1 कुरिंती 4 - Korwa Bible

ईसूरिकुःआ मूक चेलाकूराः सेवा

¹ ननन इया इदान दो अपे अलिंग ईसू मसीरिकिनाः सेवकियाकिन अरू भगवानराः ओकोत कनहून जिमात होड़किन इयापे ओंगोल दोहोलिंग।

² अरू मड़ंग अलिंग मालिक एचेरे बिसवासगे इयालिंग दोहोन लगा इदा।

³ दो अपे ईंगपे फड़ियावगींग सहे तोनोंगाः कोट कछेरीरेकू फड़ियावगींग, हना बदीरे ईंग एचेरे गुनमिन हों ओंगोल कोवानेःआ। सतायरे ईंग इनिंग मेरिंग फड़ियावगुःता।

⁴ मनदो ईंगरीग फड़ियावदार भनगवान हवे। अरू ईंग इंदरीरे गुनमिन हों बदीन इया ओंगोल कोवानेःआ। हनते हों ईंग भगवानराः ओंगोलरे बेगर गारबार होड़ मेरिंग बड़ाँव अवेनता।

⁵ दो परबू अरीने कुदा वेग वरी, अपे तोनोंगीग अलोपे फड़ियावगेय। हनाँय अंदरारे ओकोत इदा हना कताकून मरसलरेय एचे उदुःगोडता अरू होड़कूराः ओंगोलकूने एचे उदुःगोडता। हना तयोमते भगवान मेमेड होड़ अँननकूराः बुता इयाय भल-भलायकूता।

⁶ ने अजी बोपोहकूतिंग, ईंग अपोलोस बदीरे अरू इनिंगराः बदीरे, ओजाःतो इदा हना अते बगरा एचेय लगा कोवानेःआ माःआन अपेराः नफा लगा अउल-तउल इयायिंग कताकेरा। अरू हन अते अपेके अलिंग अते चिडुः लगा इदा। दो अपे अलिंग बदीरे, मी होड़ एटाः होड़ अते ननपाय इदानिया माःआन, अलिंग बदीरे अलोपे बड़वार।

⁷ अपे एटाः होड़कू अते मइद इदानपेःआ जा? भगवान एमेकेरा हना अड़ाःकेडखन अरू अपे एचेरे चिला इदा? अरू अपे भगवान अगीतेपे पवावकिया दो, अले दहिनकून मेरले पवावगना, माःआन चिला लगापे बड़वारतना?

⁸ अरे हायरे दइया! अपे संतोकयनापे जा? अपे गिरहतयनापे जा? अले अड़ाःकेडखन राजाकूपे बड़ाँवयना जा? हाव, ईंग चाहाःतना, अपे जमाकू राजाकूपे बड़ाँव जुवाःकुःआ दो, अपे सुदा अले होंले राइजकेःआ।

⁹ ईंगराः ओंगोलरे, अले ईसूरिकुःआ मूक चेलाकू, गुजुःराः डंड पवाः लगा साब गोःतोकू दोहोनता हँननकुःआ होड़कू इया जमा होड़कू मड़ंगरे भगवान एचे चड़ाँकेडलेःआ। अरू सेरमो देसरिकुःआ बराहीलकू अरू नाःआ चउंदीसरिकुःआ होड़कू हों अलेकू ञेलता।

¹⁰ ईसू मसी लगा बोको इया इदानकुःआ माःआन होड़कू ओंगोललेता, मनदो अपे ईसू मसी लगा अँननपे कनहूनदारपे ओंगलुःतना। अलेराः जीव अबड़ अरू एरंगतो इदा, मनदो अपे जंगरदारकू अरू मान मरजइत पवावतो होड़कूपे ओंगलुःतना।

¹¹ अले नाःआ बेला वरी रंगेग ततंगतो अरू सोनहे गेंदरा तुसिंगतो अरू उलत-कलातकू चपड़लेता अरू बेगर ओड़ाःते इदानलेःआ।

¹² अले अँननलेराः तिःईतेले मिहनइतगेता। होड़कू अलेकू कड़ीतान दो, भगवान हँकूराः जीव नपायगे लगाले अरजीता। अलेकू संतावतान दो हनले सहवेता।

¹³ अलेकू बदीतान दो हँकू सुदा सुधियाले बुतुड़ुता। नुँहू वरी अले होड़कू लगा जोम एरांगतो इया अरू सेया खरसी इया इदानलेःआ।

¹⁴ अपे एचे गियूपे लगा मेरिंग ओजाःगेतना, मनदो ईंगरिकुःआ दुलार लइंकू हवे माःआन ओंगोलकेडखन अपेयिंग डंटावता।

¹⁵ अपे ईसू मसी बदीरेकू चेडपे लगा दस हजार चेडदारकू दोहोन हों, अपेरीग मिनीटोंग अपांग इदा। अपे एचेरे नपाय सरवनिंग कता उदुःतेरा अरू अपे ईसू मसी सुदापे मिनीयान अते ईंग अपेरीग अपांगिंग बड़ाँवयना।

¹⁶ हनालगा अपे जमालेःआते ईंगरिकुःआ ञेल सिखात होड़कूपे बड़ाँः लगा अपे एचेरेयिंग गोड़न-पइयनतना।

¹⁷ नाःआ लगा ईंग अपे एचेरे ईंगरीग दुलार बेटा इयायीग तिमुतियूसिंग वारतना। हाँय परबू लगा बिसवासगेयीग इदानिया। जमा ततेरराः कलसियारिकुःआ होड़कू सरवनिंग चेडकूता हना चेड इया ईसू मसी लगा करा इयायिंग जियाःतना हना हाँय अपे एचेरेय कता उदुःगेता।

¹⁸ अपे अते तोनोंग तोनोंग होड़कू, हाँय अबू एचेरे ओरोय वेजेडा, माःआन ओंगोलतेडखनकू बड़वारतना।

¹⁹ मनदो परबूराः ओंगोल इदान दो, अपे एचेरे ओनोहेनिंग सेनता। हनते हँकू बड़वारता हना कता सताय हवे जा कोवान, अरू भगवानराः जंगर हँकू एचेरे इदा जा कोवान, हना ईंग अता-पतागोडता।

²⁰ भगवान होड़कूराः जीवरेय राइजगेता हन बुतुड़ु एकलारे कोवान, मनदो हाँयराः जंगर होड़कूराः जीवरे दोहोनता।

²¹ दो अपे चिलापे चहाःतना? ईंग सुटी साबकेडखन अपे एचेरेयिंग सेन, जा मया घड़ीन दुलारते अपे एचेरेयिंग सेन?