1 तिमुतियूस 2 - Korwa Bible

अरजी बदीरे चेड

¹ ने तिमुतियूस, मीटोंग मइद कता ईंग आम एचेरेयिंग असेयतना, जमा होड़कू लगा भगवान एचेरे अरजीकेडखन हँकू लगाम असेय अरू हँकू बदीरे भगवानमे धनियाबाद।

² आम, राजाकू अरू सरकाररिकुःआ हातपात होड़कू लगा अरजीगे लगा इदा, जेमहा अबू सलसतरे अरू बेगर बोरते भगवान जाग घड़ीन सुद जीवबू जियाव अवेन।

³ नाःआ दो नपाय इदा अरू अबूरीग सडावदार भगवान नाःआतेय ननाय जुवाःता।

⁴ हाँय जमा होड़कू कसूर अतेकू सडाव जुवाः लगा अरू सतायकू सुदीगोड लगाय चहाःतना।

⁵ भगवान मिनीटोंग इदानिया अरू होड़कू अरू भगवान तलारे मिनी होड़ बिच-बिचवाई इदानिया। हनाँयग होड़ हवे ईसू मसी।

⁶ जमा होड़कू कसूर अते सडावकू लगा हाँय किमइत एमेकेडखन कुरूसरे गुजुः लगा अनँयग आँयग जिमायान। नाःआ सरवन भगवान तोल दोहोतेरा हना बेला चउंदीसरिकुःआ होड़कू एचेरेय उदुःतेरा।

⁷ ईंग सनातायिंग ककतातना, मेरिंग लबरातना, नपाय सरवन जमा होड़कू एचेरे परसारगे लगा अरू ईसूरीग मूक चेला होयाः लगा भगवान सुनावकिडिंगखन बेगर एहूदाकू एचेरे भगवानराः सताय अरू बिसवासगेःआ सरवन चेड लगा ईंगे जिमावारा।

⁸ हनालगा ईंग चहाःतना जमा ततेररे कलसियारिकुःआ मरद होड़कू बेगर रीसते अरू बेगर अड़ा-चउकीते अँकूराः सुद तिःईकून सेरमो अगी पेरेकेडखनकू अरजी।

⁹ अइमीकू अकूस मना घड़ीन नपाय तुसिंग रिडुः लगा इदा। हँकू ऊब मुरुक सिंगरावगे अते अरू सोना, मुती अरू मुरुक दामराः सोनहेकून तुसिंगगे अते कोवान,

¹⁰ मनदो, नपाय बुताकूनते अनँयग आँयग सींगराः लगा इदा। भगवानकू जागता, हँकुःआ अइमीकू ननन इयाकू होयाः दो नपाय इदा।

¹¹ जमा अइमीकू, चेडकूताय हाँयग होड़राः आड़रे कलेकाल दोहोकियानखन चिडुः लगा इदा।

¹² अइमीकू चेचेड लगा अरू मरद एचेरे हातपातगे लगा ईंग ओरोयिंग एमेतेरा। मनदो हँकू कलेकाल दोहोन लगा इदा।

¹³ भगवान, मड़ंग आदमए तुलातेड अरू तयोमरे हववाए तुलातेड। हनालगा ईंग नाःआ कतायिंग कतायतना।

¹⁴ अरू कलउ, मड़ंग आदम मेरेय लहकावगडीग, मनदो हववाए लहकावगोतेड अरू हाँयग हववा कसूरतेरा।

¹⁵ मनदो अइमीकू भगवान एचेरेकू बिसवासगे अरू अलार-दुलार घड़ीन ओंगोल समझावकियानखन सुद जीवकू जियाः दो, हँकू अमिंगगुः मेला भगवान हँकूराः जीवे सडावगोडता।