Nugana 50 - Buki Tabu Lowaenei 1919

‘UPWA 50.

¹ Ta Iosepa tamana manininaia ‘i be‘u, ta ‘ena ‘i dedo ta i ‘awa‘awamuina.

² Ta Iosepa ‘ina toguinuao togile‘oasa ‘edia ‘i ona be tamana oona si da giedibidibi: ta togile‘oasa Iseraela oona si giedibidibi.

³ Ta ‘asiata e poti si loegumwaridi manuna; nadigega giedibidibi ‘ana ‘asiata si loegumwaridi ta ‘enega: ta me Aigupito manuna si dedo ga ‘asiata e sebeniti.

⁴ Ta ni‘atu dedoi manuna ‘ana asiata si gumwara, ga Iosepa Parao ‘ina anua ‘ina tomianao ‘edia ‘i ona, ‘i gwae, ‘Abo nua‘ole‘ole ia loba matamia, ia sidemi, wa da ona Parao tenana ‘edia, wa da gwae.

⁵ Tamagu ‘i loina ‘eguia ga ia ona‘upa‘upa, ‘i gwae, U ‘ita, ia mwamwawasa: ‘ari‘ari nina tauna ni‘atu ia salena manugu ‘asa Kanania ‘enaia, ‘ena ‘u da sa‘ugu. ‘Enega ia sideio, gete tuga ‘u da tagwaregu be ia da tu‘e, ta tamagu ia da sa‘u, ta ia da ‘ilama.

⁶ Ta Parao ‘i ona, ‘U da tu‘e, ta tamaio ‘u da sa‘u, nadigega ‘i loina ‘emuia ga ‘u ona‘upa‘upa.

⁷ Ta Iosepa ‘i tu‘e be tamana ‘i da sa‘u: ta ma‘enao si tu‘e Parao ‘ina toguinua iauiaudi, ‘ina anua ‘ana ‘inapwanao, ta ‘asa Aigupito ‘ana ‘inapwanao iauiaudi,

⁸ ta Iosepa ‘ina anua ‘ina tomianao iauiaudi, tasinao be, tamana ‘ina anua ‘ina tomianao be: ‘idi gogama gidaridi tuga, ‘idi sipi iau be, ‘idi bulomakau iau be, si pilisinedi ‘asa Gosena ‘enaia.

⁹ Ta waga lisilisi ta togeruose ma‘enao si tu‘e: ta boda nina to‐sinabwasana.

¹⁰ Ta si mai Atada ‘ina anua ‘ebesapiwiti ‘enaia, tauna Ioridana mariesenaia, ta ‘ena dedoi tosinabwasana ta mwaumwau ‘enega si dedo: ta dosali ‘i bubuna tamana manuna asiata ‘e sebeni.

¹¹ Ta ni‘atu ‘asa nina ‘ina tomianao, me Kanania, dosali Atada ‘ina ‘ebesapiwiti ‘enaia si ‘itena, ga si gwae, Gete dosali mwaumwau me Aigupito ‘edia: ta ‘enega si eesena Abela‐misaraima, tauna Ioridana mariesenaia.

¹² Ta natunao me‘olotodi ‘ena si guinua nadigega ‘i onaona ‘edia:

¹³ natunao si ‘a‘arina ta ‘enega ‘asa Kanania ‘enaia, ta si sa‘una tanoa Makipela gaulina ‘enaia, tauna Aberaamo ‘i lagwena tanoa ma‘ieana, ‘ari‘ari ‘ana esena manuna, Eperona goma Eta ‘enega, Mamire nuganinaia.

¹⁴ Ta Iosepa ni‘atu tamana ‘i sa‘una ga i ‘ila Aigupito ‘enaia, tauna, ta tasinao, ta iauiaudi ma‘enao si tu‘etu‘e be tamana si da sa‘usa‘una.

¹⁵ Ta ni‘atu Iosepa tasinao si ‘itena tamadi ‘i mwawasa, ga si gwae, Nai Iosepa nuana ‘i da to‘umali ‘edaia, be to‘umalina iauiauna lowa ‘ena ta guiguinuena ‘i da e‘isa ‘edaia.

¹⁶ Ta ‘are si ‘etunena Iosepa ‘enaia, si gwae, Tamaio ‘i ona ‘ina mwawasa nuganinaia, ‘i gwae,

¹⁷ gete nadigega wa da ona Iosepa ‘enaia, wa da gwae, Ia sideio, gete tasimuao ‘idi li‘oa loina gea‘abo ‘u e‘isa, ta ‘idi bubuna to‘umalina, si guinua to‘umalina ‘emuia ta ‘enega: ta gete tuga, ‘a sideio, tamaio ‘ina Eaubada ‘ina toguinuao ‘idi li‘oa loina gea‘abo ‘u e‘isa. Ta Iosepa ‘i dedoi ‘ena si onaona ‘enaia.

¹⁸ Ta tasinao wate si be‘u matanaia; ta si gwae, U ‘ita, ‘abo‘ama ‘imu toguinuao.

¹⁹ Ta Iosepa ‘i ona ‘edia, Gea‘abo wa matauta: ‘abo‘agu Eaubada ‘ana Lopa‘eru nai?

²⁰ Ta ‘omi manumi, nuami ‘aene to‘umalina wa da guinua ‘eguia; ta Eaubada bobo‘ana manuna ‘i nuena, be ‘i da gieapwesa, nadigega batua, be tomota iauna iawasidi ‘i sa‘u.

²¹ ‘Enega gea‘abo wa matamatauta: ia da e‘enimi, ta ‘imi gogama gidaridi. Ta ‘i gienuabobo‘anedi, ta ‘i ona ‘atenua‘ole‘ole ‘edia.

²² Ta Iosepa ‘i miami Aigupito ‘enaia, tauna, ta tamana ‘ina anua ‘ana tomianao: ta Iosepa ‘i miami ga iakwara ‘e wan anaredi ta teni.

²³ Ta Iosepa Eparaima natunao i ‘itedi ga tubunao ‘e toinina: wate Manase natuna Makira natunao si tubua Iosepa ‘aetutuna ‘edia.

²⁴ Ta Iosepa ‘i ona tasinao ‘edia, Ia mwamwawasa: ta Eaubada ‘emia ‘i da apwesa ‘ai‘aila, ta ‘asa gete ‘enega ‘i da ‘au‘ewa tu‘eiemi ‘asa nina ‘enaia tauna ‘i onaona‘upa‘upa‘ena Aberaamo ‘ena, Isaako ‘ena, Iakobo ‘ena ta.

²⁵ Ta Iosepa ona‘upa‘upa i ‘ewena Iseraela natunao ‘ediega, ‘i gwae, Eaubada ‘emia ‘i da apwesa ‘ai‘aila, ta gete ‘enega lulugu wa da ‘a‘ara tu‘eiei.

²⁶ Ga Iosepa ‘i mwawasa, ‘ana tuta iakwara ‘e wan anaredi ta teni: ta si giedibidibina, ta kokoa ‘ana dedewaga ‘ena si sa‘una Aigupito ‘enaia.