2 तिमुतियूस 4 - Korwa Bible

डीड़ घड़ीन सरवनमे परसार

¹ दो तिमुतियूस, जीयत होड़कू अरू गोएगतो होड़कूय फड़ियावता हनाँयग ईसू मसी अरू भगवान ईंगरीग हिदइतदारकिन बड़ाँवकियानखन ईसूराः कुदा वेग अरू राइज बदीरे उहियारकेडमेखन नाःआ हुकुमिंग ओवामतना।

² भगवानराः सरवनमे परसार। अरू सगर बेला परसारगे लगा सपड़ावतोम दोहोन। मुरुक सहाव घड़ीन होड़कूम मंदरावकू अरूम डंटावकू अरूम कता बहालवाकू अरू भगवानराः सरवन नपायतेम चेडकू।

³ भगवानराः सताय सरवन अयुमे लगा होड़कू ओरोकू पतियावातेरा हना दिन निचकाःतना। मनदो अँननकूराः हिछा इयाःआ बड़रा अयूम लगाकू चहाःता अरू हनन इयाकुःआ चेडदार होड़कूकू ञाम अगुकूता।

⁴ हँकुःआ होड़कू सताय बड़रा अयूम अतेकू अइठाव जुवाःता अरू होड़कूराः तुलात कहड़ीकून अगीकू बहकाव जुवाःता।

⁵ मनदो तिमुतियूस, जमा बेला ओंगोल समझाव घड़ीन कटसिया सहावकेडखन नपाय सरवन परसारराः बुताम बुता अरू भगवानराः सेवाम सेवा पुराव।

⁶ दाः बलिदानकू दूलता हान इया ईंगराः सेरतिंग अधे वेगतना।

⁷ ईंग परबू लगा नपायतेयिंग धरक बजिनी पुरावकेरा, ईंग बतकाःयिंग पुरावगोतेडा अरू बिसवासिंग संभाड़ दोहोकेरा।

⁸ दो नुँहू वरीते बेगर गारबारराः इमान सनातायते होड़कूय फड़ियावकूता हाँयग परबू ईसू, हनानाः दिन ईंग लगाय एमेयता। अरू हान ईंग एकला लगा कोवान, मनदो हाँय कुदा वेगता हना बदीरे टक टक इदानकुःआ हँकुःआ जमा होड़कू लगा होंय एमेयता।

तिमुतियूस लगा एटाः तोनोंगाः कताकून

⁹ ने बेटा, आम ओहेन ईंग एचेरे वेग लगाम कुरनिसगे।

¹⁰ करेसकेस गलातिया राइज अगी अरू तितूस दलमतिया राइज अगी तोराकिना। अरू देमास नाःआ चउंदीसराः जिनिसकून नपाय मंजूरवातेडखन ईंगे अड़ाःगोतेडिंग अरू तिसलूनिका सहर अगी तोराय।

¹¹ ईंग सुदा लूका एकला इदानिया। ईंगराः सेवारे संघरा एमेवायिंग लगा मरकूस होंम अगूगेय।

¹² तुकिकूस ईंग इपीसी सहररेयिंग वारतिरिया।

¹³ तोरोवास सहररे करापूस एचेरेयिंग अटूकेरा हना झोकोड़ कोटमे अगू दरवा। ईंगराः कागदकून होंम अगूगे अरू हना भेड़ा हेड़ेराः कागदकून जरूरमे अगू दरवा।

¹⁴ सिकंदर ञावीग टठेर ईंग लगा मुरुके कटसियानेना। अरू हना बदला परबू हाँये एमेवायता।

¹⁵ अले चेडतिरिया हना सरवन हाँय मुरुके हिनइस-बिनइसवारा। हनालगा आम हाँय अते सवासितीम दोहोन।

¹⁶ मड़ंगरे कोट कछेरीरेयिंग सेनेडा दो ईंग बदीरे कताय लगा तोनोंगीग मेरकू सेनेगान अरू जमाकू ईंगकू अड़ाःगोतेडिंग। ईंग अरजीतना भगवान हँकुःआ होड़कू अहाय डंडियावकू।

¹⁷ मनदो ईसू मसी ईंग सुदाय दोहोना अरू हाँयराः जमा सरवन बेगर एहूदाकू एचेरे परसार उदुःगे लगा हाँय ईंगे संघरावातेडिंगा अरू गुजुःराः दूरतेय बनसावतिरिंगा।

¹⁸ भगवान जमा बेलूर अतेय सडावगींगता अरू आँयगराः सेरमो देसरे नाय नपायतेय गोः सोदोरगिंगताय। हनाँयराः मान मरजइत जमा जूग वरी होनोयागोड ञवन। आमीन!

टुटीग सलाम

¹⁹ दो ईंग अगीते अकिला अरू हाँयगरीग अइमी पिरिसकी, अरू उनेसिपुरुसराः ओड़ाःरिकुःआ होड़कू सलामकूमे।

²⁰ इरासतूस कुरिंती सहररेय दोहोयान। तुरपिमूस बेमारीरेय दोहोना, हनालगा हाँय मिलेतूस सहररे ईंग अटूतिडिया।

²¹ ररंग मड़ंगरे नंडा वेग लगा मुरुकमे कुरनिसगे। एबुलूस, पुदेस, लिनूस अरू केलाउदी अरू एटाः एटाः बिसवासी होड़कू आमकू सलामतना।

²² भगवान आम सुदाय दोहोन अरूय मयावाम।