Nugana 48 - Buki Tabu Lowaenei 1919

‘UPWA 48.

¹ Ta iage getedi si gumwara, ga gete ‘i apwesa, ‘e bweu ‘i ona Iosepa ‘enaia, U ‘ita, tamaio ‘i le‘oasa: ta natunao me‘olotodi ‘e rua i ‘au‘ewedi ma‘enao, Manase ta Eparaima.

² Ta ‘e bweu Iakobo ‘ena ‘i simana, ta ‘i ona, U ‘ita, natuio Iosepa ‘emuia ‘i memai: ta Iseraela ‘i giewaiwaiena tauna, ta ebe‘eno ‘ena ‘i miatoa.

³ Ta Iakobo ‘i ona Iosepa ‘enaia, Eaubada Toewaiwaisana ‘i apwesa ‘eguia Lusa ‘enaia ‘asa Kanania ‘enaia, ta ‘i onaobobomegu,

⁴ ta ‘i ona ‘eguia, U ‘ita, ia da bubuna ‘emuia be ‘u da losiwa, ta ia da gieiauiemu, ta ‘emuiega tomota mabodana ia da bubu; ta ‘asa gete, tubumuao murimuia ia da ‘ebwaedi ‘idi iage ataia manuna.

⁵ Ta gete tuga natumuao me‘olotodi ‘e rua, taudi si tubua ‘emuia ‘asa Aigupito ‘enaia ga muriega ia mai ‘emuia Aigupito ‘enaia, taudi si da ‘e natuguao; Eparaima ta Manase, nadigega Rubena ta Simeona, taudi si da ‘e natuguao.

⁶ Ta natumuao, taudi ‘emuia si tubua muridia, taudi natumuao; tasidao ‘adi esana nadigega si da eesedi ‘adi ‘egu‘eguia ‘enaia.

⁷ Ta ‘abo‘agu, ni‘atu Padanega ia mai, ga Rakela deiguia ‘i mwawasa ‘asa Kanania ‘enaia ‘edaia, ‘ena Eparata ‘ana ‘eda nigea ‘i gumwagumwara: ta nada ia sa‘una ‘eda Eparata ‘enaia (tauna Beleleema).

⁸ Ta Iseraela Iosepa natunao me‘olotodi, ‘i duneiedi, ta ‘i gwae, Iaisigei getedi?

⁹ Ta Iosepa ‘i ona tamana ‘enaia, Gete natuguao me‘olotodi, taudi Eaubada i ‘ebwaegu gete ‘enega. Ta ‘i ona, Ia sideio, ‘eguia ‘u da me‘edi, ta ia da onaobobomedi.

¹⁰ Ta Iseraela matana umauma tuta dudurana manuna, ta nigea ‘i da ‘ita kapekapeana. Ta ‘i me‘edi serabenaia; ta i ‘awamuidi, ta i ‘atubwailidi.

¹¹ Ta Iseraela Iosepa ‘ena ‘i gwae, Nigea ia nuena ‘aene maninio ia da ‘itena: ta, u ‘ita, Eaubada ‘eguia ‘i tagwara be natumuao wate ia ‘itedi.

¹² Ta Iosepa i ‘au‘ewedima ‘aetutuna mwatuidiega; ta ‘i bwagobwago sana mwa‘uta bare‘uia.

¹³ Ta Iosepa ‘i giiairuedi, Eparaima atainega Iseraela gegeumina deinaia, ta Manase gegeuminega Iseraela ataina deinaia, ta ‘i me‘edi serabenaia.

¹⁴ Ta Iseraela ataina ‘i iasitotona, ta Eparaima debanaia ‘i sa‘una, tauna megoamana, ta gegeumina Manase debanaia, nimana ‘i sa‘u eniniwasanena nadigega ‘ina nuena; Manase ‘i gimi tubua ta ‘enega.

¹⁵ Ta Iosepa ‘i onaobobomena, ta ‘i gwae, Eaubada nina tauna matanaia tamaguao Aberaamo ta Isaako si tauia dadana, Eaubada nina tauna ‘i e‘enigu iawasigu maibo‘ana ga batua,

¹⁶ Anelose nina tauna to‘umalina iauiauna ‘ediega ‘i li‘amigu, tubuau nidi ‘i da onaobobomedi; ta ‘agu esana si da ‘inana ‘edia, ta tamaguao Aberaamo ta Isaako ‘adi esana; ta bare‘u gamwanaia si da sinabwa be si da ‘e boda sinabwana.

¹⁷ Ta ni‘atu Iosepa i ‘itena ‘aene tamana ataina ‘i sa‘u Eparaima debanaia, ga nigea nuanuana: ta tamana nimana ‘i gilasina, be ‘i da ginaoe Eparaima debanega be Manase debanaia.

¹⁸ Ta Iosepa ‘i ona tamana ‘enaia, Gea‘abo nadigega, tamagu: gete ‘i gimi tubua ta ‘enega; ataio ‘u da sa‘u debanaia.

¹⁹ Ta tamana ‘i guitoasa, ta ‘i ona, Ia mwaratonina, natugu, ia mwaratonina: tauna wate ‘i da ‘e tomota maboda, ta tauna wate ‘i da sinabwa; ta tasina megoamana ‘i da sinabwa sinena, ta tubunao si da e ‘ebeloina iauiauna.

²⁰ Ta ‘asiata gote ‘i onaobobomedi, ‘i gwae, ‘Emuiega Iseraela ‘i da onaoboboma, ‘i da gwae, Eaubada ‘emuia ‘i da bubuna be ‘u da na‘ieana Eparaima ta na‘ieana Manase: ta Eparaima ‘i sa‘u nuganena Manase nuganinaia.

²¹ Ta Iseraela ‘i ona Iosepa ‘enaia, U ‘ita, ia mwamwawasa: ta Eaubada ma‘emi wa da miami, ta tubumiao ‘idi ‘asa ‘ena ‘i da ‘au‘ewalimemi.

²² Wate ‘e bweu esena ia ‘ebwaemu tasimuao ‘i miasinedi, tauna me Amori nimadiega ia ‘ewena ‘igu sisisaiega ta ‘igu tupuiega.