Epɛs 1 - Gabri Maja

Pol leen̰ kalaŋ ga Epɛs lapɨya

¹ Na ɨŋ-bandi Pol ba wale magtubu di kɛ le. Ɨŋ na ba-gɨre-gɨye gɨ da Jesu-Kɨris, kɨya gɨ na kuduroy geye gɨ da Kumu koyi. Ɨŋ wal magtubu di kɛ le bɨn̰ na kalaŋ ga woyge dan̰ cɨndɨge a cay ƴaa-di-gumu di Epɛs dɨŋ bɨ, ga ɨrege cay tɨbayige dɨŋ dan̰ wɔlɛ pɨna pɨna a te bugoŋ pɨna dan̰ Jesu-Kɨris koge gɨŋ bɨ.

² Kuɗa gɨ Baynagɨŋ Kumu dan̰ Ba-gulɔŋ Jesu-Kɨris laage kuduroy-ɗarwa danagɨŋ bɨ, bɨgɨŋge gusi-dɔbɛ bɨ.

Hɨnga ga Kumu bɨna te bugoŋ pɨna konagɨŋ dan̰ Kɨris

³ Kuɗa gɨ hɨrame wɨya uja cay Kumu bɨ, Ba-gulondɨna Jesu-Kɨris Bay bɨ. Kɨya wa ban tor-kɨbi cayna kol bugoŋ gɨ na bugoŋ pɨna dan̰ Kɨris. Kɨɗɨn̰ ga ban bɨna hɨnga ga ni tɔrɛ-kɨbɨ nɔm ga dan̰ cɨndɨge cɨndɨge ga gɨɗɨgɨ-Kumu gaŋ ga sayga gusi Turnɔ ɗe-kuduroy-bɛrɛ.

⁴ Na toy di hɨn̰ wo̰ ma Kumu torna ɗena dan̰ cɨndɨna kol cay Kɨris bɨ, te bugoŋ gɨ na bugoŋ pɨna danayi tumɔ pa dɨm ma ban ɗen̰ cay gɨsəŋ ƴee, ɗe gɨ ana na won̰ dan̰ cɨndɨna bɨ, masadɨna na unɔ bɨ, a tumoyi. Dan̰ geye koyi,

⁵ Kumu tumɔ ojɨ gɨ ɗi na kɨya lɔɔ gɨ na na bɨləŋ karɨndi kol cay hɨnga ga Jesu-Kɨris ba lee. Na hɨnga ga ban gey gɨ na wɨya hɨn̰ wo̰ kɨya cay ɗarwa toyi.

⁶ Ɗe gɨ ana na hɨramii kɨya cay gusoŋ-tɔgɛ koyi bɨ, kɨya cay ɗarwa di gumu di ban lee danana kɨya cay bugoŋ gɨ na bugoŋ pɨna dan̰ kurondi, ungo gɨ ban lee-toy tɔgɨ.

⁷ Kol cay bugoŋ gɨ na bugoŋ pɨna te Kɨris le, kɨbardi gɨ bugoŋ coŋ le, lee gɨ Kumu dornagɨŋ kɨbɨ ɨsɨna gɨŋ coŋ bɨ, ɗe kuduroy jal a cay hɨnga kana ga dan̰ gɨyəŋdɨge naŋ gaŋ bɨ. Na hɨn̰ wo̰ ma Kumu gɨlna ɗarwa toyi di gumu tɔgɨ di ban lee dananagɨŋ.

⁸ Kumu bɨna cɨn̰-muɗɔlɛ dan̰ cay wɔyɛ-bɨra di ɓal kɔl na kɨya cay ɗarwa di gumu di ban lee danana le.

⁹ Na toy di hɨn̰ wo̰ ma, Kumu lee gɨ ɗe cɨndɨna hangaŋ cay hɨnga ga tumɔ woy kɨɗɨn̰ wɔsɛdɨge gaŋ ga ban ojɨ kɨya lɔɔ dan̰ kuduroy-ɗarwa toyi, di ban ƴom cay tɨbaa tumɔ gɨ ni lɔɔ dan̰ gɨyəŋ gɨ da Jesu-Kɨris.

¹⁰ Kɨɗɨn̰ ga wɔlɛ gɨ Kumu dor kɨya bugoŋ na, kɨɗɨn̰ ga nee le, ban kɨya dɔbɛ hɨnga nɔm ga gɨɗɨgɨ-Kumu gaŋ bɨ, ga cay gɨsəŋ gaŋ bɨ, te tɨrɨmbala di da ungo pɨna nɛŋ dɨŋ, Kɨris.

¹¹ Na way hɨnga kana ga ni ban̰di-gulɔŋ ga ojɨ cayna na dan̰ gɨyəŋ gɨ da bugoŋ gɨ na bugoŋ pɨna te Kɨris. Kɨya wa Kumu torna tumɔ na dan̰ gɨyəŋ gɨ da gɨse koyi gɨ ban gɨsɨ le. Ban lee hɨnga nɔm hɨn̰ gɨ ban ojɨ bɨ, kuduroy gey wo̰ bɨ.

¹² Hɨn̰ wo̰ na, na ga cay wase cɨg cɨg ga na si ɨrɨmedɨni cay Kɨris le, kuɗa gɨ na hɨramagɨŋ gɨmɨn̰aw di da Kumu.

¹³ Kɨŋ kalɨn̰ ma kɨɗɨn̰ ga kɨŋ ba je kɔl gɨ cɨndi, gɨ na Kɔl-gɨ-Ɗari gɨ kɨŋ wan̰ pɔɗɛ le, kɨŋ bee kuduroygɨŋ cay Kɨris. Ɨni na dan̰ gɨyəŋ gɨ da bugoŋ gɨ kɨŋ bugoŋ pɨna danayi le, Kumu ɗe kambe kayi gusɨgɨŋ. Kambe ga nee le na Turnɔ ɗe-kuduroy-bɛrɛ di ban ye gɨ ɗi na kɨya bɨn̰ kalaŋ kayi le.

¹⁴ Turnɔ ɗe-kuduroy-bɛrɛ na hɨnga ga gɨl gɨ Kumu na kɨya bɨna hɨnga ga ɗari ga ban ƴom cay tɨbayige kol cay kalaŋ kayi. Ban gɨlna gɨ na na kɨya wɔɔgɨŋ hɨnga ga nee le leen̰ cɨndi, kɨɗɨn̰ ga Kumu kɨya dorna ɗena daa cɨrab. Kuɗa gɨ na hɨramgɨŋ gɨmɨn̰aw di da Kumu.

Pol ol Kumu kɨya cay ka-aye kudurɔ

¹⁵ Na toy di hɨn̰ wo̰ ma ɨŋ-bandi kalɨn̰ ma, ayɨn̰ toy gɨ ɨŋ ba je kol kuduroygɨŋ ga kɨŋ ba ay bɨn̰ Ba-gulɔŋ Jesu bɨ, kol geye gɨ kɨŋ ba gey kan ga woyge dan̰ cɨndɨge nɔm bɨ na,

¹⁶ ɨŋ leen̰ Kumu ho’o daa daa kol caygɨŋ. Kɨɗɨn̰ ga ɨŋ ol Kumu na, kuduronɨ hala gɨybəŋ caygɨŋ naŋ.

¹⁷ Kuɗa gɨ ban gɨ na Ba-gulondɨna Jesu-Kɨris bayi, ban gɨ na Bayna gɨ gusoŋ-tɔgɛ na koyi le bɨgɨŋ kɨŋ nɔm turnɔ di ɗe bɨn̰ ungo cɨn̰-muɗɔlɛ bɨ, ɗe haŋge cɨn̰ ungo cayi bɨ, ɗe agɨŋ solɨn̰ Kumu gɨɗaŋ.

¹⁸ Kuɗa gɨ ban andaŋ ɗugoygɨŋ agɨŋ solɨn̰ hɨnga ga kɨŋ bee ɨrɨmedɨgɨŋ cay nee, gɨ ban təgɨŋ agɨŋ na way le bɨ, ɗe agɨŋ solɨn̰ kandi-wɔɔ bɨ, gusoŋ-tɔgɛ bɨ, gɨ da hɨnga ga ni ban̰di-gulɔŋ ga woy ojɨ cay kan ga woyge dan̰ cɨndɨge,

¹⁹ ɗe ana na solɨn̰ dɔnɔ di kondi di lee gɨye kol cayna na-gandi ka-aye kudurɔ le bɨ. Na dɔnɔ di ɗɨn̰ cɨn̰-kɨɗɨn̰ bɨ, hɨndi ma na dɔnɔ di Kumu gɨl a cay Kɨris,

²⁰ kɨɗɨn̰ ga ban boyi lɨbii duroy kalaŋ ga madɨrdaŋ gaŋ bɨ, ayi orɨn̰ danayi gɨɗɨgɨ-Kumu gɨŋ orɨn̰ si cay kobi gɨ bara gɨŋ.

²¹ Ban si a cay Ka-dɔɔ cay ƴaa gaŋ bɨ, cay kalaŋ ga gusondɨge ye bɨ, cay Dɔnɔn̰əŋ bɨ, cay hɨnga nɔm ga orɨn̰ dan̰ dɔnɔ naŋ le tɨrɨmbala bɨ, cay gusoŋ nɔm bɨ, na a cay gɨsəŋ gaŋ kɛ ƴɔbɨ naŋ, ama a cay gɨsəŋ ga hɨrɨwa ga kɨya ɨrga nee bɨ.

²² Ho’o, Ban dobɨ hɨnga nɔm a te tɨrɨmbala di da Kɨris dɨŋ, Bɨ ayi leeyi ba-cay hɨnga nɔm, Gɨ da Ka-Daye.

²³ Ka-Daye na kuyoŋdi-gusi bɨ, dɔnɔ di da Kɨris wanɨn̰ gusɨge bɨ, dɔnɔ di da Kɨris ƴee gusi hɨnga nɔm bɨ.