Ɛ́fɛ̂zɛ 2 - Kɑɑ Fí

Sɛ́ ɡɑ́ nɛpɔ́ wɛ fí mbɔ̌ pʉɔ-Kɛlístɔ

¹ Pʉʉ kɑ pɔ́ yɛcɔ́ ŋkɑ́ ḿbɔ́ mbɔ̌ Sɛ́, mbɔ pʉʉ kɑ pfú mɔ́ mbíꞋ pɑ́Ꞌ pʉʉ kɑ pɔ́ ɡɑŋmɛfɑɑnɛ ḿbɛn ḿbɔ́ pɑɡɛ mɛnu kɛpɔŋ.

² Pʉʉ kɑ pɔ́ ŋkɑ́ ɛ̂yɑ́ ḿbɔ́ ŋ́ɡɛ pɔ yîyɑ́ ntɛ́ mɛnu. Pʉʉ kɑ pɔ́ ńnɛn pɑ́Ꞌ pʉɔ pi pɔ́p tsɛt yɔ mbí ḿbɔ́ ńnɛn pɔ́Ꞌɔ, ḿbɔ́ ńzúꞋ ntsu-fɔɔ-mɛzẅikŋɛ kɛpɔŋ wi ɑ sɑ́Ꞌnɛ mɛzẅikŋɛ kɛpɔŋ mi ɛ́ tʉ́ tsɛt fɑ́k. Jʉ́ pɔ́nɛ ŋkɔ̂ɔnɛ ḿbɔ́ ńtsʉ́ʉnɛ pʉɔ pi pɔ́p lʉꞋ nɛzúꞋ ntsu-Sɛ́, pɔ́p pɔ́ ŋ́ɡɛ mɛnu kɛpɔŋ.

³ Pɛkŋɛ pɛtsʉʉ kɑ zɛɛ ḿbɔ́ pɔ pɑ́Ꞌ pɔ́p, ḿbɔ́ ŋ́ɡɛ pɔ yúu mi tʉ́m-ŋumɛsɔŋ sɛ́ ńtsɑ́ɑ, mɛyúu mi tʉ́m-ŋumɛsɔŋ pɔ́p kwɑŋɛ yɛ́ tʉ́ʉnɛ nǔu, mbɔ pɛ́ kɑ pí wɛkŋɛ pɛkŋɛ pɔ́ pɔ pʉɔ pi Sɛ́ sɛ́ ńzɑ́ŋ lɔ́ŋ nǔu pɔ́p pɑ́Ꞌ ɑ sɛ́ ńzɑ́ŋ lɔ́ŋ nǔu pɛcɔ́ pʉɔ.

⁴ Lɑ́ Sɛ́ tsɑ́ɑ mɛjʉ́ŋ-pʉɔmɛsɔŋ tɛꞋ. A kɑ pɛn ńdɛɛ pɔ nǔu ntɛ́ yi ɑ kɑ lɔknɛ ŋ́kɔŋ wɛkŋɛ,

⁵ ɑ kɑ ɡɛ pɛkŋɛ pɛ Kɛlístɔ pɛn ḿbɔ́ ɡú, tɛ mbɑ pɑ́Ꞌ pɛkŋɛ kɑ pɔ́ mbɔ̌ wɛ́ yɛcɔ́ ŋkɑ́, mbɔ pɛkŋɛ kɑ pfú mbíꞋ mɛfɑɑnɛ mɛkŋɛ lɑ́. A kɑ lɔk pɔ pɔŋtʉ́m yɛ́ ŋ́ɡɛ pɛkŋɛ luk.

⁶ Pɑ́Ꞌ pɛkŋɛ kɑ lɑt mɔ́ mbʉʉ yɛkŋɛ nǔu Yɛ́su Kɛlístɔ lɑ́, ɑ kɑ zẅíimɛ wɛkŋɛ pɛpɔ́p nǔu nɛvú, ḿbɛn ŋ́ɡɛ pɛkŋɛ cʉ́ɔ nzʉʉ Yɛ́su Kɛlístɔ, pɛkŋɛ pɛpɔ́p tɛmtɛ ŋ́kɔ́Ꞌ ńnɑ́ŋ tʉ́nɛ́pú ḿbɔ́ ɛ́sɑ́Ꞌ mbɑ kʉ̈ɔ́ lɑ́ zúꞋu.

⁷ A kɑ ɡɛ mɔnɛ mɛnu pɑ́Ꞌ ɑ ɡʉ ńdɑ́Ꞌ ńdɔk ńdɛꞋlɛ nǔu yîyɑ́ kɛm njí yi ɛ́ sɛ́ ńtɔ́ ŋɡɔ ɑ kɑ ɡɑ́ fuꞋ níinɛ yɛkŋɛ tɛ ńdɛɛ ntɛ́, ɛ́fú nǔu pɑ́Ꞌ, ɑ lɛɛnɛ nǔu Yɛ́su Kɛlístɔ ŋ́ɡẅɛɛ pɔŋtʉ́m nǔu pɛkŋɛ pɔ́Ꞌɔ.

⁸ A kɑ ɡɑ́ fuꞋ fɛ̌ɛ yʉ́ʉ, ŋ́ɡɛ pʉʉ luk, ɛ́fú nǔu pɑ́Ꞌ pʉʉ kɑ zɑ́pnɛ tʉ́m nǔu Yɛ́su. Ɛ́ kɑ́ pɔ́ ɛ́fú mbɔ̌ pʉʉ pɔ́, ɑ kɑ lɔk pɔ pɔŋtʉ́m yɛ́ ŋ́ɡɛ.

⁹ Ɛ́ pɔ́Ꞌɔ, ŋ́kɛ́ ḿbɔɔ fú nǔu mɛfɑꞋ mi pʉʉ fɑꞋnɛ pɔ́. Pɔ́Ꞌɔ lɑ́, ḿbɔ́ ŋu pɔɔ lɔk ŋ́ŋɑ́Ꞌtɛ pɔ́.

¹⁰ Pɛkŋɛ lɑɑ ḿbɔ́ kʉ̈ɔ́ ɔɔ, mbɔ pɛkŋɛ lúꞋnɛ pɔ Sɛ́. Sɛ́ kɑ lɛɛ nǔu Yɛ́su Kɛlístɔ ḿbɔ́ɔ wɛkŋɛ, nɛpɔ́ yi pɛkŋɛ ɡʉ ɛ́fɑꞋ mɛfɑꞋ sʉ́Ꞌnɛ mi jʉ́ Sɛ́ kɑ lɑ́Ꞌnɛ ńniitɛ ńzɑ́p pɑ́Ꞌ pɛkŋɛ ɡʉ ɛ́fɑꞋ.

Kɛlístɔ cúꞋlɛ́nɛ pʉɔ mɛntɛ́ mɛntɛ́ ńdɔk ŋ́ɡɛ tɑ́Ꞌ nɔɔ

¹¹ Pɔ́Ꞌɔ lɑ́, pʉʉ kẅíitɛ pɑ́Ꞌ pʉʉ kɑ zɛɛ ḿbɔ́, pɛ́ kɑ pí wʉ́ʉ pʉʉ pɔɔ pɑyúdɑ pi pɛ́ púꞋnɛ wɔ́p pɔ́, Pɑyúdɑ pi pɛ́ púꞋnɛ wɔ́p, lɔk pɔ́Ꞌɔ, ńjʉ́ɔ ŋɡɔ pɔ́p pʉɔ-Sɛ́ ńtsʉ́Ꞌ ŋ́kʉ́ʉnɛ wʉ́ʉ kʉʉnɛ́nɛ ŋɡɔ pʉʉ kɑ́ pɔ́ pʉɔ-Sɛ́ pɔ́, ńcú pɔ́Ꞌɔ, lɑ́ nɛpúꞋ wɔ́p ɛ̂wɑ́ pɔ́ pɔ lii yi pɛ́ kɑ lɔk pɔ mbɔ́ ŋ́ɡɛ nǔu mbʉʉ yɔp.

¹² Pʉʉ pɛn ŋ́kẅíitɛ ŋɡɔ ɛ́ kɑ pɔ́ ŋkɑ́ ɛ̂yɑ́, pʉʉ pɔɔ ḿbɔ́ ńjí ŋɡɔ wɛcɔ́ ŋu ɡú ḿbɔ́ Nzɑ́Ꞌŋkʉ, tɛ pɛ́ ɡẅɛɛ nɛzẅíꞋlɛ wɛ́ pɔ́. Pʉʉ pɔ́ tsɛtsɛt pʉɔ-Íslɑyɛ̂l ḿbɔ́ pɔ pɛɡʉʉ, pʉʉ pɔɔ nu nǔu kɑɑ yɔ́p pɛ Sɛ́ ɡẅɛɛ tɛ mbɑ nǔu yúu mi Sɛ́ kɑ kɑꞋnɛ mbɔ̌ pɔ́p. Pʉʉ kɑ pɔ́ yʉ́ʉ ndǔ yɔ mbí, ḿbɔɔ ḿbɔ́ ńzẅíꞋlɛ yɛcɔ́ yúu pɔ́, ḿbɛn kɛ́ mbɔɔ ńjí Sɛ́ pɔ́.

¹³ Lɑ́, ɛ́ kɛ́ ḿbɔ́ ŋkɔ̂ɔnɛ, mbɔ pʉʉ pi pʉʉ kɑ pɔ́nɛ ŋɡɑ sɛsɑ, pʉʉ kɑ lɔk pɑ́Ꞌ pʉʉ lɑtnɛ mbʉʉ nǔu Kɛlístɔ ńdɛɛ pɑ́Ꞌ ɑ kɑ lɔknɛ mbʉʉ yɛ ńnɔŋ pɔꞋ. Sɛ́ tíi wʉ́ʉ ńtík nɛjɔ́ŋ wɛ́, mbíꞋŋɡɔ Yɛ́su Kɛlístɔ kɑ tswɛt mɛci mɛ́ ḿpfú mbíꞋ wʉ́ʉ.

¹⁴ Kɛlístɔ kɑ pfú ńdɔk ńtɑ́ktɛ tɑ́ɑŋkɑ́Ꞌ ẅi ɛ́ ḿbɔ́ ɛ́fyɑk wɛkŋɛ. Pɛkŋɛ lúꞋnɛ pɔ wɛ́ ŋ́ɡẅɛɛ mbɔ́tnɛ tsɛtsɛt pɛkŋɛ. Mbɔ ɛ́ kɑ pɔ́ ŋkɑ́mbi pɑyúdɑ pɔ́p pɑtúu pɔ́ pɔ pɛɡɑŋmbuu. A kɑ kɛ́mɔ́ ńtɛmtɛ wɛkŋɛ ńdɔk wɛkŋɛ ŋ́ɡɛ pʉɔ tɑ́Ꞌ ŋu.

¹⁵ Yɛ́su kɑ pík mbʉ́ʉ-pɑyúdɑ yi ɛ́ cúnɛ ŋɡɔ, ɡɛ yɔ, ɡɛ yi, lɑ ńdɔk ḿbɔ́ ŋu-Sɛ́, ḿbík pɔ́Ꞌɔ, pɑ́Ꞌ Pɑyúdɑ mbɑ pʉɔ pi pɔ́p kɑ́ pɔ́ pɑyúdɑ pɔ́ ɡʉ ńdɔk pɑ́Ꞌ mbɑ wɔ̌ lɑ́ nǔu pɔ́p ɡʉ ńdɑt mbʉʉ yɔp nǔu Yɛ́su, ńtɛmtɛ ńtsʉ́Ꞌ nɔɔ fí. A lɔk ḿmɛk mbuu tsɛtsɛt pɔ́p, pɔ́p nɑ́ŋ nɛ́ mbɔ́tnɛ.

¹⁶ Pɑ́Ꞌ pɛkŋɛ ńtsʉ́Ꞌnɛ tɑ́Ꞌ nɔɔ lɑ́, ɛ́ lɔk ńcú ŋɡɔ mbuu yí ɛ́ kɑ pɔ́nɛ tsɛtsɛt mɛnɔɔ mɛkŋɛ ɛ́ kɑ kɛ́mɔ́ ḿmɛ. Ɛ́ kɑ fú pɔ nǔu pɑ́Ꞌ Kɛlístɔ kɑ pfúnɛ nǔu tʉ́ mbɑ́ŋtɛ pɑ́ŋtɛ́nɛ ńdɔk ŋ́ɡɛ mbuu ẅí ɛ́ kɑ pɔ́nɛ tsɛtsɛt mɛnɔɔ mɛkŋɛ pɛ́ Sɛ́ mɛ. Pɛkŋɛ pɛtsʉʉ tsʉ́Ꞌ ḿbɔ́ pɔ pʉɔ-Sɛ́. Yɔ yúu mi ɛ́ kɑ mɛknɛ mbuu ẅí ɛ́ kɑ pɔ́nɛ tsɛtsɛt pɛkŋɛ.

¹⁷ Kɛlístɔ kɑ tɔ́ nɛcẅi Ŋkʉʉ Sʉ́Ꞌnɛ ẅí ɛ́ ɡɑ́nɛ mɔ́fíitɛ mbɔ̌ pʉʉ pi pʉʉ kɑ́ pɔ́ pɑyúdɑ pɔ́, mbɔ pʉʉ ŋ́kɑɑ pɔ́ nɛjɔ́ŋ Sɛ́ pɔ́, ḿbɛn ńcẅi mbɑ mbɔ̌ pɑyúdɑ pi pɔ́p kɑ pɔ́nɛ nɛjɔ́ŋ Sɛ́.

¹⁸ Pɔ́Ꞌɔ, pʉʉ tɛ mbɑ pɛk pɑyúdɑ lɛɛ pɔ nǔu jʉ́ Kɛlístɔ, ŋ́ɡʉ nɛjɔ́ŋ Sɛ́ Tɑ́t, tɑ́Ꞌ Zẅikŋɛ Lɛ́ɛnɛ́nɛ wɛ́mɔ́Ꞌ kɛ́nɛ ńcẅɛ́lɛ wɛkŋɛ.

¹⁹ Ɛ́ lɛɛ pɔ́Ꞌɔ, pʉʉ pɔɔ pɛ́t ḿbɔ́ pɛɡʉʉ pɔ́, ŋ́kɛ́ mbɔɔ pɛn ḿbɔ́ pɔ pʉɔ pi pɔ́p lɛɛ lɛɛnɛ pɔ́. Pʉʉ lɔk ḿbɔ́ yʉ́ʉ pʉɔ-lɑ́Ꞌ pɑ́Ꞌ pɛcɔ́ pʉɔ pi pɔ́p pʉɔ-Sɛ́. Pʉʉ lɔk ḿbɔ́ nǔu tsɛ́nndɑ́-Sɛ́.

²⁰ Pʉʉ tsʉ́Ꞌ ḿbɔ́ pɔ pɑ́Ꞌ mbɛlʉ̂k yi pɛ́ lɔknɛ ḿbɔ́ɔ ndɑ́. Cʉ́ndɑ́ pɔ́ ɡɑŋntúu-Yɛ́su pɔ́p pɑcẅiŋkʉʉ-Sɛ́, Yɛ́su Kɛlístɔ nɛ́ túmbʉʉ yɛ́ pɔ́ ŋɡɔꞋ yí ɛ́ piꞋnɛ ndɑ́.

²¹ Jʉ́ ɡɛnɛ lɑ mɛsɑ́k-ndɑ́ tʉ́ʉ ndʉ́ŋndʉŋ, ŋ́kɔ́Ꞌ nɛ́ tʉ́, ɛ́ pɔ́ ndɑ́ yi Sɛ́ kwɑꞋ jʉ́ nɛ́ túmbʉʉ yɛ nɑ́ŋnɛ tsɛtú.

²² Pʉʉ yʉ́ʉ nɛ́ pɛcɔ́ pʉɔ, pʉʉ lɔk pɔ pɑ́Ꞌ pʉʉ lɑtnɛ mbʉʉ yʉʉ nǔu Kɛlístɔ, lɑ ḿbɔ́ yɛcɔ́ ɡúŋ-ndɑ́ ɛ̂yɑ́, ńdɔk ḿbɔ́ ndɑ́ yi pɛ́ sɛ́ ḿbɔ́ɔ, ɛ́ pɔ́ zʉꞋ yi Sɛ́ nɑ́ŋnɛ zúꞋu, lɑ́ Zẅikŋɛ yɛ́ pɔ́nɛ zúꞋu.