगोतेडापे अरू होनोड़कूराः नियमकूनपे मनाःतना।”

⁹ ईसू अरू हँकू एचेरेय कतातेरा, “अपे भगवानराः नियमकून चलाःकेडखन अँननपेराः रिती-बिधी सलाव लगा एटाः दूरपे ञामकेरा।

¹⁰ मोसेस मड़ंगरेय कतातेरा, आम एंगा-अपा मान मरजइतकिन लगा इदा, अरू तोनोंगीग होड़ आँयग एंगा अपाकिने सती-सरापता, हाँय जिते जीयत ञेड एएंडा लगा इदा।

¹¹ मनदो अपे कतायतना, तोनोंगीग अनँयग एंगा-अपा एचेरेय कताय, अबा संघरागे लगा दोहोना, हना ईंग कोरबान इयायिंग एटाःकेरा। हनालगा हना ओरोयिंग एमे अवेतेरा।

¹² हनाते अपे हाँय आँयग एंगा-अपा लगा तोनोंगाः संघरा एमेवाकिन लगा मेरपे ओवायता।

¹³ नाःआ इया अपेराः रिती-बिधी होड़कूपे चेडकूता अरू भगवानराः नियमकूनपे चलाःगोडता। अरू अपे नाःआ इयाःआ एटाः एटाःकूनपे एचेयता।”

¹⁴ हंडाकू दोहोना हँकुःआ होड़कू अनँयग एचेरे अरू राःतेडकूखने कताया, “अपे जमाकू ईंगपे अयूम अरू नाःआ बड़रापे बुझाः।

¹⁵ तोनोंगाः जिनिस जोम होले होड़ मेरेय मइलाःता, मनदो होड़राः जीव अते उडुंगगुःता हनानाःते होड़ मइलाव जुवाःता।

¹⁶ [अयूम अवेयता हाँयग होड़, नपायतेय अयूम ठुड़ावागे।”]

¹⁷ हनते ईसू होड़कू अगीते तोराय अरू मीटोंग ओड़ाःरेय बोलोयान। हाँयरिकुःआ चेलाकू हाँय एचेरे नाःआ कहड़ीराः मतलोबकू होंबोरतेरा।

¹⁸ दो ईसू हँकू एचेरेय होंबोरतेरा, “अपे मेरपे बुझाःतना जा?

¹⁹ होड़कू जोमता, हना जिनिसकून हँकूराः जीवरे मेर सेनता, मनदो दोंगेरे सलाव जुवाःता अरू दोंगेते बहरी उडुंग जुवाःता।” (नाःआ बड़रा कता अते ईसू जमा बरानाः जोम जिनिसकून सुद माःआने कतावारा।)

²⁰ ईसू अरूय कताया, “होड़कूराः जीव अते उडुंगगुःता, हना अते हँकू मइलाव जुवाःता।

²¹ होड़कूराः इंदरी अते बेलूर ओंगोल, जपाल होड़ेंग, इनिग, ञेड गोजेय, सनहा-सनही,

²² लुभी, बेलूर बुता, अडिग, बेलूर घुड़ी, इरा, ओपता बड़रा, बड़वार अरू बुयांगतो होयाःता।

²³ नाःआ जमा बेलूरकून होड़कूराः जीव अते उडुंगकियानखनकू मइलाव जुवाःता।”

सूरुफिनिका छतररीग अइमीराः बिसवास

²⁴ हना तयोमरे ईसू गलील छतर अते सूर अरू सइदा छतररे तोराय। हाँय हंडा मीटोंग ओड़ाःरे बोलोयाने अरू तोनोंगीग हाँय अहाकू सुदीगींग माःआने चहाः। मनदो हाँय मेरेय ओको अवेगान।

²⁵ हना छतररे मी होड़ अइमी दोहोना। हाँय सूर फिनिका छतररीग बेगर एहूदा होड़े दोहोना। हाँयरीग मी होड़ बिटीत दोहोना, अरू हाँय एचेरे भूत समसावनेना।

²⁶ हाँय ईसूराः बदीरेय अयूमतेरा अरू हाँय ओहेन ईसू एचेरे वेजेडखन हाँयराः काट कुटीरेय तबेरयान। हाँयरीग बिटीत अते भूत एचे उडुंगगेय लगा ईसू एचेरेय असेःआ।

²⁷ दो ईसू हाँयग अइमी एचेरेय कतातेरा, “मड़ंगरे लइंकू जोम लगा एएमे लगा इदा। अरू लइंकूराः जोम जिनिसकून गोःकेडखन कुतुकू एचेरे तेकेगे दो नपाय कोवानेःआ।”

²⁸ दो हाँयग अइमी कता कुदातेरा, “मनदो परबू, ओड़ाःरिकुःआ कुतुकू हों लइंकू जोम सकड़ीगेता हनाकू जोमता।”

²⁹ दो ईसू हाँय एचेरेय कतातेरा, “आम नपायमे कताकेरा। आम ओड़ाःमे सलाव जुवाः। आम बिटी अते भूत उडुंगयनाय।”

³⁰ दो हाँय ओड़ाः तोराय अरू हाँयग बिटीत खटी डसनारे गेतेगतोय दोहोना अरू हाँय अते भूत उडुंगयाने।

ईसू बहिरा अरू कोंदा होड़े नपायतेरा

³¹ हनते ईसू आँयग चेलाकू सुदा सूर अरू सइदा देस अते उडुंगनेनखन दिकापुलीस राइज पारनेनखन गलीलराः हुडिंग समुंदररेकू सोदोरनेना।

³² हंडाकुःआ होड़कू बहिरा अरू कोंदाय दोहोना हाँयग होड़ ईसू एचेरेकू अगूतिरिया। अरू हँकू ईसू एचेरे वेजेडखनकू असेया, “ने गुरुजी, नाँयग होड़ चोटरे आमराः तिःई खेपाकेडखनमे नपायगेय।”

³³ दो ईसू हँकुःआ होड़कू अते हाँयग होड़ तोरेरेय गोःयाडीग अरू हाँयराः बनर लुतूररे आँयगराः अंगरीय गुतू बोलोतेरा। हनते ईसू अनँयग अंगरीरे बेगवाडखन हाँयराः अलंगतोरेय टोँवावतेरा।

³⁴ हनते ईसू सेरमो अगी संगीलतेडखने सहेडतेरा। अरू हाँय एचेरेय कतातेरा, “एफाता!” (नाःआ लबदराः मतलोब गीग जुवाः हवे।)

³⁵ हननमेला हाँयग होड़ अयुमेःआ अरू हाँयराः लार सुतरी सीडयान अरू हाँय नपायतेय बड़राःआ।

³⁶ दो ईसू होड़कू एचेरेय कतातेड, “नंडा होयाकिया हना अपे तोनोंगीग एचेरे अलोपे उदुःगे।” मनदो ईसू अलोपे कताय माःआने कतातेरा, हिनिनमिन अरूकू कता उदुः होड़ेंगा।

³⁷ होड़कू मुरुक बयावनेनखनकू कताया, “ओहरे! नाँयग होड़ तोनोंगाःय एचेयता दो हना जमा ननपाय इदा। नाँयराः कतारे बहिरा होड़कू होंकू अयुमेता अरू कोंदा होड़कू होंकू बड़राता।”