1 तिमुतियूस 5 - Korwa Bible

बिसवासी होड़कू करा इया ओंगोलकू इदा

¹ ने तिमुतियूस, सयाँड़ होड़कू अहम डंटावकू अरू अपांग इया ओंगोलकेडकूखन समझावकूमे अरू हुडिंग डिंघाकू बोपोहोकूताम इयाम ओंगोलकू।

² आम मरंग अइमीकू एंगाम इयाम ओंगोलकू अरू सुद ओंगोलते हुडिंग धंगड़ीकू अनम मेमेसकूताम इयाम ओंगोलकू।

रंडियाहीनकू अरू अगुवा होड़कू बदीरे सलाह

³ सतायरे रंडियाहीनकू इदानकुःआ हँकूपे मान मरजइतकू अरूपे संघरावाकू।

⁴ मनदो तोनोंगीग रंडियाहीनरिकुःआ बेटा बिटीकू सहे कोपोड़ारकू इदान दो हँकू अँननकू ओड़ाःरिकुःआ होड़कू पला दरीकू लगा इदा। अरू एंगत अपात अरू जीयात-ततात अँकूकू पला दरीतेरा हनन इया हँकुःआ होड़कू भगवान सेवागेय लगाकू चिडुःता, जेमहा भगवान जुकूरकू बड़ाँव जुवाः।

⁵ सतायरे रंडियाहीन इदानिया अरू तोनोंगीग हाँय संघरावाय लगा मेरकू दोहोनता हाँय, दिन रइत अरजी घड़ीन भगवान संघरागेय लगा हाँय एचेरेय असरागोड ञवनता।

⁶ मनदो अनँयग बहालगुः लगा एकलाय ओंगोल ञवनता हाँयग रंडियाहीन जीयात इदानीग हों गोनेगतो इदानिया।

⁷ जमा बिसवासी होड़कू नाःआ इयाःआ कता बदीरेम हुकुमवाकू, जेमहा तोनोंगीग होड़ हँकू अहाकू ओपता अवेकू।

⁸ अँननकू ओड़ाःरिकुःआ होड़कू मेरकू पला दरीकूता, हँकुःआ होड़कू अँनकूराः बिसवासकू अड़ाःगोतेडा अरू बेगर बिसवासी होड़कू अते हों बेनेलूर इदानकुःआ।

⁹ अनँयगरीग मिनी होड़ हेरेलतो सुदा मड़ंगरेय दोहोना अरू साठ बरिस होयायना हनाँयग रंडियाहीनराः ञाव रंडियाहीन सूचीरे ओजाःगे लगा इदा।

¹⁰ हाँयग रंडियाहीन बदीरे एटाः होड़कू नाःआ हिदइत, उउदुः लगा इदा, हाँय एटाः होड़कू लगा नपाय संघराय एमेःआ, अनँयग लइंकूय पला दरीतेरा, गुतिया होड़कू होंय नेत-नेवारतेरा, भगवानरिकुःआ सुद होड़कूराः काटे बुहालतेरा अरू सिकिसतारेकू दोहोना हँकुःआ होड़कूय संघरावातेरा अरू हाँय एटाः एटाः इयाःआ नपाय बुता एचेगे लगा लगले इदानिया, माःआन।

¹¹ धंगड़ी रंडियाहीनकूराः ञाव हना सूचीरे अहम ओजाःगे। हँकू दो ललची ओंगोलते पेरेगकियानखन ईसू मसी एकलाकू सेवायता माःआनकू जबानकता हना जबान मेरकू पुरावगेता अरू सगइगुः लगाकू चहाःता,

¹² अरू मड़ंगाः जबान अते अइठावकियानखन भगवान अगीते डंडकू पवाःता।

¹³ हँकू कुड़ही जुवाःताकू अरू हँकू ओड़ाः ओड़ाः सेन घड़ीन होड़कूकू ओपता इदीता। हँकू एटाः होड़कूराः बुतारेकू मेसा जुवाःता अरू होड़कू सुदा बुतुड़ु इया कोवानेःआ हना बड़राकू कतायता।

¹⁴ हनालगा ईंग चहाःता, धंगड़ी रंडियाहीनकू सगइ जुवाःकू अरू लइंकूकू जनमाव अरू अँननकू ओड़ाःकू सलाव। ननन इयाकू एचेय दो मुदइ होड़कू अबू ओरोकू बदी अवेतेडकुःआ।

¹⁵ तोनोंग तोनोंग धंगड़ी रंडियाहीनकू नुँहू हों भगवान अड़ाःकेडखन कलउराः दूरकू साबकेरा। नननलगा नाःआ इयायिंग कतायतना।

¹⁶ तोनोंगीग बिसवासी अइमीराः ओड़ाःरे रंडियाहीन इदान दो हाँय हनाँयग रंडियाहीने संघरावा अरू हाँयराः जिमेवारी कलसियारिकुःआ होड़कू एचेरे अहाय एमेय। हनाते कलसियारिकुःआ होड़कू सतायरे रंडियाहीनकू इदानकुःआ हँकूकू संघरा अवेवाता।

¹⁷ नपायते होड़कूकू अगुवाइवाता हँकुःआ कलसियारिकुःआ अगुवा होड़कू अते तोनोंग तोनोंग होड़कू भगवानराः सरवनकू परसारगे लगा अरू चेडकू लगाकू मिहनइतगेता। दो ननन इयाकुःआ होड़कू बगरा मान मरजइतकू लगा इदा।

¹⁸ भगवानराः कागदरे नाःआ इया ओजाःतो इदा, दउरी मेला उरीगराः आह अलोपे तोल रेडे अरू बुताताय हाँयग होड़ अनँयग बुताराः बनी पवाः जुकूर इदानिया।

¹⁹ तोनोंगीग मूक होड़ बदीरे तोनोंगीगराः लालिस, बार पेय होड़कूराः हिदइत बेगर आम अलोम अयुमे।

²⁰ कसूरगेताय हाँयग मूक होड़ जमा होड़कू तलारे आम चड़ाँकियानखन डंटावगेयमे अरूम मंदरावगेय, जेमहा एटाः होड़कू कसूरगे लगाकू बोरो जुवाः।

तिमुतियूस लगा पउलूसराः सलाह

²¹ दो ईंग बेटा तिमुतियूस, भगवान, ईसू मसी अरू भगवानरिकुःआ सुनावतो सेरमो देसरिकुःआ बराहीलकू मड़ंगरे, मड़ंग आमिंग उदुःवारा हना इया जमा होड़कू सुदा बेगर पाचपटीतेम एचेय लगा सेतावकेडमेखनिंग हुकुमवामतना।

²² तोनोंगीग होड़राः बोःरे ओहेन तिःई खेपाकेडखन मूक होड़ अहाम बड़ाँवगेय। अरू आम तोनोंगीगराः कसूररे अहम मेसान अरू अनम आम सुदमे दोहोन।

²³ नुँहू वरीते आम दाः एकला अलोम ञूय। आम दोंगेराः हसू अरू एटाः एटाः हसूकून अँड़ाःमे लगा आम गुन लकन रंजावतो अंगूरराः रस होंम ञूय।

²⁴ तोनोंग तोनोंग होड़कूराः कसूर, फड़ियावराः दिन अते मनाड़ंग जमा होड़कू सुदीगोडता। मनदो तोनोंग तोनोंग होड़कूराः कसूर एटाः होड़कू मेरकू सुदी अवेयता अरू हँकूराः कसूर कुबेररेकू सुदी अवेयता।

²⁵ हनन इया होड़कूराः तोनोंग तोनोंग नपाय बुता हों जमा होड़कू सुदीगोडता, मनदो तोनोंगीगराः नपाय बुता मेर सुदी अवेनता हनारे हों हना नपाय बुता मेर ओको अवेनता।