इपीसी 3 - Korwa Bible

बेगर एहूदाकू एचेरे पउलूसराः सेवा

¹ ईंग पउलूस, अपे बेगर एहूदाकू एचेरे ईसू मसी बदीरे परसारगे अते जेहेलरे सींगतो इदानिंगा।

² अपेय सेवा लगा भगवान ईंगे संघरावारा, हना कता अपे अनायूमबाःगोतेडा।

³ मड़ंगरे नाःआ कता ओकोत दोहोना अरू नुँहू भगवान ईंग एचेरेय एचे उदुःकेरा, अरू हना बदीरे ईंग मड़ंगरे गुनहोनिंग ओजाःतेरा।

⁴ अरू अपे नाःआ कतापे बछाःता दो, मसी बदीरे ओकोत दोहोना हना कता ईंग तुमिनिंग बुझावकिया, हना अपेय सुदी अवेयता।

⁵ भगवान नाःआ कता मनाड़ंग जूगरिकुःआ तोनोंगीग होड़ एचेरे मेरेय एचे उदुःगाड। मनदो नुँहू सुद बिरुवाते भगवानरिकुःआ बड़रा कता होड़कू अरू सुद मूक चेलाकू एचेरेय एचे उदुःगोतेडा।

⁶ ओकोत कता ननानाः हवे, ईसू मसीराः नपाय सरवनते अपे बेगर एहूदाकू, एहूदाकू सुदा इताडदारपे बड़ाँवयना अरू मिनीटोंग देहराः दगलीकूनपे बड़ाँवयना अरू ईसू मसीतेकू पवाःता हना जबान अपे होँपे पवावयना।

⁷ भगवान अनँयग जंगरते ईंगे मयावारा अरू हना मयाते नपाय सरवन एटाःकू एचेरे कता उदुःगे लगा, ईंग हाँयरीग सेवकिया होड़िंग बड़ाँवयना।

⁸ भगवानरिकुःआ जमा सुद होड़कू अते ईंग हुडिंगीग हवे। हनते हों बेगर एहूदाकू एचेरे मसीराः अगामाः आन-धान बदीरे कता उदुःगे लगा भगवान ईंगे मयावारा।

⁹ जमाकूरीग तुलादार भगवान, मुरुक जूग वरीतेय ओको दोहोकेरा हना कता जमाकू एचेरे थित-थितार कता उदुःगे लगा हों ईंगे सुनावकेरा।

¹⁰ भगवान सेरमोरिकुःआ परधानकू अरू हातपातदारकू एचेरे अनँयगराः एटाः बरानाः कनहून कलसियातेय एचे उदुः लगाय ओंगोलतेरा।

¹¹ सनागर सइट वरीते बुँहड़ीकिया अरू सगर सइट वरी दोनोहोनता ननानाः कनहून नुँहू अबूरीग परबू ईसू मसीतेय एचे पुरावगोतेडा।

¹² अबू ईसू मसी एचेरे बिसवासकेडबूखन हनाँयते भगवान एचेरे बेगर बोरते अरू मुरुक डीड़तेबू सेने अवेनता।

¹³ दो अपे लगा कटसियायिंग सहवेतना, हना बदीरे अपे अहापे ओंगोल हदराः। नाःआते अपेराः मान मरजइत होयाःता।

मसीराः दुलार

¹⁴ हनालगा ईंग नाःआ जमा कताकूनिंग उहियार अगूयता दो, अपांग भगवान मड़ंगरेयिंग उकुड़ोमगुःता।

¹⁵ हाँय अगीते सेरमो अरू ओतरिकुःआ जनामाकू अँकूराः ञावकू पवाःता।

¹⁶ भगवान एचेरे अगम नपाय मरंग धन इदा। अरू हाँय हना धन अते सुद बिरुवाते अपेराः इंदरीरे अनँयगराः जंगर एमेकेडखन अपेराः जीवे बनड़ियाड़ ञवन लगायिंग अरजीतना।

¹⁷ अपेराः बिसवासते ईसू मसी अपेराः इंदरीरेय डेरान लगायिंग अरजीतना। जेर गहीर सेनेकियानखन सींग बड़ियाड़गेता अरू ओड़ाः खुंटा बड़ियाड़गेता, हनन इया अपेराः जीव अलार दुलारते बड़ियाड़ जुवाः लगा होयिंग अरजीतना।

¹⁸ भगवान अबूय दुलारता हना दुलार तुमिन सकड़ अरू लंबी इदा, तुमिन उसूल अरू गहीर इदा हना भगवानरिकुःआ सुद होड़कू सुदा, अपे बुझाव अवेन लगायिंग अरजीतना।

¹⁹ अबूराः कनहूनते ओरोबू ओंगोल तजाः अवेतेरा, हना दुलारबू सुदी अवेय लगा होयिंग अरजीतना, जेमहा भगवानराः जमालेःआते अपेराः जीव उडु-बुडू जुवाः।

²⁰ तुमिनबू असे अवेयता अरूबू ओंगोल अवेयता, हना अते मुरुक बगरा, अबू जीवरे अनँयगराः जंगरतेय एनेचे अवेयता,

²¹ हाँयग भगवानराः जाग कलसियारिकुःआ होड़कूते अरू ईसू मसीते जमा जूगरिकुःआ होड़कू एचेरे सगर सइट जूग वरी होयागोड ञवन। आमीन!