1 पतरस 3 - Korwa Bible

एपेराकू अरू हेपेरेलकू बदीरे चेड

¹ ने अइमीकू, हनन इया अपे अँननपेरिकुःआ हेपेरेलकूतापेराः आड़रेपे दोहोन। हँकू अते तोनोंगीग होड़ भगवानराः सरवन मेरकू बिसवासगेतान दो,

² अपेराः सुद अरू भगवानराः अकूसपे मनाःता हना लूर-नेवनकू ञेल घड़ीन, बेगर कताते भगवानराः सरवनकू बिसवास अवेयता।

³ अपे होड़कू उदुःवा लगा, ऊब बिनियावकेडखन, सहे सोनाराः सिंगार तुसिंगकेडखन, सहे मुरुक किमइतराः सोनहे तुसिंगकेडखन अहापे सिंगारगुः,

⁴ मनदो अपेराः इंदरी सुधा अरू सलसतिया जीवतेपे सिंगारगे। अरू ननानाः सिंगार कहियो ओरो ओहरावनेना अरू भगवानराः ओंगोलरे मुरुक किमइताः इदा।

⁵ भगवान एचेरेकू असरातेरा हँकुःआ मड़ंग जूगरिकुःआ सुद अइमीकू, ननन इया अँननकू अँकू सिंगारनेना अरू अँननकूरिकुःआ हेपेरेलकूराः आड़रेकू दोहोना।

⁶ दो साराह हों, अनँयग हेरेल इबराहीमराः कताय मनाः घड़ीन ईंगरीग मालिक, माःआने रगेया। हनन इया अपे हों अपेरिकुःआ हेपेरेलकूतापेराः आड़रेपे दोहोन। अपे बेगर बोरतेपे जियाः अरू सतायपे एचेय दो, अपे हों सराहरीकुःआ बिटीकूपे बड़ाँःता।

⁷ ने हेपेरेलकू, अपे हों हनन इया अँननपेरिकुःआ एपेराकू मान मरजइतकूपे अरू अलार-दुलारकू घड़ीनपे तिहाकू। हँकू अपे अते अबड़ इदानकुःआ, मनदो हँकू हों बरोबइर अपे सुदा भगवान एमेकेरा हना नँवा जीवराः दहिन पवाः लगा इताडदारकू इदानकुःआ। नाःआ इयापे एचेय दो, अपे अरजी मेला तोनोंगाः टटी-बेड़ा अपे लगा ओरो होयानेना।

नपाय बुतापे बुताता अते कटसिया

⁸ नाःआ जमाकून एचे घड़ीन, अपे जमाकू सुदा मिनी जीवते, सोगा होड़ेंग घड़ीन अलार-दुलारतेपे दोहोन। अरू अँननपे अपे हुडिंग ओंगोलकियानखन सुधा होड़कूपे बड़ाँः।

⁹ अपे बेलूर बदलारे बेलूर अपे अहापे कुदागे, अरू तूडपेताकू हना बदलारे अलोपे तुडकू, मनदो हँकुःआ होड़कूराः जीव-जहन भगवान नपायगे लगापे अरजीगोड ञवन। ननन इयाःआ बुताकून एचेय लगा भगवान अपेय राःकेडपेःआ, जेमहा अपेराः जीव-जहन हों भगवान नपायगे।

¹⁰ भगवानराः कागदरे नाःआ इया ओजाःतो इदा, नपाय जीव जियाः लगा अरू अहाल बहालराः दिन ञेल लगाकू चहाःता, हँकुःआ होड़कू अँननकूराः आह बेलूर बड़रा अतेकू रोंकावगे, अरू अडिग बड़रा अते तोनोरे दोहोन लगा इदा।

¹¹ हँकू बेलूर बुता अड़ाःकेडखन नपाय बुता एचेय लगा इदा अरू सलसत जीव जियाः लगा अरू ननानाः दूररे सलावगोड ञवन लगा इदा।

¹² दो भगवानराः कताकू मनाःता, हँकुःआ होड़कू हाँय अगुराकूता अरू हँकूराः अरजी हाँय अयुमेता, मनदो बेलूर बुताकू एचेयता, हँकुःआ होड़कू भगवान हिनइस-बिनइसवाकूता।

¹³ अपे नपाय बुता बुता लगा ओसताजपे दोहोन दो, अपे बदीरे इये बेलूर एचेय लगाकू चहाःता?

¹⁴ मनदो अपे नपाय बुतापे बुताता हना अते कटसिया ससहाव पराः दो, भगवान अपेराः जीवे नपायगोडता। हँकूराः हुड़काव अयूमकेडखन अपे अहापे बोर अरू अहापे हदराःआ,

¹⁵ मनदो अपे ईसू मसी अँननपेरीग परबू हवे माःआन अकूसपे मनावगेय। अरू तोनोंगीग अपे जीवरे इदा हना असरा बदीरेय होंबरे दो, जमा बेला अँननपे अपे हुडिंग ओंगोलकियानखन, एटाःकू मान मरजइत घड़ीन कता कुदागे लगा, सपड़ावतोपे दोहोन।

¹⁶ अपेराः इंदरी सुदपे दोहोगे। दो अपे ईसू मसी एचेरे बिसवासकेड अते, होड़कू अपे बदीरे ओपता घड़ीनकू कताय हों, अपेराः नपाय लूर-नेवन ञेलकेडखनकू गियू जुवाःता।

¹⁷ अपे ईंगपे अयूम। बेलूर बुता बुताकेडखन कटसियापे सहाव अते, नपाय बुता बुताकेडखन भगवानराः ओंगोल इया कटसियापे सहाव दो ननपाय इदा।

¹⁸ भगवानराः ओंगोलरे अबू बेगर गारबार होड़कूय बड़ाँवबू लगा, बेगर गारबारीग इनीसू मसी मिनी जूदा अबू जमा कसूर होड़कू लगा, कटसिया सहावतेडखने गोएगनेना। हाँय देनेह देहरेय गोएगनेना मनदो भगवान हाँयराः बिरुवाय जियाव रेमगोतेडा।

¹⁹ हाँय तोलतोकू दोहोना हँकुःआ गोएगतो होड़कू एचेरेय सेनेडा, अरू हँकू एचेरेय परसारतेरा।

²⁰ तोलतोकू दोहोना हँकुःआ गोएगतो होड़कू नूहराः जूग परियारे भगवानराः कता मेरकू मनावगान हँकुःआ होड़कू हवे। हनमेला नूह मरंग दाः जहाजे तुलाःआ अरू होड़कू भगवान एचेरे बिसवासगे लगा, भगवान सहाव घड़ीने तंगी ञवना। मनदो आठगोटोंग होड़कू एकला हना दाःतेकू बनसावनेना।

²¹ अरू हना दाः बतिसमाराः अउल-तउल इया इदा। ईसू मसी गोएगतो होड़कू अतेय जियाव रेमकिया अते बतिसमाते अपे बनसाव जुवाःता। नाःआ बतिसमाते अपेराः देहराः मइल बुहाल अमिंगगुः लगा कोवानेःआ। मनदो हन बतिसमा अपेराः इंदरी नपायते दोहो ञवन लगा भगवान एचेरे मीटोंग अरजी इया इदा।

²² दो ईसू मसी सेरमो देस अगी तोराया अरू नुँहू हाँय भगवानराः खउना तिःई गतररेय दुड़ुःकिया। सेरमो देसरिकुःआ बराहीलकू अरू जमा हातपातदारकू अरू अबू मेरबू ञेल अवेकूता हँकुःआ जंगरदार भूतकू, हँकू जमाकू हाँयराः आड़रेकू सलाःतना।