मूक चेलाकू 3 - Korwa Bible

ठुठा होड़राः नपायगुः

¹ मी दिन पतरस अरू एहुना ढड़काः बेला भगवान ओड़ाः अगी अरजी बेलारेकिन सेनेडा।

² दो जनमावनेन वरीते मेरेय सेने अवेना मी होड़ होड़ दोहोना। अरू होड़कू हाँयकू तूल अगुःआ अरू भगवान ओड़ाःराः सुघर ञावराः हता दुवाररे हाँयकू गेतेगतिरियाकू। भगवान ओड़ाःरेकू सेना हँकुःआ होड़कू एचेरेय असे जोमा।

³ दो पतरस अरू एहुना भगवान ओड़ाःरे बोल लगाकिन दोहोना दो, हाँय हँकिन एचेरे ढिबुवाय असेया।

⁴ पतरस एहुना सुदा हाँयग होड़ अगीकिन ञेला अरूय कताया, “अलिंगमे ञेल।”

⁵ दो हाँयग होड़ हँकिनाः होड़किन तोनोंगाःकिन एमेवायिंगता, माःआन ओंगोलतेडखन हँकिन अगीय ञेलतेरा।

⁶ मनदो पतरस कतातेड, “ईंग एचेरे सोना अरू चाँदी कोवानेःआ, मनदो ईंग एचेरे इदा हना ईंग एमेवामतिंग। नसरेतरीग ईसू मसीराः ञावतेम सेन।”

⁷ पतरस हाँयराः खउना तिःई साबतेडखने रेमतिरिया अरू हननमेला हाँयराः काट अरू ईडी बड़ियाड़यान।

⁸ हाँय रेम चड़ाँयाने अरूय दँड़ाःगोडा। हनते हाँय हँकिन सुदाय सेना अरू तुड़ुक घड़ीन भगवाने जागा।

⁹ हाँय सेनेन सेन घड़ीन भगवाने जागा, हना जमा होड़कू ञेला

¹⁰ अरू हाँयकू सिनहागोतेडीग, नाँय दो भगवान ओड़ाःराः सुघर ञावाः हता दुवाररे दुडुःकियानखने असे जोमा हनाँयग होड़ हवे। अरू हाँयके चिला होयानेना हना ओंगोलतेडखनकू बयावयान।

पतरस भगवानराः जाग ओड़ाःरे

¹¹ नपाययना हाँयग होड़ पतरस अरू एहुनाय साब हताड़ा दो जमा होड़कू बयाः घड़ीन हँकू एचेरे सुलइमान ञावराः परछीरे बतकाव घड़ीनकू सोदोरनेना।

¹² पतरस नाःआय ञेलतेड दो हाँय हँकू एचेरेय कतातेरा, “ने इसराएलरिकुःआ होड़कू, नाःआ कताते अपे चिला लगापे बयावयना? अले अँननलेराः जंगरते सहे नपाय जीवते नाँयग होड़ले नपायतेरा माःआन ओंगोलकेडखन चिला लगा अलेपे कियोः-कोबोःवातना?

¹³ इबराहीमरीग भगवान अरू इसहाकरीग भगवान अरू एकूबरीग भगवान अरू अबूरिकुःआ जमा खुटिपरिया होड़कूरीग भगवान, आँयग सेवकिया ईसूय मान मरजइतकेरा। अपे इसराएल होड़कू ईसू ञेड एंडागेय लगा रूमी देसरीग मरंग हातपात होड़ पिलातूस एचेरेपे जिमातिरिया अरू हाँय ईसूय एचे अड़ाःगेय लगाय ओंगोलतेरा, मनदो अपे हाँय मड़ंगरे ईसूपे आड-बेकारवातिरिया।

¹⁴ अपे सुद अरू बेगर कसूरीग होड़ ईसूपे आड-बेकारवातेरा अरू हाँय बदलारे ञेड एएंडा होड़पे एचे अड़ाःतेरा।

¹⁵ अपे जीव तुलादार ईसूपे एचे ञेड गोएग एंडातिरिया। मनदो भगवान हाँय गोएगतो होड़कू अतेय जियाव रेमकिरिया। अले नाःआ कताराः हिदइतदारकू इदानलेःआ।

¹⁶ मड़ंगरे खोड़ाय दोहोना नाँयग होड़पे सुदीयतना अरूपे ञेलेयतना। नाँय ईसू एचेरेय बिसवासकेरा अरूय बड़ियाड़यना। अले ईसू एचेरेय बिसवासकेड अते जमा होड़कू ञेनेलतान मेला नाँयग होड़ जमालेःआतेय नपाययना।

¹⁷ दो अजी बोपोहकूतिंग, ईंग सुदीयतना अपे अनसिनहारते अपेरिकुःआ मूक होड़कू इया ईसू ञेड गोजेय लगापे रायनेना।

¹⁸ मनदो भगवानराः बड़रा कता होड़कू, मड़ंगरे ईसू बदीरेकू कतातेरा, मसी मुरुक कटसियाय सहावता, माःआन अरू हना जमा कताकून भगवान नाःआ इयाय पुरावकेरा।

¹⁹ हनालगा भगवान अगी अपे कसूर अते जीवपे कुदा, दो हाँय अपेराः जमा कसूरकूने बराव एंडागोडता अरू भगवान अगीते अपेराः जीव अहाल-बहाल जुवाःता,

²⁰ अरू हाँय अपे लगा आँयग सुनावतो मसी, ईसूय वारगोडता।

²¹ भगवानराः बड़राकू कतायता हँकुःआ सुद होड़कू मड़ंग जूगरेकू कता उदुःतेरा हनन इया भगवान जमाकूने नँवा अरीने तुलागे वरी, ईसू सेरमो देसरे दोहोन लगा इदा।

²² मोसेस हनाँयग बदीरेय कतातेरा, आमरीग परबू भगवान अपे लगा ईंग इया मी होड़ होड़ भगवानराः बड़रा कतायीग होड़ अपे तलारेतेय वारेयता। दो हाँय चिन चिलाय कतायता हना जमाकूनपे मनाः।

²³ हाँयराः कता मेरकू मनाःता, हँकुःआ होड़कू कहियो ओरो भगवानरिकुःआ होड़कू सुदा ओरोकू दोहोनेना।

²⁴ सनातायरे भगवानराः बड़रा कता होड़ समुएलराः परिया जूग वरीतेकुःआ भगवानराः बड़रा कता होड़कू जमाकू हों नाःआ बेलाराः बदीरेकू कता उदुःगेःआ।

²⁵ अपे भगवानराः बड़रा कता होड़कूरिकुःआ नइड़-बाँस होड़कू इदानपेःआ अरू भगवान अबूरिकुःआ खुटिपरिया होड़कू सुदाय जबानतेरा हना जबानराः इताडदारकू इदानबुःआ। अरू भगवान अबूरीग खुटिपरिया होड़ इबराहीम एचेरे नाःआ इयाय जबानतेरा, आमरिकुःआ नइड़-बाँस होड़कूते, चउंदीसरिकुःआ जमा जइत होड़कू ननपायकू दोहोनता।

²⁶ भगवान आँयग बेटात ईसू गोएगतो होड़कू अतेय जियाव रेमकिरिया अरू हाँय अपे अँननपेराः कसूर अते जीव एचे कुदाकेडखन अपेराः जीव ननपायगे लगाय वारतिरिया।”