Nugana 44 - Buki Tabu Lowaenei 1919

‘UPWA 44.

¹ Ta ‘ina anua ‘ana to‐‘ita‘i‘ita ‘ena ‘i ona, ‘i gwaegwae, Tai nidi ‘idi baga wa da loemaedi masurega, ‘ana sinabwana nadigega si ‘a‘ara kapekapeana, ta tai ‘e bweuna ‘e bweuna ‘ina mani ‘u da sa‘u ‘ina baga ‘awanaia.

² Ta ‘agu keiga, keiga sileba nina, megoamana ‘ina baga ‘awana ‘ena ‘u da sa‘u, ta ‘ina witi ‘ana mani. Ta ‘i guinua nadigega ona nina Iosepa ‘i oneonena.

³ Tomwa ‘i ulisina gonagonaia, tai nidi si ‘etunediwa, taudi ta ‘idi aseao.

⁴ Ta ni‘atu ‘asega si tauia etauluia, ta nigea ‘edasoraia, ga Iosepa ‘i ona ‘ina to‐‘ita‘i‘ita ‘enaia, ‘U da tooro, tai nidi ‘u da muriedi; ta ‘ena ‘u lobedi, ‘u da ona ‘edia, to‘ase manuna bobo‘ana wa e‘isa to‘umalinega?

⁵ Gete nigea nai tauna ‘enega ‘inapwana ‘i numa, ta ‘enega, i ‘ita ‘ai‘aila? guinua nadigega ‘enega ni‘atu wa bubuna to‘umalie.

⁶ Ta ‘i lobedi, ta ona getedi i ‘inanena ‘edia.

⁷ Ta si ona ‘enaia, To‘ase manuna ‘igu ‘inapwana ona nadigega getedi i ‘inanena? Eaubada i ‘etoboda be gea‘abo ‘imu toguinuao iage nadigega si da guiguinue.

⁸ U ‘ita, mani nina, tauna ‘ima baga ‘awadia ‘a lobena, ‘emuia a ‘ilenama ‘asa Kananiega: ga mwa‘adega ‘imu ‘inapwana ‘ina anuega sileba nai gola ‘a da ‘ipwari?

⁹ Tauna ‘imu toguinuao ‘ediega ‘ena ta lobena, tauna ‘i da mwawasa, ta ‘abo‘ama wate ‘a da ‘igu ‘inapwana ‘ina tai ioniionidi.

¹⁰ Ta ‘i ona, Gete tuga ‘i da nadigega ‘imi ona: tauna ‘ena ta lobena ‘i da e ‘igu tai ioniionina; ta ‘omi gea‘abo ‘imi to‘umalimo.

¹¹ Ga si lomanini, ta ‘e bweuna ‘e bweuna ‘ina baga i sa‘u mwa‘uta bare‘uia, ta tai ‘e bweuna ‘e bweuna ‘ina baga ‘i gigegena.

¹² Ta ‘i ‘ebesa, ta ‘i enugana tomatua ‘enega, ga megoamana ‘ena ‘i tosa‘u: ta keiga si lobena Beniamina ‘ina baga ‘enaia

¹³ Ga ‘adi ‘oama si ‘esabudi, ta tai ‘e bweuna ‘e bweuna ‘ina ‘ase gwegwe ‘ena ‘i sa‘una, ta si ‘ila ‘asaia.

¹⁴ Ta Iuda ta tasinao si mai Iosepa ‘ina anuaia; ta ‘ena ‘i miami: ta matanaia si be‘u bare‘uia.

¹⁵ Ta Iosepa ‘i ona ‘edia, To iage gete wa guinuena? nigea wa mwaratoni tai nadigega ‘abo‘agu ia ‘ita ‘ai‘aila?

¹⁶ Ta Iuda ‘i gwae, To‘ase ‘a da ona ‘igu ‘inapwana ‘enaia? To‘ase ‘a da ona? nai mwa‘adega ‘a da ‘awabobo‘anema? Eaubada ‘imu toguinuao ‘idi to‘umalina ni‘atu ‘i lobena: u ‘ita, ‘abo‘ama ‘igu ‘inapwana ‘ina tai ioniionidi, ‘abo‘ama, ta wate tauna nimanaia keiga ‘ena ta lobena.

¹⁷ Ta ‘i ona, Eaubada ‘i da ‘etobodegu be nadigega ia da bubuna: tai nina nimanaia keiga ta lobelobena, tauna ‘i da ‘igu tai ioniionina; ta manumi, wa da tu‘e guguiega tamami ‘enaia.

¹⁸ Ga Iuda ‘i mai serabenaia, ta ‘i ona, ‘Igu ‘inapwana ie, ia sideio, ‘imu toguinua ona ‘e bweuna ‘i da ‘inana ‘igu ‘inapwana tenana ‘edia, ta ‘imu gamwasoara gea‘abo ‘i da ‘ara‘arata ‘imu toguinua ‘enaia: ‘oio Parao nadigega ta ‘enega.

¹⁹ ‘Igu ‘inapwana ‘ina toguinuao ‘i eonedi, ‘i gwae, Tamami ‘i miamia, nai tasimi ‘e bweuna ga?

²⁰ Ta ‘a ona ‘igu ‘inapwana ‘ena, Tamama ‘i miami, tai sinabwana, ta ma‘ina goama ‘e bweu ‘ena ‘i tai sinabwanaia, megidarina; ta tasina ‘i mwawasa, ta tebweuna sinana ‘enega ‘i miami, ta tamana ‘i obobomena.

²¹ Ta ‘imu toguinuao ‘edia ‘u ona, Wa da ‘au‘ewa mwa‘utenama ‘eguia, be ‘enega mataguiega ia da ‘itena.

²² Ta ‘a ona ‘igu ‘inapwana ‘enaia, Tubuau nina nigea kapekapeana tamana ‘i da pilisinena: ‘abo tamana ‘i pilisinena ta ‘enega, tamana ‘i da mwawasa.

²³ Ta ‘u ona ‘imu toguinuao ‘edia, ‘Abo tasimi megoamana nigea ‘i da mwa‘umwa‘utama ma‘emia, gea‘abo wate maninigu wa ‘ita‘ita lima.

²⁴ Ta gete ‘i apwesa, ni‘atu ‘a tu‘e tamagu ‘imu toguinua ‘enaia, ga ‘igu ‘inapwana ‘ina ona ‘ena ‘a simanena.

²⁵ Ta tamama ‘i ona, Wa da tauia limana, ta masura gidarina wa da gimwani ‘edaia.

²⁶ Ta ‘a ona, Nigea kapekapeana ‘a da mwa‘uta: ‘abo tasima megoamana ma‘ema, ga ‘a da mwa‘uta: nigea tai nina maninina ‘a da ‘itena ta ‘enega, ‘abo tasima megoamana nigea ma‘ema.

²⁷ Ta ‘imu toguinua tamagu ‘i ona ‘emaia, Wa mwaratoni mwanegu natuguao me‘olotodi ‘e rua ‘eguia ‘i enatunedi:

²⁸ ta ‘e bweuna ‘eguiega ‘i apwesa, ta ia ona, ‘Ai‘aila si sabu lelewanena; ta muriega nigea ia ‘itena;

²⁹ ta ‘abo tauna gete wate ‘eguiega wa ‘ewena, ta to‘umalina ‘i ununa, ga uiauiagu segwasegwadi wa da ‘au‘ewa mwautedi mato‘umalina ‘ari‘ari ‘enaia.

³⁰ Ta ‘enega ni‘atu ia da tauia ‘imu toguinua tamagu ‘enaia, ta tubuau nina nigea ma‘ema; iawasina ‘ena ‘i loetaia tubuau iawasina ma‘ieana ta ‘enega;

³¹ gete ‘i da apwesa, ni‘atu ‘i da ‘itena tubuau nigea, ga ‘i da mwawasa: ta ‘imu toguinuao ‘imu toguinua tamama uiauiana segwasegwadi si da ‘ewa mwa‘utedi mato‘umalina ‘ari‘ari ‘enaia.

³² ‘Imu toguinua ‘i e ‘ebeona‘upa‘upa tubuau manuna tamagu ‘enaia ta ‘enega, ia ona, ‘Abo nigea ia me‘ena ‘emuia, ga ‘abo‘agu tamagu ‘ena ia da to‘umalina ataia.

³³ Ta ‘enega gete tuga, ia sideio, ‘imu toguinua ‘i da miami tubuau ‘ana lopa‘eru tai ioniionina ‘igu ‘inapwana ‘enaia; ta tubuau ‘i da tu‘e matasinao.

³⁴ Mwa‘adega ia da tu‘e tamagu ‘enaia ta ‘enega, ta tubuau nigea ma‘ieagu? ‘abona nai to‘umalina ‘i da apwesa tamagu ‘ena ia da ‘ita.