इपीसी 1 - Korwa Bible

पउलूस अगीते मसी सलाम

¹ ने अजी बोपोहकूतिंग, ईंग पउलूस, भगवानराः हिछाते ईसू मसीरीग मूक चेला हवे। इपीसी सहररे ईसू मसी एचेरे बिसवासगे इयाकू दोहोनता भगवानरिकुःआ सुद होड़कू, अपे लगा नाःआ चिठीयिंग ओओजाःतना।

² अबूरीग अपांग भगवान अरू परबू ईसू मसी, अपेकिन मयावा अरू सलसतरेकिन दोहो ओवापे।

ईसू मसीते भगवान अबूराः जीवे भलावारा

³ सेरमो देसराः जमा बरानाः कताकून ईसू मसीते अबूराः जीवे भलावाडबुःआ अबूरीग परबू ईसू मसीरीग अपांग भगवानराः जाग होयाः।

⁴ अबू हाँय मड़ंगरे सुद अरू बेगर गारबारतेबू दोहोन लगा चउंदीसराः बुँहड़ीन अते मनाड़ंग ईसू मसीतेय सुनावकेडबुःआ।

⁵ अरू हाँयराः हिछा अरू नपाय ओंगोल इया अबू ईसू मसीते आँयगरिकुःआ निकता लइंकू सहेरबू लगा मनाड़ंगते दुलारकेडबूखने ओंगोल दोहोकेरा,

⁶ जेमहा आँयगरीग दुलार बेटातते अबूराः जीवरे आँयगराः अगम नपाय मया मिनी जीवतेडखने ओवाडबुःआ हाँयग भगवानराः जाग होयाः।

⁷ भगवानराः अगम मयाते ईसू मसीराः बलंगीते अबू अजइतयना अरू अबूराः कसूरे बराव एंडाकेरा।

⁸ अरू हाँय अनँयगराः जमा कनहून अरू ओंगोल इया मिनी जीवतेडखने मयावाडबुःआ।

⁹ भगवान अनँयगराः ननपाय ओंगोल इया ईसू मसीते एचेय लगाय ओंगोल दोहोतेरा अनँयगराः ओकोत दोहोना हनानाः हिछा अबूय एचे सुदीकेडबुःआ।

¹⁰ अरू भगवान तोल दोहोकेरा हनानाः बेलाराः बुइद इया, सेरमोरे अरू ओतरे इदानकुःआ, हँकुःआ जमाकू मसीराः हातपातरेकू होया जुवाः।

¹¹ भगवान अनँयग ओंगोल अरू हिछा इया जमाकूने एचेगोड ञवनता। हनन इया हाँय ईसू मसीते अबू सुनावकेडखन इताडदारकू बड़ाँःबू लगा मनाड़ंगतेय ओंगोल दोहोकेरा।

¹² अले एहूदाकू, ईसू मसी एचेरे मड़ंगरेले असराकेरा, जेमहा अले अते हाँयराः मान मरजइत अरू जाग होयाः।

¹³ अपे सडावता हना नपाय सरवनराः सताय कता अपे हों अयूमकेडखनपे बिसवासकेरा अरू हनमेला भगवान जबानतेरा हाँयग सुद बिरुवा अपे जीवरे मीटोंग मोहोर इया लगावतेडखन ईसू मसीते आँयगरिकुःआ निकता होड़कूय बड़ाँवकेडपेःआ।

¹⁴ भगवान जबानकेरा हना इताड अबू लगाय एमेवाबूता अरूय अजइतगोडबूता माःआन एचे उदुःगे लगा भगवान आँयग सुद बिरुवा अबू जीवरे बयान इयाय एमेकेरा, जेमहा भगवानराः मान मरजइत अरू जाग होयाः।

पउलूसराः अरजी

¹⁵ ननानाः लगा ईसू मसीरे अपेराः बिसवास अरू जमा बिसवासी होड़कू लगा अपेराः अलार-दुलार ईंग अयूमकेरा हना वरीते,

¹⁶ अपे लगायिंग अरजीगोड ञवनतना अरू अपे बदीरे भगवान धनियाबादगे लगा मेरिंग अड़ाःगरा,

¹⁷ जेमहा परबू ईसू मसीरीग अगम मरंगीग अपात भगवान, अपे सेरमो देसराः कनहूने एमेवापे लगा अरू अनउर नपायते हाँयपे सुदी अवे लगा अनँयगराः कताकूने उदुःवापे।

¹⁸ नाःआते भगवान चिला असराय एमेवापे लगाय राःकेडपेःआ हना नपायतेपे सुदी अवेय अरू भगवानके आँयगरिकुःआ सुद होड़कू एचेरे तुमिनाः मरंग इताड इदा, हना होँपे सुदी अवेय।

¹⁹ भगवान एचेरेकू बिसवासतेरा हँकुःआ होड़कूराः जीवरे हाँयराः तुमिन मरंग जंगर इदा, हना होँपे सुदी लगायिंग अरजीतना।

²⁰ ननानाः मरंग जंगरते भगवान ईसू मसी गोएगतो अतेय जियाव रेमतिरिया, अरू सेरमो देसरे अनँयग सुदा खउना गतररे जमाकू अते मरंग हातपात ओवाकिडिगखने एचे दुड़ुःकिरिया।

²¹ अरू ईसूके जमा बरानाः राजाकू अरू हातपातदारकू अरू जंगरदारकू अरू हकतियारकू अते मरंग हातपाते ओवाडिया अरू जमालेःआते मरंग ञावे ओवाडिया। हाँयराः हातपात नाःआ जूग लगा एकला कोवानेःआ, मनदो दरवाःआ हना जूग लगा हों इदा।

²² हनाते भगवान जमाकून ईसू अतेय हुडिंगगोतेडा अरू कलसियाराः बोःए तुलाकिरिया।

²³ दो कलसिया मसीराः देह हवे अरू कलसिया हाँयराः जीवते पेरेगतो इदा। अरू हाँय अनँयग आँयगते जमाकून जमा इयाय एचे पुरावगोडता।