2 कुरिंती 12 - Korwa Bible

भगवान अगीते पउलूसराः दरसन अरू अबड़तो

¹ बड़वारगुः अते तोनोंगाः नफा कोवानेःआ। मनदो परबू अगीतेयिंग पवावकिया हना दरसनकून अरूय उदुःवारिंगा हना कताकून बदीरेयिंग कता उदुःगोड ञवनता।

² ईसू मसी एचेरेय बिसवासगेतना मी होड़ होड़ इदानिया। चउदाह बरिस मड़ंगरे भगवान हाँयग होड़ सेनेरमो सेरमो देसे रेम गोःयडिया। हाँय देनेह देहरे जा बेगर देहरे भगवान रेमयडिया हना ईंग मेरिंग सुसुदीतना, मनदो भनगवान एकला नाःआ बदीरेय सुसुदीतना।

³ हाँय देनेह देहरे जा बेगर देहरे भगवान रेमयडिया हना बदीरे भनगवान एकला सुसुदीतना।

⁴ हाँय सेरमो देस होर भगवान रेम गोःयाडिया अरू होड़कू ओरोकू बुतुड़ु देखार अवेतेरा अरू अँनकूराः बड़रारे ओनोरोकू मेसा अवेतेरा हना सुद कताकूने अयूमतेरा।

⁵ नाँयग होड़ बदीरे ईंग भल-भलायगुःता, मनदो ईंग इनिंग बदीरे ओरोयिंग भल-भलायनेना। ईंग भल-भलाय दो ईंग ईसूराः सेवारे अबड़तो होड़िंग बड़ाँव जुवाःतान अतेयिंग भल-भलायगुःता।

⁶ ईंग सतायिंग कतायतना। हनालगा ईंग भल-भलायगुः लगायिंग चहाः हों ईंग बुयांग ओरोयिंग बड़ाँवनेना। मनदो ईंग कताय लगायिंग धक जुवाःता, जेमहा तोनोंगीग ईंग एचेरेकू ञेलता अरूकू अयुमेता हना अते बगरा ईंग बदीरे अलोकू ओंगले।

⁷ दो नुँहू ईंग ओरोयिंग बुतुड़ु देखार अवेतेरा हनानाः मुरुक बगरा दरसनकून बदीरेयिंग कतायतना। दो ईंग अलोयिंग बड़वारगुः लगा सुई गोभावगिंगता इया कलउरीग बराहीलते मुरुक पीरा ईंग लगा भगवान एमेतेरा।

⁸ नाःआ पीरा ईंग अते चलाः जुवाः लगा ईंग परबू एचेरे पेय तुरहायिंग अरजीतेरा।

⁹ मनदो हाँय ईंग एचेरेय कतातेरा, ओरो! ईंगराः जंगर अबड़ावगुःतान मेला उडु-बुडूगोडमेता। हनालगा ईंगराः मया आम लगा होनोया जुवाःता, माःआन। दो ईंग अबड़ाव होड़िंग दोहोन अते, ईंग मुरुक बहालतेयिंग भल-भलायगुःता, जेमहा मसीराः जंगर ईंग जीवरे दोहो ञवन।

¹⁰ ईंग अबड़ावगुःतान मेला, ईसू मसी ईंगे बड़ियाड़गींगता। हनालगा ईंग अबड़गुःतान मेला, अरू कटसियारेयिंग दोहोनतान मेला, अरू ईंगकू ओपतागिंगतान मेला, अरूयिंग गरीबगुःतान मेला अरू ईसू मसी बदीरे ईंगकू संतावगींगतान मेला बनहालतेयिंग दोहोनता।

कुरिंतीरिकुःआ बिसवासीकू बदीरे पउलूसराः ओंगोल

¹¹ ईंग इनिंग भल-भलायगुःतान अते बुयांगिंग बड़ाँवनेना। मनदो ईंग ननन इया भल-भलायगुः लगा अँननपे ईंगपे रेनहातेरा। ईंग तोनोंगीग कोवायिंगा। हनते हों तोनोंगीग मनारंग मूक चेलाकू अते हों ईंग हुडिंग कोवायिंगा। हनालगा अपे इनिंगपे भल-भलायवाकेःआ।

¹² बयाव जुवाः इयाःआ बुताकून अरू चिनहाकून सहाव घड़ीन ईंग अपे तलारेयिंग एचे उदुःतेरा। हना अते अपे सुदीगोतेडपे जा, हाँय हों मी होड़ मूक चेला हवे, माःआन?

¹³ ईंग एटाः कलसियारिकुःआ होड़कू लगायिंग एचेतेरा हना तोनोंगाः अपे लगा मेरिंग एचेगरा जा? हाव, ईंग अपे लगा मीटोंग कता मेरिंग एचेगरा। ईंगराः गुजर मसर सलाः लगा अपे मेरिंग बोझा ओवागाडपेःआ। दो नाःआ गारबार हवे माःआनपे ओंगलेतान होले हान अपे जीवतेपे बराव एंडागोड।

¹⁴ अयुमेपे! ईंग अपे एचेरे पेय पुरती सेन लगा सपड़ावतो इदानिंगा। ईंग अपेराः आन-धान कोवान, मनदो अँननपेयिंग चहाःतना। हनालगा ईंग तोनोंगाः बोझा अपे लगा ओरोयिंग ओवातेडपेःआ। लइंकू एंगा-अपाकू लगा कोवान, मनदो एंगा-अपा लइंकू लगा आन-धान बटुड़ावगे लगा इदा।

¹⁵ हनालगा ईंग बहालते ईंगराः जमा जिनिसकून अरू ईंग इनिंग हों अपे लगा जिमागुः लगा सपड़ावतो इदानिंगा। ईंग अपे मुरुक बगरायिंग अलार-दुलारपेतान दो अपे ईंग गुनमिनपे अलार-दुलारगींगता जा?

¹⁶ अपे ईंग बदीरेपे कतायता, हाँय अबू बोझान मेरेय ओवागाडबुःआ, माःआन। मनदो एटाः होड़कू कतायता, हाँय अबू बोनावकेडबूखने अडिगकेडबुःआ, माःआन।

¹⁷ दो ईंग अपे एचेरेयिंग वारतेडकुःआ हँकुःआ होड़कू अते तोनोंगीग होड़ते अपे अते अडिगकेडखनिंग एचे गोःकेरा जा?

¹⁸ ईंग अपे एचेरे सेन लगा तितूसिंग रेनहातेरा अरू हाँय सुदा एटाः मी होड़ होयिंग वारतेरा। दो तितूस अपे एचेरेय अडिग जोमनेना जा? हनाँय इया अलेराः लूर नेवन कोवानेःआ जा? अरू अले हों हाँय इया मेरले सलाःता जा?

¹⁹ अपे नुँहू वरी अले बदीरे, अबू अते बनसाः लगाकू कतायतना, माःआनपे ओंगलेतना जा? मनदो हना इया कोवान। अले नाःआ कताकून भगवानराः मड़ंगरे मसी सुदा मिनीकियानखनले कतायतना। ईंगरिकुःआ अजी बोपोहकूतिंग, जे हों सकालाः अले कतायता हना अपे जमालेःआते अपेराः बिसवास बड़ियाड़ जुवाः लगाले कतायतना।

²⁰ ईंग बोरतान इया, ईंग अपे एचेरेयिंग सेन मेला ईंग चहाःता हना अते एटाः इया अलोयिंग सेने ञामपे अरू अपे हों ईंग एचेरेपे असराता हना अते एटाः इया अलोयिंग होयाः। अपे एचेरे कड़ीग, इरा, रीस, हिगार हटिंगगुः, ओपता होड़ेंग, चुबली होड़ेंग, बड़वारगुः अरू गड़ोयग-मड़ोयग इदा माःआनिंग बोरतना।

²¹ ईंग बोरतना, अपे एचेरे अरूयिंग सेन दो होयाःकून करे अपे मड़ंगरे भगवान ईंगे एचे गियूगोडिंग। अपे अते मुरुक होड़कू मड़ंगरेकू एचेया हना सनहा-सनही, लमचोर-लिमचोर अरू बेलूर बुताकून अड़ाःकेडखन भगवान अगी जीव मेरकू कुदागरा। अरू हँकुःआ होड़कू हनानाः बुताकून एचे घड़ीनकू जियाःतना। दो ईंग हँकुःआ होड़कू लगा मुरुक फिकिराः पराःता करे?