Nugana 8 - Buki Tabu Lowaenei 1919

‘UPWA 8.

¹ Ta Eaubada Noa ‘i nua‘i‘isina, iage maiawasina iauna ta, lagolagowa iauna waga ‘ena si miami ma‘enao ta: ta Eaubada iagila ‘i bubuna be bare‘u ‘ena ‘i da toa, ta boasi si mwa‘umwa‘uta;

² ni‘u wate wewerupwana ta garewa ‘ana ‘awa ‘i egibodena, ta ‘usana garewega ‘i gumwara;

³ ta boasi si ‘ila‘ila bare‘uia: ta ni‘atu asiata ‘e wani anaredi ta pipiti si gumwara ga boasi si mwa‘uta.

⁴ Ta waga nawarae ‘e sebeni nina ‘enega ‘i toa, nawarae nina ‘ana asiata ‘e sebenitini nina, Ararata ‘oeana ‘edia.

⁵ Ta boasi si mwa‘umwa‘uta ga nawarae ‘e teni nina: nawarae ‘e teni nina ‘enega, nawarae nina ‘ana asiata ‘e bweuna ‘enega, ‘oea debadi si apwesa.

⁶ Ta asiata ‘e poti si gumwara ga gete ‘i apwesa, Noa waga ni‘atu ‘i bubuna ‘ana ‘awa debanega ‘i gigegena:

⁷ ta kaokao ‘e bweu ‘i etunena, ga ‘i pili dadana, ga boasi si iapaiapasa bare‘uia.

⁸ Ta bunebune ‘e bweu ‘enega ‘i etunena, be ‘i da ‘ita nai boasi bwa‘a matanaia si mwa‘umwa‘uta;

⁹ ta bunebune ‘aeiapaiapana ‘ina ‘ebeiasa nigea ‘i lobaloba, ga waga ‘ena i ‘ita, boasi bare‘u maibo‘ana matanaia si miami: ta nimana ‘i iasitoto, ga i ‘ewena, ta ‘ena ‘i me‘ena waga ‘enaia.

¹⁰ Ta ‘i miami ga wate asiata ‘e sebeni; ta wate bunebune ‘i etunena wagega;

¹¹ ta bunebune asunuanuaia ‘i ruguma; ta, wa ‘ita, ‘awanaia olibe iawana gitagina: ta ‘enega Noa ‘i mwaratonina ni‘atu boasi si mwa‘umwa‘uta bare‘uia.

¹² Ta ‘i miami wate asiata ‘e sebeni; ta bunebune ‘i etunena; ga nigea wate i ‘ila‘ilama ‘enaia.

¹³ Ta iakwara ‘e sikisi anaredi ta wani nina gete ‘i apwesa, nawarae ‘e bweuna ‘enega, nawarae nina ‘ana asiata ‘e bweuna, boasi si iapasa bare‘uia: ta Noa waga ‘ana ‘auboda i‘elo‘ewena, ta i ‘ita, ta, wa ‘ita, bwa‘a matana ni‘atu ‘i iapasa.

¹⁴ Ta nawarae ‘e ruena ‘enega, nawarae nina ‘ana asiata ‘e tweniti sebeni nina ‘enega, bare‘u ni‘atu ‘i iapasa.

¹⁵ Ta Eaubada Noa ‘ena ‘i ona, ‘i gwae,

¹⁶ Wagega ‘u da apwesa, ‘oio, mwaneio be, natumuao me ‘olotodi be, natumuao mwanediao be ma‘emuao.

¹⁷ Iage maiawasidi iauna ma‘emuao wa miamiana esio iauiauna ‘ediega ‘u da ‘au‘ewa apwesedima ma‘emuao, manua ta, lagolagowa ta, iage lookawaridi iauna bare‘uia si kawakawara ta; be ‘enega si da susaila sinabwana bare‘uia, ta si da losiwa, ta si da eiau bare‘uia.

¹⁸ Ta Noa ‘i apwesa, natunao me‘olotodi be, mwanena be, natunao mwanediao be, ma‘enao:

¹⁹ bomitawa iauna, iage lookawaridi iauna, manua iauna ta, to‘ase nai ‘i tautauia bare‘uia, ‘idi susu nadigega, wagega si apwesa.

²⁰ Ta Noa ‘ebetaria i ‘abina Ieoba ‘ena; ta bomitawa ‘esasena iauna, ta manua ‘esasena iauna, ‘ediega i ‘ewedi, ta ‘ebwaeadaita gabugabuna i ‘ebwaea ‘ebetaria ‘enaia.

²¹ Ta Ieoba maina dibidibina ‘i muina; ta Ieoba ‘atenega ‘i ona, gea‘abo wate bwa‘a ia da elialima tai manuna, tai ‘atena ‘ina nuanua ‘i to‘umalina ‘ina tubuauunuiega ta ‘enega; ta gea‘abo wate iage maiawasina iauna ia da unuunu lima na‘ieana ni‘atu ia guinuena.

²² Tuta ‘enega bare‘u ‘i miami, ‘ebedauna ta ‘ebesesoi, gogai be iaiiai ta, nawarae iaiiai be nawarae gogai ta, asiata be boiboi ta, gea‘abo si da gumwagumwara.