Nugana 45 - Buki Tabu Lowaenei 1919

‘UPWA 45.

¹ Ga Iosepa nigea kapekapeana ‘i da ‘etobodena tauna iauiaudi si tootooro deinaia matadia; ta ‘i bwau, Tai iauna ‘eguiega wa da tauiedi. Ta nigea ‘e bweu tai ma‘ieana si tootooro, ga Iosepa ‘i simanena tasinao ‘edia.

² Ta ‘enana ‘i tagwarena dedoi ‘enaia: ta me Aigupito si nono, ta Parao ‘ina anuaia si nonona.

³ Ta Iosepa ‘i ona tasinao ‘edia, ‘Abo‘agu Iosepa; tamagu ‘i bobo‘ana ataiaia? Ta tasinao nigea kapekapeana ‘ena si da ona limana; si ‘atesa‘ara matanaia ta ‘enega.

⁴ Ta Iosepa ‘i ona tasinao ‘edia, Wa da mai serabeguia, ia sidemi. Ta si mai serabenaia, Ta ‘i ona, ‘Abo‘agu Iosepa tasimi, tauna wa gimwaneiena Aigupito ‘enaia.

⁵ Ta gete gea‘abo wa dedoi, nai wa da gamwasoara taumimo ‘emia, gete ‘ena wa gimwaniegu manuna: Eaubada i ‘etunegu nuganimia ta ‘enega be ‘enega tomota iawasidi ia da sa‘u.

⁶ Iakwara ‘e rua getedi botana ‘asa ‘ena ‘i miami: ta iakwara ‘e nima wate si miami, taudi ‘edia nigea si da gesoa ta nigea si da sesoi.

⁷ Ta Eaubada ‘i etunegu nuganimia be ‘enega ‘omi tupwami bare‘uia ia da ‘ita‘i‘isi, ta iawasimi ia da sa‘u ‘ebe‘etoseana sinabwana ‘enega.

⁸ Ta ‘enega nigea ‘omi gete ‘ena wa etuneguma, ta Eaubada: ta ‘eguia ‘i bubuna be ‘abo‘agu ‘atua tamana Parao ‘enaia, ta ‘ina anua maibo‘ana ‘ana ‘inapwana, ta ‘asa Aigupito maibo‘ana ia loinena.

⁹ Wa da lomanini, ta tamagu ‘ena wa da tu‘e, ta wa da ona ‘enaia, Gete nadigega natuio Iosepa ‘i ona, Eaubada ‘eguia ‘i bubuna ga ‘abo‘agu Aigupito maibo‘ana ‘ana ‘inapwana: ‘eguia ‘u da mwa‘utama, gea‘abo ‘u miamialia:

¹⁰ ta ‘asa Gosena ‘ena ‘u da miami, ta ‘u da mia serabeguia, ‘oio be, natumuao be, natumuao natudiao be, ‘imu sipi iau be, ‘imu bulomakau iau be, ta ‘imu iage iauiauna:

¹¹ ta ‘ena ia da ‘ita‘i‘isio; iakwara botana ‘e nima si miami ta ‘enega; ‘abona nai ‘u egomabeso, ‘oio, ‘imu susu be, ‘imu iage iauiauna be.

¹² Ta, wa ‘ita, matami si dune, ta tasigu Beniamina matadi si ‘i‘ita, ‘aene ‘awagumo tuga ‘emia ‘i gwaegwae.

¹³ Ta ‘igu esaesa maibo‘ana Aigupito ‘enaia tamagu ‘ena wa da simana, ta iage iauiauna ni‘atu wa ‘itedi; ta wa da lomanini ta tamagu wa da ‘au‘ewamwa‘utenama gete ‘enaia.

¹⁴ Ta tasina Beniamina ‘otonaia ‘i bwaila, ga ‘i dedoi; ta Beniamina ‘otonaia ‘i dedo.

¹⁵ Ta tasinao iauiaudi i ‘awamuidi, ta ‘edia ‘i dedo: ta muriega tasinao si onaona ma‘enao.

¹⁶ Ta ‘arena si nonona Parao ‘ina anuaia, si gwae, Iosepa tasinao si mai: ta Parao ‘i nuanuana sinabwana, ta ‘ina toguinuao.

¹⁷ Ta Parao ‘i ona Iosepa ‘enaia, Tasimuao ‘edia ‘u da ona, Gete wa da guinua; ‘imi aseao ‘adi ‘a‘ara wa da sa‘u, ta wa da tauia, ‘asa Kanania ‘ena wa da apwesa:

¹⁸ ta tamami ta ‘imi susuiao wa da ‘au‘ewedi, ta ‘eguia wa da mai: ta ‘asa Aigupito ‘ana bobo‘ana ia da ‘ebwaemi, ta ‘asa ‘ana momonanina wa da e‘ani.

¹⁹ Gete tuga ona ‘u nonona, gete wa da guinua; waga lisilisi ‘asa Aigupitoega wa da ‘ewedi ‘imi gogama gidaridi manudi, ta mwanemiao manudi, ta tamami wa da ‘au‘ewenama, ta wa da mai.

²⁰ Wate ‘imi gwegwe gea‘abo wa nuanua‘i‘isi; ‘asa Aigupito maibo‘ana ‘ina bobo‘ana ‘imi iage.

²¹ Ta Iseraela natunao me‘olotodi si guinua nadigega: ta Iosepa waga lisilisi i ‘ebwaedi, nadigega Parao ‘ina ona, ta masura i ‘ebwaedi ‘eda manuna.

²² Iauiaudi ‘edia ‘oama maibo‘adi i ‘ebwaedi tai ‘e bweuna ‘e bweuna ‘enaia; ta Beniamina sileba tomwana e teri anaredi i ‘ebwaena, ta ‘oama maibo‘adi ‘e nima.

²³ Ta tamana ‘ena ‘i etune gete nadigega; ase ‘e sanau Aigupito ‘ana gwegwe bobo‘adi si lo‘a‘aridi, ta ase mewainedi ‘e sanau witi ta palaua si lo‘a‘aridi masura tamana manuna ‘eda manuna.

²⁴ Nadigega tasinao ‘i etunedi, ta si tauia: ta ‘i ona ‘edia, Wa ‘ita gea‘abo wa e‘e‘upwa ‘edaia.

²⁵ Ta Aigupitoega si tu‘e, ta ‘asa Kanania ‘ena si mai tamadi Iakobo ‘enaia.

²⁶ Ta si simana ‘enaia, si gwae, Iosepa ‘i bobo‘ana tuga, ta tauna ‘asa Aigupito maibo‘ana ‘ana toloina. Ta ‘atena ‘i sawara, nigea ‘i iareiaredi ta ‘enega.

²⁷ Ta Iosepa ‘ina ona iauiaudi si simana ‘enaia, taudi ‘edia ‘i onaona: ta ni‘atu wagalisilisi i itedi taudi Iosepa ‘i etunedi be si da ‘au‘ewena, ga tamadi Iakobo iaruiaruana ‘i bwebwe‘ana:

²⁸ Ta Iseraela ‘i ona, Sawesawenaia; Iosepa natugu ‘i bobo‘ana ataia: ia da tauia be ia da ‘ita nuganena ga ia da mwawasa muriega.