Nugana 46 - Buki Tabu Lowaenei 1919

‘UPWA 46.

¹ Ta Iseraela ‘i logara ma‘ina iage iauiauna, ta Beeriseba ‘ena ‘i mai, ta ‘i taria tamana Isaako ‘ina Eaubada ‘enaia.

² Ta Eaubada ‘i ona Iseraela ‘ena boiboia ‘ina madawara ‘ediega, ta ‘i ona, Iakobo, Iakobo. Ta ‘i gwae, ‘Abo‘agu.

³ Ta ‘i ona, ‘Abo‘agu Eaubada, tamaio ‘ina Eaubada: mwa‘uta Aigupito ‘enaia gea‘abo ‘u matamatautena; ‘ena ia da bubuna ‘emuia be ‘u e‘asa sinabwana ta ‘enega:

⁴ ‘Abo‘agu ia da mwa‘uta ma‘ieaio Aigupito ‘enaia; ta wate ia da ‘au‘ewatu‘e limanemuma ai‘aila: ta Iosepa nimana ‘i da sa‘u mataio ‘edia.

⁵ Ta Iakobo ‘i tooro Beerisebega: ta Iseraela natunao me‘olotodi tamadi Iakobo, ‘idi gogama gidaridi be, mwanediao be, si tauiedi waga lisilisi ‘edia taudi Parao i ‘etunedi be si da tauiena.

⁶ Ta ‘idi lagolagowao, ta ‘idi gwegwe, taudi ni‘atu si ‘ewedi ‘asa Kanania ‘enaia, si tauiedi, ta si mai Aigupito ‘enaia, Iakobo, ta tubunao iauiaudi ma‘enao:

⁷ natunao me‘olotodi, ta natunao me‘olotodi natudiao me‘olotodi ma‘enao, natunao mewainedi, ta natunao me‘olotodi natunao mewainedi, ta tubunao iauiaudi ma‘enao i ‘au‘ewedima Aigupito ‘enaia.

⁸ Ta Iseraela natunao ‘adi esana getedi, taudi Aigupito ‘ena si mai, Iakobo ta natunao me‘olotodi: Rubena, Iakobo ‘ina to gimi tubua.

⁹ Ta Rubena natunao me‘olotodi; Anoka, Palu ta, Eserona ta, Kami ta.

¹⁰ Ta Simeona natunao me‘olotodi; Iemuela, Iamina ta, Oada ta, Iakina ta, Soaa ta, Siaula waine Kanania natuna ta.

¹¹ Ta Lebi natunao me‘olotodi; Gerisona, Koata, Merari ta.

¹² Ta Iuda natunao me‘olotodi; Era, Onana ta, Sela ta, Peresa ta, Sera ta: ta Era be Onana si mwawasa ‘asa Kanania ‘enaia. Ta Peresa natunao me‘olotodi Esirona ta Amula.

¹³ Ta Isakara natunao me‘olotodi; Tola, Puba ta, Ioba ta, Simirona ta.

¹⁴ Ta Sebulona natunao me‘olotodi; Sereda, Elona ta, Ialeela ta.

¹⁵ Getedi Lea natunao me‘olotodi, taudi ‘i enatunedi Iakobo ‘ena Padanarama ‘enaia, Dina natuna me wainena ma‘ieana: natunao me‘olotodi ta natunao mewainedi iaruiarua iauiaudi e tati teri.

¹⁶ Ta Gada natunao me‘olotodi; Sipiona, Agi ta, Suni, Esebona ta, Eri, Arodi ta, Areli ta.

¹⁷ Ta Asera natunao me‘olotodi; Imena, Iseba ta, Isebi ta, Beria ta, Seraa nuudi ta: ta Beria natunao me‘olotodi; Eberi, ta Malakiela.

¹⁸ Getedi Silipa natunao me‘olotodi, tauna Labana i ‘ebwaea natuna Lea ‘enaia, ta getedi ‘i enatunedi Iakobo ‘enaia, iaruiarua ‘e sikisitini.

¹⁹ Rakela Iakobo mwanena natunao me‘olotodi; Iosepa ta Beniamina.

²⁰ Ta Iosepa ‘ena ‘asa Aigupito ‘enaia si tubua Manase ta Eparaima, taudi Asenata Potipera Ona ‘ana totaria natuna me wainena ‘i enatunedi ‘enaia.

²¹ Ta Beniamina natunao me‘olotodi; Bela, Bekera ta, Asibela ta, Gera, Naamana ta, Ei, Rosi ta, Mupima, Upima ta, Arida ta.

²² Getedi Rakela natunao me‘olotodi, taudi si tubua Iakobo ‘enaia: iaruiarua iauiaudi ‘e potini.

²³ Ta Dana natunao me‘olotodi, Asima.

²⁴ Ta Napatali natunao me‘olotodi; Iaseela, Guni ta, Iesera ta, Silema ta.

²⁵ Getedi Bila natunao me‘olotodi, tauna Labana i ‘ebwaea Natuna Rakela ‘enaia, ta getedi ‘i enatunedi Iakobo ‘enaia: iaruiarua iauiaudi ‘e sebeni.

²⁶ Iaruiarua iauiaudi Iakobo ma‘enao si mai Aigupito ‘enaia, taudi tolobwanega si apwesama, wate Iakobo natunao me‘olotodi mwanediao, iaruiarua iauiaudi tomotoi ta ‘e sikisi;

²⁷ ta Iosepa natunao me‘olotodi, taudi ‘ena si tubua Aigupito ‘enaia, iaruiarua ‘e rua: Iakobo ‘ina susu iaruiarua iauiaudi, taudi si mai Aigupito ‘enaia, tomotoi ta sanau.

²⁸ Ta Iuda ‘i etunena nuganinaia Iosepa ‘ena, be ‘eda nuganinaia ‘i da e‘ita Gosena ‘enaia; ta si mai ‘asa Gosena ‘enaia.

²⁹ Ta Iosepa ‘ina wagalisilisi ‘i gibubuna, ta ‘i tu‘e sabi lobena tamana Iseraela, Gosena ‘enaia; ta ‘i apwesa ‘enaia, ta ‘otonaia ‘i bwaila, ta ‘otonaia ‘i dedo dudurana.

³⁰ Ta Iseraela ‘i ona Iosepa ‘enaia, Gete tuga ia da mwawasa, ni‘atu maninio ia ‘itena, ‘oio ‘u bobo‘ana ataia.

³¹ Ta Iosepa ‘i ona tasinao ‘edia, ta tamana ‘ina susu ‘edia, Ia da tu‘e, ta Parao ‘ena ia da simana, ta ia da ona ‘enaia, Tasiguao, ta tamagu ‘ina susu, taudi ‘asa Kanania ‘ena si miamiana, ni‘atu si mai ‘eguia;

³² ta tai to‘ita‘i‘isi sipi, iobai ‘adi toosiao ta ‘enega; ta ‘idi sipi iau, ta ‘idi bulomakau iau, ta ‘idi iage iauiauna ni‘atu si me‘edi.

³³ Ta gete ‘i da apwesa, ‘ena Parao ‘i da bwauiemi, ta ‘i da ona, To‘ase ‘ami guinua?

³⁴ ga wa da ona, ‘Imu toguinuao iobai ‘adi toosiao ‘ima tuta tubuauiega ga batua, ‘abo‘ama, ta tamamao ruarua: be ‘enega ‘asa Gosena ‘ena wa da miami; to‐‘ita‘i‘isi sipi iauna me Aigupito si sinarina ta ‘enega.