2 पतरस 1 - Korwa Bible

पतरस अगीते मसी सलाम

¹ ने ईंगरिकुःआ अजी बोपोहकूतिंग, ईसू मसीरीग सेवादार अरू मूक चेला सिमोन पतरस, ईंग नाःआ चिठीयिंग ओजाःगेतना। अबूरीग भगवान अरू सडावदार ईसू मसी, अबू बेगर गारबार होड़कूय बड़ाँवकेड अते, अले पवावकिया हनानाः मुरुक किमइताः बिसवासकू पवावकिया अपे लगा नाःआ चिठीयिंग ओओजाःतना।

² अपे भगवान अरू अबूरीग परबू ईसू मसी बदीरेपे सुदीय लगा, भगवान बनागरा अपेय मयावा अरू अपेराः जीवे सलसतगे।

सुनावतो अरू राःतो होड़कू

³ भगवानराः सगरावतो जंगरते, अनँयग ओंगोल इया नपाय जीवबू जियाः लगा जमाकूने एमेवाडबुःआ। अरू अनँयग लगा अबूय राःकेडबुःआ हाँयग ईसू, अगम मरंग अरू नाय नपाय इदानिया माःआनबू सुदीकेड अते नाःआ जमाकूनबू पवावकिया।

⁴ अरू अबू नाःआ मरंग अरू मुरुक किमइताः जबानकूनबू पवावकिया, जेमहा अबू हना जबानते, चउंदीसरिकुःआ होड़कूराः ललची ओंगोलते होयाःता हना बेनेलूराः नेवन अतेबू बनसाव जुवाः अरू भगवानराः लूर-नेवनरेबू मिनी जुवाः।

⁵ ननानाः लगा अपे मुरुक मिहनइत घड़ीन अपेराः बिसवास सुदा नपाय लूर-नेवनते हों दोहोन इदा, अरू नपाय लूर-नेवनतेपे जियाः मेला कनहूनदारपे बड़ाँः,

⁶ अरू कनहूनदारपे दोहोन मेला अपेराः जीव ओंगोल समझाव घड़ीनपे दोहोगे, अपे ओंगोल समझाव घड़ीन जीवपे जियाः मेला अपे जमा बेला सहाव घड़ीनपे दोहोन। अरू सहाव घड़ीन दोहोन मेला भगवानराः ओंगोल इयापे दोहोन।

⁷ भगवानराः ओंगोल इयापे दोहोन घड़ीन बिसवासी होड़कू सुदा अलार-दुलार होड़ेंग लगा इदा अरू एटाः होड़कू होँपे अलार-दुलारगोड ञवन लगा इदा।

⁸ नाःआ कताकून अपेराः जीवरे इदा अरू बडेनता दो, अबूरीग परबू ईसू मसीराः कनहून बदीरे अपेराः जीव बेगर लूर अरू सदाःआ ओरो होयानेना।

⁹ मनदो नाःआ इया मेरकू बडेनता हँकुःआ होड़कू अंधा होड़कू इया सहे कोयोल कोयोलकू ञेलता हँकुःआ होड़कू इया इदानकुःआ। अरू भगवान हँकूराः मड़ंगाः कसूरकूने बुहाल अमिंगतेरा हना कता हँकू लिड़िंग एंडागोतेरा।

¹⁰ दो ईंगरिकुःआ अजी बोपोहकूतिंग, अपे मुरुक ओसताज घड़ीन नपाय लूर-नेवनते जियाः लगापे कुरनिसगे, जेमहा जमा होड़कू सुदीगोड भगवान अपेय सुनावकेडपेःआ अरू अनँयगरिकुःआ निकता होड़कूय बड़ाँवकेडपेःआ, माःआन। नाःआ इयापे एचेय दो अपे भगवानराः दूर कहियो ओरोपे अड़ाःतेरा।

¹¹ अरू अपे ईंग कताकेरा हनन इयापे जियाः दो अबूरीग परबू अरू सडावदार ईसू मसीराः ओरो लुलिगनेना हना देसरे मुरुक मान मरजइततेपे बोलो अवेनता।

भगवानराः सरवन बदीरे चेड

¹² हनालगा ईंग चेडकेडपेःआ हना कता अपे सुनुदीबाःगोतेरा, अरू हनानाः सताय कतारे बड़ियाड़ इदानपेःआ। हनते हों नाःआ कता बदीरे ईंग अपे उहियारगोड ञवन लगा सपड़ावतोयिंग दोहोनता।

¹³ इनीसू मसी ईंग एचेरेय कताकेरा, आमराः सेर हलीते अधे वेगतना, माःआन।

¹⁴ हनालगा ईंग ओंगोलरे, ईंग जीयतिंग दोहोनता हना दिन वरी अपेयिंग उहियारगोड ञवन दो, नपाय इदा।

¹⁵ ईंग मुरुक मिहनइत घड़ीनिंग बुतातना, जेमहा ईंग गोएग जुवाः हना तयोमरे हों अपे नाःआ कताकून तोनोंगाः बेलारेपे उहियार अवेय।

¹⁶ ईसू मसीराः जंगर बदीरे अरू हाँयराः कुदा वेग बदीरे अले तोनोंगाः तुलात कहड़ीकून मेरले कता बोनावगाडपेःआ। मनदो अले अँननलेराः मेडते हाँय तुमिन मरंग इदानिया हनाले ञेलकेरा।

¹⁷ ईसू मसी, अपांग भगवान अगीते मान-मरजइते पवावनेना हनमेला, विड़चेड़तो मरसल सुदा भगवानराः अरो सेरमो होरतेले अयूमतेरा, नाँय ईंग ननायगुःतना ईंगरीग दुलार बेटा हवे, माःआन।

¹⁸ नाःआ अरो सेरमो होरतेले अयूमतेड मेला, अले अबूरीग परबू ईसू मसी सुदा हना सुद पहाड़रेले दोहोना।

¹⁹ नाःआते अले सुनुदीबाःगेतनाले, भगवानराः बड़रा कता होड़कूराः कता सताय हवे, माःआन। हँकू ओजाःतेरा हना सरवन तिंगीड घड़ीनपे मनाः। नाःआ सरवन अंदरारे निंदावा वरी मरसल एमेयता हना ढिबरी इया इदा। हनते अंगुः इपील इदानिया हाँयग ईसू मसी, अपेराः इंदरीरेय विड़चेड़ता।

²⁰ नाःआ मइद कतापे सुदीबाःका, भगवानराः बड़रा कता होड़कू अते तोनोंगीग अनँयगराः ओंगोल इया तोनोंगाः मेरकू कतागाड।

²¹ भगवानराः बड़रा कता होड़कू अँननकूराः हिछा इया सहे एटाः होड़कूराः ओंगोल इया कता उदुःगे लगा कहियो मेरकू ओंगोलगाड। मनदो सुद बिरुवाराः अगुवाइते भगवान अगीतेकू कता उदुःतेरा।